39
Ma'erahy ipuraraw mehe umume'u wemiapo kwer
Zegar haw Tawi hemiapo kwer
Aze'eg nezewe hezeupe ihe.
— Azekaiw katu hereko àwàm rehe ihe nehe.
Nezewe mehe heapeku nuzapo kar kwaw ikatu 'ym ma'e ihewe nehe.
Teko ikatu 'ym ma'e heywyr waneko mehe nehe,
Naze'eg kwaw ihe nehe, a'e hezeupe.
Naze'eg kwaw ihe. Namume'u kwaw ni pitài ze'eg ihe.
Ni katu haw rehe naze'eg kwaw ihe.
Nezewe rehe we apuraraw wera'u ma'erahy ihe.
Hepy'a uzemumikahy tuwe no.
Hema'enukwaw mehe azemumikahy wera'u ihe.
A'e rupi azypyrog hepuranu haw rehe Tupàn rehe kury.
— O Tupàn Tuweharupi Wiko Ma'e, màràn kwarahy amumaw putar hereko pà ihe rihi.
Ekwaw kar hekwarahy heta tetea'u 'ym àwàm ihewe nehe.
Màràn mehe àmàno putar nehe, a'e izupe.
 
Hereko haw ihewe nemur awer na'ipuku kwaw a'e.
Hereko haw ipuku haw pixika'i nerenataromo.
Azeharomoete teko waneko haw nuzawy kwaw pytuhemaw a'e.
Wata oho waiko kwe rupi ma'e i'àg ài wà.
Aze uzeagaw ma'e iapo haw rehe wà, uzeagaw e wà.
Omono'og temetarer uzeupe wà. Nukwaw kwaw wemetarer izar ràm wà.
 
Hezar, ma'e apuner hàro haw rehe kury.
Xo ne zo ereiko heremiàro romo ne.
Emunàn ikatu 'ym ma'e paw ihewi nehe.
Emuze'eg urywahyahy kar zo iranaiw ma'e herehe ne wà nehe.
Naze'eg kwaw.
Namume'u kwaw ma'e, ta'e ne ereiko ko ma'erahy ihewe ipuraraw kar arer romo ne xe.
10 Hezar, epytu'u herehe nezepyk ire nehe,
Ta'e hepetepetek awer wi àmàno etea'i ihe xe.
11 Eremume'u ureremiapo kwer ikatu 'ym ma'e urewe.
Nezewe erezepyk urerehe, ureremiapo kwer ikatu 'ym ma'e hekuzaromo.
Ereiko pànàmiràn ài ne, ureremiamutar katu pe ne. Eremumaw a'e ma'e urewi.
Azeharomoete teko wiko pytuhemaw ài wà.
 
12 O Tupàn Tuweharupi Wiko Ma'e, herenu pe newe heze'eg mehe nehe.
Ezeapyaka katu ma'e newe henoz mehe nehe.
Epytu'u zo ihewe neze'eg ire hezai'o mehe.
Amumaw xo màràn 'ar zo neràpuz me upyta ma'e romo ihe,
Heipy wazàwe ihe.
13 Epytu'u herehe neme'egatu re nehe.
Nezewe mehe apuner putar herurywete haw pixika'i ma'e hereko haw rehe ihe nehe,
Heho 'ym mehe we hemàno 'ym mehe we nehe.