7
Tupàn pe ze'egaw ikatu haw henoz taw
Zegar haw Tawi hemiapo kwer
O Tupàn Tuweharupi Wiko Ma'e hezar, aexak hepyro haw nerehe we ihe.
Hepyro pe nehe. Hepyro pe ihewe ikatu 'ym ma'e rehe ipurapo wer ma'e paw wanuwi nehe.
Zàwàruhu iriàw her ma'e upyhyk wemiar ipei'ài'àg pà a'e wà.
Heàmàtyry'ymar ipurupyhyk wer herehe zàwàruhu ài wà. Hepyhyk kar pe zo wanupe nehe.
Tuwe naiko kwaw hepyro har hereko 'ymar romo nehe.
 
O Tupàn Tuweharupi Wiko Ma'e, Hezar, aze wyzài ikatu 'ym ma'e iapo har romo aiko,
Tuwe heàmàtyry'ymar hepyhyk wà nehe. Aipo amo ikatu 'ym ma'e azapo ihe.
Aipo azapo ikatu 'ym ma'e hemyrypar wanupe.
Aipo azepyk e amo heàmàtyry'ymar rehe.
Aze agwer ma'e iapo har romo aiko, tuwe heàmàtyry'ymar ur heraikweromo wà nehe.
Tuwe hepyhyk wà nehe. Tuwe hereityk ywy rehe hezuka re wà nehe.
Tuwe ywy imuku'i pyrer rehe hemàno re hereityk wà nehe.
 
O Tupàn Tuweharupi Wiko Ma'e, epu'àm nekwahy pà nehe.
Eho heàmàtyry'ymar wakwahy haw kutyr nehe.
Epu'àm hepytywà pà nehe,
Ta'e erezapo kar ikatu ma'e ne xe.
Emono'og teko ywy nànànar paw nezeywyr ne wà nehe.
Ereruze'eg ne wà nehe.
O Tupàn Tuweharupi Wiko Ma'e, ereiko teko paw wanemiapo kwer imume'u har romo ne.
Emume'u ikatu ma'e romo hereko haw nehe.
Ta'e naiko kwaw ikatu 'ym ma'e iapo har romo ihe xe. Ikatu ma'e romo aiko.
Emumaw ikatu 'ym ma'e wakatu 'ymaw nehe.
Emekuzar ikatu ma'e wanemiapo kwer nehe, wanupe nehe.
Ta'e ne Tupàn ne xe,
Teko wanemiapo kwer imume'u har ikatu ma'e romo ereiko ne xe. Eremume'u katu urema'enukwaw paw ne. Eremume'u katu ureremimutar no.
 
10 Tupàn nuzuawy kwaw u'yw wi purumim ma'e a'e. Hemim a'e.
Upyro imunar 'ym ma'e hemu'em 'ym ma'e azeharomo har a'e wà.
11 Tupàn wiko teko wanemiapo kwer imume'u har ikatuahy ma'e romo a'e.
Tuweharupi umume'u teko ikatu 'ym ma'e iapo har wanehe uzepyk àwàm a'e.
12 Aze nuzemumikahy kwaw wemiapo kwer rehe wà nehe, aze nupytu'u kwaw ikatu 'ym ma'e iapo re wà nehe,
Tupàn umuaime putar utakihepuku nehe.
Umuàgà'ym uwyrapar u'yw imomor àwàm.
13 Upyhyk putar a'e puruzuka haw opo pe nehe.
Omomor u'yw tata iapo pyrer nehe.
 
14 Ikatu 'ym ma'e ima'enukwaw wemiapo ràm ikatu 'ym ma'e rehe a'e wà. Pexak wanemiapo nehe.
Ipurapo wer xiroxiroahy àwàm rehe wà. Hemu'em wemiapo rehe wà no.
15 Teko uzapo ywykwar ywy pupe ohoete ma'e wemiar wapyhyk pà wà. Teko ikatu 'ym ma'e ipurupyhyk wer amo teko wanehe wà no.
A'e ae u'ar a'e ywykwar zàwenugar pupe wà no.
16 A'e rupi wakatu 'ymaw uzepyk uzar wanehe a'e wà.
Wapurukutukaw ukutuk uzar a'e wà no.
 
17 Ihe amume'u Tupàn ikatu haw izupe ihe, ta'e uzepyk ikatu 'ym ma'e wanehe a'e xe.
Azegar Tupàn Tuweharupi Wiko Ma'e hezar ywate wera'u har pe ihe, ikatu haw rehe ihe.