1 Tupàn wiko uremimaw romo a'e. Wiko urekàgaw romo no.

Zanepytywà putar tuwe ma'erahy ipuraraw mehe nehe.

2 A'e rupi nazakyze kwaw nehe.

Aze ywy uryryryryz nehe, aze yryhu pupe ywytyruhu u'ar nehe, iwy pe oho pà nehe,

Nezewe rehe we nazakyze kwaw nehe.

3 Aze heta ykotok uhua'u ma'e yryhu rehe nehe,

Aze ywytyr uryryryryz nehe, nezewe rehe we nazakyze kwaw nehe.

4 Heta amo yrykawhu tawhu Tupàn heko haw pe har wamurywete kar har a'e.

A'e tawhu a'e, — Tupàn Ywate Wera'u Har hàpuzuhu imonokatu pyrer, za'e izupe.

5 Tupàn wiko a'e tawhu pupe.

Teko nuityk pixik kwaw a'e tawhu wà nehe.

Ku'em mehe izi'itahy Tupàn upytywà putar a'e tawhu a'e nehe.

6 Amo ae ywy rehe har ukyze tuwe wà.

Tuwihawete wanemiaihu uzemumaw wà.

Wànoànog Tupàn, ywy upaw no.

7 Tupàn Ikàg Wera'u Ma'e wiko zanemyrypar romo a'e.

Tupàn Zako izar wiko zanemimaw romo a'e.

8 Pezur nehe, pexak Tupàn Tuweharupi Wiko Ma'e hemiapo kwer nehe.

Pexak Tupàn hemiapo kwer teko wamupytuhegatu kar har ywy rehe har nehe.

9 Umumaw zeàmàtyry'ymawhu ywy nànànar nehe.

Uzuhaw ywyrapar paw. Purukutukaw uzeaikaikaw no.

Wapy u'yw wi purumimaw tata pupe no.

10 Uze'eg nezewe teko wanupe. — Pepytu'u pezeàmàtyry'ym ire nehe.

Pekwaw Tupàn romo hereko haw nehe.

Aiko teko ywy nànànar wanuwihawete romo.

Aiko ywy nànànar wazar romo no.

11 Tupàn Ikàg Wera'u Ma'e wiko zanemyrypar romo.

Zako izar wiko zanemimaw romo.