1 O Tupàn Tuweharupi Wiko Ma'e, ereiko hemimaw zàwenugar romo ne.

Nahemumaranugar pixik kar kwaw pe ne, ta'e nahereityk kar kwaw heàmàtyry'ymar wanupe ne xe.

2 Hepytywà pe hepyro pà nehe, ta'e nekatuahy ne xe.

Herenu pe hepyro pà nehe.

3 O Tupàn, eiko itahu hemimaw romo nehe.

Eiko tàpuztàtà ài hemunyryk kar pà ikatu 'ymaw wi nehe.

Ereiko itahu hemimar zàwenugar romo tàpuztàtà zàwenugar hepyro har romo ne.

4 O hezar, hemunyryk kar ikatu 'ym ma'e wanuwi nehe.

Hemunyryk kar awa upuruzuka ma'e wanuwi nehe, iaiw ma'e wanuwi nehe no.

5 O Hezar, Azeruzar nerehe.

Hekwarer mehe arer we azeruzar nerehe, o Tupàn Tuweharupi Wiko Ma'e.

6 He'ar nànàn azemupu'àm kar newe ihe.

Hemim pe hezexak kar mehe arer we ne.

Amume'u putar nekatu haw tuweharupi ihe nehe.

7 Teko tetea'u wexak hereko haw wà. Hekatu. A'e rupi wiko hezàwe wà no.

Ta'e ereiko hepyro har ikàg ma'e romo heàmàtyry'ymar wanuwi ne xe.

8 Amumaw 'ar katu nekatu haw imume'u pà ihe.

Amume'u nekàgaw. Nepuràg eteahy haw amume'u no.

9 — Aityk putar ihe kury, ta'e tua'uhez a'e kury xe, ere zo herehe nehe.

— Atyryk putar izuwi kury, ta'e na'ikàg kwaw a'e kury xe, ere zo herehe nehe.

10 Heàmàtyry'ymar ipuruzuka wer herehe wà.

Uze'eg hekutyr wà. Umume'u hezuka àwàm wà no.

11 — Tupàn weityk a'e awa a'e, i'i wà.

— Zaha haikweromo ipyhyk pà nehe,

Ta'e naheta kwaw ipyro har a'e xe, i'i wà.

12 O Tupàn, etyryk zo ihewi nehe.

Hepytywà pe kutàri kury, Hezar.

13 Tuwe amo weityk heàmàtyry'ymar wà nehe.

Tuwe umumaw wà nehe.

Tuwe herehe ipurumumaw wer ma'e uzeityk kar wà nehe.

Tuwe imaranugar wà nehe.

14 Tuweharupi uruàro ihe.

Tuweharupi amume'u wera'u putar nekatu haw nehe.

15 Amume'u putar nekatu haw.

Amumaw putar 'ar katu nehe, nepurupyro haw rehe heze'eg pà nehe.

— Màràzàwe tuwe erepyro teko ne wà, a'e newe. Nakwaw kwaw ihe. Nezewe rehe we amume'u putar nepurupyro haw nehe.

16 Amume'u putar nepuner haw nehe, o Hezar Tuweharupi Wiko Ma'e.

Amume'u putar neremiaihu wanuwi nepuir 'ymaw nehe.

Xo neremiaihu waneityk 'ymaw zo amume'u putar nehe.

17 Kwàkwàmo romo hereko haw 'ar henataromo hemu'e pe herereko ne.

Amume'u wiwi neremiapo ikatuahy ma'e aha iteko ihe.

18 O Tupàn. Hetua'uhez ihe kury. He'aw xig no.

Nezewe rehe we etyryk zo ihewi nehe, O Tupàn.

Amume'u putar nepuner haw nekàgaw ko teko wanupe ihe nehe,

Wazuapyapyr wanupe ihe nehe no.

Epyta herehe we imume'u mehe nehe.

19 Nerepuir kwaw neremiaihu ne wà. Nekatu haw, o Tupàn, uhem te ywak rehe.

Erezapo uhua'u ma'e ne.

Ni amo nuzapo kwaw agwer ma'e wà. Naheta kwaw amo nezàwenugar wà.

20 Erepuraraw kar ma'erahy ihewe. Hemuzemumikahy kar pe no.

Eremur wi putar nekàgaw ihewe nehe.

Hepyro putar pe tywypaw wi nehe.

21 Hemuigo kar putar ikàg wera'u ma'e romo. Teko tetea'u ukwaw putar heremiapo kwer wà nehe.

Tuweharupi hemurywete kar putar pe nehe.

22 Amume'u nekatu haw imume'u àwàm newe. Amupu putar hewioràwiràn imume'u mehe nehe.

O hezar, amume'u putar nekatu haw nehe, ta'e ereiko puruwi utyryk 'ym ma'e romo ne xe.

Amupu putar hewioràwiràn zegar haw imuzàg pà newe nehe, o Tupàn ikatuahy ma'e Izaew wazar.

23 Zegar haw rehe newe hewioràwiràn imupu mehe,

Azegar putar herurywete romo nehe.

Azeharomoete azegar putar wahy haw rupi nehe, ta'e hepyro pe ne xe.

24 Amumaw putar 'ar katu nekatu haw rehe heze'eg pà nehe,

Ta'e ikatu 'ym ma'e rehe ihewe ipurapo wer ma'e a'e wà xe, uzeityk kar uzemumaw kar pà a'e wà xe.