23
1 Na'e Màrààw uze'eg Marak pe. — Ezapo 7 ma'ea'yr hapy haw nehe. Emuàgà'ym 7 tapi'aka'yr awa ne wà nehe. Emuàgà'ym 7 àràpuhàràn hawitu ma'e awa ne wà nehe no.
2 Marak weruzar Màrààw ze'eg. Na'e uzuka pitài tapi'ak pitài àràpuhàràn rehe we ma'ea'yr hapy haw wanehe pitàitàigatu wà. 3 Na'e Màrààw uze'eg Marak pe. — Epyta neremimono kwer hapy pyrer huwake nehe. Aha putar newi nehe. Aze ru'u Tupàn Tuweharupi Wiko Ma'e ur heàwàxi pà nehe. Aze uzapo kar ma'e ihewe nehe, amume'u putar a'e ma'e paw newe nehe, i'i izupe. Na'e Màrààw uzeupir a'e zutyka'i amo ywytyr apyr. 4 Tupàn uwàxi Màrààw wà a'e pe. Màrààw uze'eg izupe. — Azapo 7 ma'ea'yr hapy haw ihe wà. Azuka pitài tapi'ak pitài àràpuhàràn rehe we ma'ea'yr hapy haw nànàn ihe wà, i'i izupe.
5 Tupàn Tuweharupi Wiko Ma'e uze'eg Màrààw pe, hemimume'u ràm imume'u pà izupe. — Ezewyr ko heze'eg imume'u pà Marak pe kury, i'i izupe. 6 Na'e Màrààw uzewyr Marak pe kury. Marak wiko wemimono kwer hapy pyrer huwake a'e rihi. Moaw wanuwihaw wiko hehe we a'e wà no.
7 Na'e Màrààw umume'u ko ze'eg puràg uzeapo ma'e ràm imume'u haw a'e kury.
— Marak Moaw wanuwihawete hemur kar Xir ywy wi a'e.
Omono kar amo awa ywytyruhu kwarahy ihemaw kutyr har pe hepiaromo a'e wà.
— Ezur nehe, i'i ihewe.
— Emono ze'egaiw teko Izaew wanehe ihewe nehe, i'i ihewe.
— Azeharomoete, emono ze'egaiw Izaew izuapyapyr wanehe nehe, i'i ihewe.
8 A'e teko uzuka putar Moaw a'e wà nehe.
Napuner kwaw ze'egaiw imono haw rehe wanehe nehe.
Tupàn numume'u kwaw Izaew wanehe uzepyk àwàm a'e.
A'e rupi namume'u kwaw wanehe izepyk àwàm ihe nehe.
9 Itahu apyr hereko mehe,
ywytyruhu apyr hereko mehe aexak teko Izaew izuapyapyr ihe wà.
Wiko a'e zutyka'i wà.
— Nazaiko kwaw amogwer teko wazàwe, i'i uzeupeupe wà.
10 Zako izuapyapyr nuzawy kwaw ywy ku'i kwer wà.
Heta tetea'u wà.
Ni amo nupuner kwaw wapapar haw rehe wà.
Aze mo aiko Tupàn hemiaihu romo a'e teko wainuinuromo hemàno mehe,
A'e mehe mo ikatu mo ihewe.
Hereko katu wer teko imunar 'ym ma'e wazàwe ihe,
i'i Màrààw.
11 Na'e Marak uze'eg Màrààw pe kury. — Ma'e erezapo kwez ihewe kury. Amono kar amo nepiaromo. — Emono ze'egaiw heàmàtyry'ymar wanehe nehe, a'e newe. Nezewe rehe we eremono ze'egatu wanehe, i'i izupe.
12 Uwazar ize'eg izupe.
— Aze Tupàn Tuweharupi Wiko Ma'e umume'u kar ma'e ihewe, xo a'e ma'e zo imume'u haw rehe apuner ihe, i'i.
Màrààw ize'eg awer mokoz haw
13 Na'e Marak uze'eg Màrààw pe.
— Ezur herupi amo ywy pehegwer pe nehe. A'e pe erepuner putar amogwemogwer Izaew wanexakaw rehe nehe. A'e pe nereko mehe emono ze'egaiw a'e teko wanehe nehe, aze ikatu newe nehe, i'i izupe.
14 Marak weraha Màrààw kaiwer Zopi her ma'e Piziga ywytyr apyr har pe. Uzapo 7 ma'ea'yr hapy haw a'e pe wà. Ma'ea'yr hapy haw nànàn uzuka pitài tapi'aka'yr awa pitàitàigatu wà. Uzuka pitài àràpuhàràn hawitu ma'e awa pitàitàigatu wà no.
15 Na'e Màrààw uze'eg Marak pe.
— Epyta xe neremimono kwer hapy pyrer huwake nehe. Aha putar newi Tupàn Tuweharupi Wiko Ma'e huwàxi pà nehe, i'i izupe.
16 Tuweharupi Wiko Ma'e uwàxi Màrààw wà a'e pe. Umume'u hemimume'u ràm izupe. — Ezewyr Marak pe heze'eg imume'u pà izupe kury, i'i izupe. 17 A'e rupi Màrààw uzewyr Marak huwàxi pà. Wiko wemimono kwer hapy pyrer huwake rihi. Moaw wanuwihaw wiko hehe we wà no. — Ma'e Tuweharupi Wiko Ma'e umume'u newe, i'i Marak izupe. 18 Uwazar Màrààw Marak ize'eg izupe ko ze'eg puràg imume'u pà.
— Ezur nehe, Marak Zipor ta'yr.
Einu katu heremimume'u ràm nehe.
19 Tupàn nahemu'em kwaw teko wazàwe a'e.
Nuiko kwaw teko romo.
Nuzewyr kwaw uze'eg awer wi.
Aze Tupàn umume'u wemiapo ràm, aipo nuzapo kwaw.
— Azapo putar ihe nehe, i'i.
Uzapo tuwe a'e.
20 — Emono ze'egatu Izaew wanehe nehe, i'i ihewe.
Omono ze'egatu wanehe.
Napuner kwaw ze'egaiw wanehe imono haw rehe kury.
21 Aexak Izaew waneko àwàm ihe.
Naheta kwaw iaiw haw wanupe nehe. Naheta kwaw ma'erahy wanupe nehe.
Tuweharupi Wiko Ma'e a'e, wazar a'e, wiko wanehe we a'e.
Teko uhapukaz wà.
— Tuweharupi Wiko Ma'e wiko zaneruwihawete romo a'e, i'i wà.
22 Tupàn upyro Izaew a'e wà, Ezit ywy wi a'e wà.
Ikàg tapi'ak awa hehaite ma'e ài.
23 Ni amo nupuner kwaw ze'egaiw imono haw rehe wanehe
paze ma'e ài wà nehe. Nupuner kwaw uzeapo ma'e ràm imume'u mua'u haw rehe ikatu 'ym ma'e iapo haw rehe wanupe wà.
Teko paw uze'eg putar nezewe
a'e teko wanehe wà nehe.
— Pexak Tupàn hemiapo kwer nehe, i'i putar wà nehe.
24 Izaew upu'àm zàwàruhu iriàw kuzà ài wà.
Ikàg zàwàruhu iriàw awa ài wà.
Wemiar i'u re zo upytu'u putar nehe.
Wemipyhyk wanuwykwer i'u re zo upytu'u putar nehe,
i'i wà.
25 Na'e Marak uze'eg Màrààw pe.
— Aze nerepuner kwaw ze'egaiw imono haw rehe Izaew wanehe nehe, emono zo ze'egatu wanehe nehe, i'i izupe. 26 Màrààw uwazar ize'eg izupe. — Ko ma'e amume'u kwez newe: xo Tupàn Tuweharupi Wiko Ma'e hemiapo kar iapo haw rehe zo apuner ihe, i'i izupe.
Màrààw ze'egatu haw na'iruz haw
27 Na'e Marak uze'eg Màrààw pe.
— Ezur herupi nehe. Ureraha putar amo ywy pehegwer pe nehe. Aze ru'u Tupàn omono kar ze'egaiw Izaew wanehe newe a'e pe nehe, i'i izupe.
28 Na'e Marak weraha Màrààw Peor ywytyr apyr ipehegwer ywyxiguhu kutyr ume'e ma'e rehe. 29 Uze'eg Màrààw Marak pe.
— Ezapo 7 ma'ea'yr hapy haw nehe. Emuàgà'ym 7 tapi'aka'yr awa ne wà nehe. Emuàgà'ym 7 àràpuhàràn hawitu ma'e awa ne wà nehe no.
30 Marak weruzar Màrààw ze'eg. Na'e uzuka pitài tapi'ak pitài àràpuhàràn rehe we ma'ea'yr hapy haw nànàn pitàitàigatu wà.