5
Tupàn pe ze'egaw uzemonokatu haw
Zegar haw Tawi hemiapo kwer
O Tupàn Tuweharupi Wiko Ma'e. Einu heze'eg nehe.
Ezeapyaka katu hekuhem mehe nehe.
Heruwihawete, Hezar. — Hepytywà pe nehe, a'e newe. A'e rupi hepytywà pe nehe,
Ta'e aze'eg newe ihe xe, Tupàn.
Ku'em mehe erenu heze'eg mehe ne.
Kwarahy ihem mehe aze'eg newe.
Àro heze'eg neremiwazar ràm ihe.
 
Nereiko kwaw Tupàn ikatu 'ymaw iputar har romo.
Neremuigo kar kwaw ikatu 'ym ma'e nezepyr ne wà.
Neremuigo kar kwaw amo wanuwi wiko wera'u ma'e neruwake ne wà.
Naneakatuwawahy kwaw ikatu 'ym ma'e iapo har wanehe.
Eremumaw hemu'em ma'e ne wà.
Puruzuka ma'e wà, hemu'em ma'e wà no, iro newe wà.
 
Apuner katu pe neràpuz huwake
Hereixe haw rehe ihe, ta'e heamutar katu pe ne xe.
Apuner nerenataromo hepenàràg rehe heapykaw rehe ihe, nemuwete katu pà ihe,
Neràpuzuhu imonokatu pyrer kutyr heme'e pà ihe no.
O Tupàn Tuweharupi Wiko Ma'e, hepytywà pe neremiapo putar haw iapo mehe nehe.
Emukatu nerape ihewe nehe.
Tuwe heàmàtyry'ymar wexak nereko haw herehe we wà nehe.
Ni amo nupuner kwaw waze'eg rehe uzeruzar haw rehe wà.
Xo purumumaw paw rehe zo ima'enukwaw wà.
— Nekatuahy, i'i mua'u amo pe wà.
Hemu'em upytu'u 'ym pà wà. — Xiuka nehe, i'i wiwi uzeupe wà.
10 Emume'u wanehe nezepyk àwàm nehe, o Tupàn.
Ezepyk wanehe nehe. Ipurapo wer ikatu 'ym ma'e rehe amo wanupe wà. Tuwe wanemimutar weraha iaiw paw pe wà nehe.
Emuhem kar nereko haw wi ne wà nehe,
Ta'e uzawy tetea'u neze'eg a'e wà xe.
Na'ipureruzar wer kwaw nerehe wà.
 
11 Neruwake uzeàmim ma'e hurywete putar wà nehe.
Uzegar putar tuweharupi urywete haw rehe wà nehe, ta'e ne erepyro ne wà xe.
Hurywete neamutar katu har wà.
12 Ne, o Tupàn Tuweharupi Wiko Ma'e ne, eremono neze'egatu teko nereruzar har wanehe ne.
Nekatu haw nuzawy kwaw u'yw wi wamimaw wanupe.