78
Tupàn uze'eg wemiaihu wanupe
Zegar haw Azaw hemiapo kwer
Heremiaihu wà, peinu katu hepurumu'e haw nehe.
Pezekaiw katu heze'eg rehe nehe.
Ta'e aze'eg putar peme ze'eg xirogatu ma'e rupi ihe nehe xe.
Amume'u putar ma'e kwehe mehe uzeapo ma'e kwer ikwaw 'ym pyrer peme ihe nehe.
Xinu a'e ma'e zaneipy zanewe wanemimume'u kwer zane.
A'e rupi xikwaw.
Naxiumim kwaw a'e ma'e zanera'yr wanuwi nehe.
Zaze'eg putar zanezuapyapyr wanupe nehe, tupàn Tuweharupi Wiko Ma'e ipuner haw rehe nehe,
Hemiapo kwer ikàg ma'e rehe nehe, hemiapo kwer ikatuahy ma'e rehe nehe.
 
Omono uze'eg heruzar kar pyràm teko Izaew wanupe.
Umume'u ma'e wemiapo kàràm Zako izuapyapyr wanupe.
— Pemu'e pena'yr ko ze'eg heruzar pyràm wanehe nehe,
I'i zaneipy wanupe.
— Nezewe mehe pezuapyapyr ukwaw putar wà nehe.
Nezewe mehe wazuapyapyr umu'e putar wa'yr a'e wà nehe no.
Nezewe mehe uzeruzar putar Tupàn rehe a'e wà nehe no.
Naheharaz kwaw hemiapo kwer wi wà nehe.
Tuweharupi weruzar putar ma'e hemiapo kàràm wà nehe.
Nuiko kwaw peipy wazàwe wà nehe.
Peipy hehaite wà. Nuweruzar katu kwaw Tupàn ze'eg wà.
Tupàn rehe wazeruzar haw na'ikàg pixik kwaw a'e.
Upytu'u hehe uzeruzar ire wà.
 
Awa Eparai izuapyapyr wà,
Wereko ywyrapar opo pe wà, opo pe u'yw wereko wà no.
Uzàn oho zeàmàtyry'ymawhu 'ar mehe wà.
10 Izaew izuapyapyr nuzapo kwaw ma'e ze'eg Tupàn pe wemimume'u pyrer rupi katu wà.
Na'ipureruzar wer kwaw ize'eg rehe wà.
11 Heharaz Tupàn hemiapo kwer purumupytuhegatu kar ma'e kwer wi wà.
Wexak iapo mehe wà. Nezewe rehe we heharaz hemiapo kwer wi wà.
12 Tupàn uzapo purumupytuhegatu kar ma'e waipy wanenataromo
Ywytyr heta 'ymaw Zuwà her ma'e rehe Ezit ywy rehe a'e.
13 Uzaikaikaw yryhu.
Umuata kar Izaew izuapyapyr yryhu myteromo wà.
Upir 'y pàrirogaw aiha ma'e ài.
14 'Aromo wexak kar wanape ràm wanupe ywàkun pupe wiko pà.
Pyhaw wexak kar weko haw tata heny kwer pupe no.
15 Umuza'aza'ak itahu ywyxiguhu rehe no.
Wenuhem 'y ywy iwype har tetea'u teko wanupe wamui'u kar pà no.
16 Umuhem kar 'y itahu wi.
A'e 'y uwyryk yrykawhu ài.
 
17 Nezewe rehe we zaneipy uzapo wiwi ikatu 'ym ma'e oho waiko Tupàn ikutyr wà.
Upytu'u Ywate Wera'u Har ze'eg heruzar ire ywyxiguhu rehe wà.
18 Wagaw tuwe Tupàn wà.
Wenoz wemi'u ràm wemimutar izupe wà.
19 Uze'eg zemueteahy hehe wà.
— Aipo Tupàn upuner temi'u imur haw rehe zanewe ywyxiguhu rehe a'e.
20 Umuza'aza'ak itahu azeharomoete.
'Y uzypyrog tuwe yrykawhu ài uwyryk pà.
Aipo upuner typy'ak zanewe imur haw rehe a'e.
Aipo upuner ma'ero'okwer imur haw rehe wemiaihu wanupe, i'i wà.
21 Tupàn Tuweharupi Wiko Ma'e wikwahy a'e ma'e henu mehe a'e.
Uzàmàtyry'ym wemiaihu oho tata pupe wà.
Wanupe ikwahy haw uhua'u wera'u kury,
22 Ta'e nuzeruzar kwaw hehe wà xe.
— Nupuner kwaw zanepyro haw rehe nehe, i'i izupe wà.
 
23 Nezewe rehe we Tupàn uze'eg ywak rehe.
— Ewàpytymawok neruken nehe, i'i izupe.
24 Umur typy'ak ywate har wemiaihu wanupe.
Umu'ar kar temi'u mana her ma'e wanupe i'u kar pà.
25 Nezewe u'u Tupàn heko haw pe har watypy'ak wà.
Umur Tupàn temi'u tetea'u wanupe. Uhyk tuwe wanupe.
26 Na'e umur kar ywytu kwarahy hemaw wi ywak wi kury.
Upuner haw rupi umuhem kar ywytu kwarahy hemaw awyze har rehe har no.
27 Umu'ar wiràmiri tetea'u teko wanehe wà.
Wiràmiri nuzawy kwaw ywy imuku'i pyrer ywàkun romo uzeapo ma'e kwer, ta'e heta tetea'u a'e wà xe.
Waneta haw nuzawy kwaw ywyxig yryhu izywyr har waneta haw.
28 U'ar wiràmiri teko waker haw rehe wà,
Wanàpuzràn izywyr wà.
29 Na'e Izaew ipurumuzàmuzàg u'u wà.
Uhyk wanupe wà, ta'e Tupàn omono wanemimutar paw wanupe a'e xe.
30 Wamai'u mehe we,
Ihyk 'ym mehe we,
31 Wikwahy Tupàn wanupe.
Uzuka awa ikàg wera'u ma'e wà.
Uzuka kwàkwàmo Izaew wainuromo har ikatu wera'u ma'e wà.
 
32 Teko wexak a'e purumupytuhegatu kar ma'e paw wà.
Nezewe rehe we uzapo wiwi ikatu 'ym ma'e oho waiko wà.
Na'izeruzar wer kwaw Tupàn rehe wà.
33 A'e rupi umumaw wà.
Waneko haw nuzawy kwaw pytuhemaw.
Nuzawy kwaw iaiw ma'e na'arewahy uzeapo ma'e kwer.
34 Tupàn uzuka amo wà.
Na'e amo uzewyr izupe wà.
Uzemumikahy wemiapo kwer rehe wà.
Uze'eg Tupàn pe wemu'em 'ym pà wà.
35 Na'e ima'enukwaw Tupàn rehe wà. — Itahu zanemimaw zàwenugar romo hekon a'e, i'i wà.
— Tupàn Ywate Wera'u Har wiko zanepyro har romo a'e, i'i wà.
36 Waze'eg awer paw temu'emaw romo a'e wà.
Umume'u a'e ma'e paw Tupàn pe wemu'em pà wà.
37 Nuputar kwaw Tupàn upy'a pe azeharomoete wà.
Nuzapo kwaw ma'e uze'eg awer rupi katete wà. Kwehe mehe Tupàn uzapokatu a'e ze'egaw wanehe we a'e. Uzuhaw wà kury.
38 Nezewe rehe we Tupàn upuhareko wemiaihu wà.
Numumaw kwaw wà.
Umunàn wanemiapo kwer wanuwi uweharaz tà.
Tuweharupi umuakuir wekwahy haw a'e.
Umumaw wekwahy haw a'e.
39 Ima'enukwaw amo 'ar mehe umàno ma'e ràm romo waneko haw.
Nuzawy kwaw ywytu wà. Ywytu oho. Nuzewyr kwaw.
 
40 Teko upytu'u tetea'u Tupàn ze'eg heruzar ire ywyxiguhu rehe wà.
Umuzemumikahy kar tetea'u Tupàn a'e wà no.
41 Wagaw tetea'u wà.
Umuzemumikahy kar Izaew wazar ikatuahy ma'e wà no.
42 Heharaz ipuner haw uhua'u ma'e wi wà.
Upyro Tupàn a'e teko waàmàtyry'ymar wanuwi wà. Heharaz wapyro awer 'ar wi wà no.
43 Heharaz hemiapo kwer ikatuahy ma'e wi wà.
Heharaz purumupytuhegatu kar haw Zuwà ywytyr heta 'ymaw rehe Ezit ywy rehe iapo pyrer wi wà no.
44 Uzapo 'y yrykawhu pe har tuwykwer romo.
Nezewe mehe naheta kwaw 'y i'u pyr Ezit ywy rehe har wanupe.
45 Omono kar meru tetea'u wanupe waputupyk pà wà.
Zu'i tetea'u umuaiw wama'etymaw wà no.
46 Omono kar tukur tetea'u wanupe wà no.
U'u tukur arozràn ipo'o pyràm upaw rupi wà. Umuaiw ko pe hezuz ma'e paw wà.
47 Umumaw wanemitygwer uwà tyw àmàntàtà pupe.
Umumaw ma'ywa pi her ma'e tyw imuwixàgahy pà no.
48 Waneimaw tapi'ak a'e wà, àràpuhàràn hawitu ma'e a'e wà no, umàno paw rupi wà no.
Ta'e àmàntàtà ukyr wanehe xe. Àmàn uwerawerawahy wanehe no.
49 Umumaw a'e ma'e paw wikwahy haw rupi wà.
Wikwahy tuwe wamumaw mehe.
Omono ze'egaiw wanehe. Ikwahy haw ur màno haw herur har ài a'e.
50 Numuakuir kwaw wikwahy haw.
Nupyro kwaw màno haw wi wà.
Uzuka ma'eahy haw iaiw ma'e pupe wà.
51 Tàpuz nànàn Ezit ywy rehe
Tupàn uzuka wana'yr ipy paw wà.
 
52 A'e re wiko àràpuhàràn zàwenugar romo.
Weraha wemiaihu Izaew Ezit ywy wi wà.
Umuata kar ywyxiguhu rehe.
53 Numuzeapo kar kwaw ikatu 'ym ma'e wanupe waneraha mehe.
Hemiaihu nukyze kwaw ma'e wi wà.
Yryhu upyk waàmàtyry'ymar wazuka pà wà.
54 Tupàn weraha wemiaihu uiwy imonokatu pyrer pe.
A'e ae umuhem kar teko ywytyruhu wanuwi wà. A'e re weraha wemiaihu a'e ywytyruhu wanupe wà.
55 Umuhem kar a'e ywy rehe har a'e wi wà, wemiaihu wanenataromo wà.
Hemiaihu wixe a'e ywy rehe wà.
Uzaikaikaw a'e ywy ipegegwer wamono pà Izaew ta'yr wazuapyapyr wanupe.
Umuigo kar Izaew waàmàtyry'ymar wanàpuzgwer wapupe wà.
 
56 Nezewe rehe we Izaew upytu'u Tupàn Ywate Wera'u Har ze'eg heruzar ire wà.
Wagaw uzar wà.
Nuweruzar kwaw hemiapo karer wà.
57 Nuzawy kwaw uwipy wà. Nuzeruzar kwaw Tupàn rehe wà.
Nuweruzar kwaw ize'eg wà.
Aze ywyrapar na'ikatu kwaw, u'yw a'e ywyrapar wi imuhem kar pyr nuzywà kwaw ma'e. A'e teko wiko u'yw ma'ekutuk 'ym ma'e ài wà.
58 A'e teko umuikwahy kar Tupàn ma'ea'yr hapy haw iapo pà tupàn a'ua'u wanupe wà.
Umuwete katu tupàn a'ua'u a'e wà. A'e rupi Tupàn hewyrowyroahy wikwahy pà a'e.
59 A'e ma'e hexak mehe wikwahy Tupàn.
Utyryk tuwe wemiaihu wanuwi.
60 A'e 'ym mehe wiko tàpuzràn pupe wemiapo kwer teko wainuinuromo Xiro pe a'e.
Wikwahy mehe wezar wàpuzràn.
61 Weraha kar uze'eg imuapyk pyrer hyru wàmàtyry'ymar wanupe a'e.
Ize'eg hyru wexak kar ipuner haw ipuràg eteahy haw teko wanupe. — Peraha nehe, i'i wemiaihu waàmàtyry'ymar wanupe.
62 Wikwahy wemiaihu wanupe.
A'e rupi uzuka kar wemiaihu waàmàtyry'ymar wanupe wà.
63 Kwàkwàmogwer umàno zeàmàtyry'ymawhu pe wà.
A'e rupi naheta kwaw imen ràm kuzàwaza kwer wanupe wà.
64 Zauxiapekwer uzuka xaxeto utakihe puku pupe wà. Na'e zauxiapekwer uze'eg nezewe wanemireko kwer wanupe wà.
— Aze pezai'o pemener wamàno awer rehe nehe, uruzuka putar ure nehe no, i'i wanupe wà.
 
65 Na'e Tupàn Zanezar nuzawy kwaw uker ire ume'e ma'e.
Nuzawy kwaw awa ipuruzukaiw ma'e win pupe imuhaite pyrer a'e. Heiheihem a'e.
66 Umuzàn kar wàmàtyry'ymar wamono wà.
Weityk wà. Umumaranugar kar wà no. Imaranugar putar tuweharupi wà nehe.
67 Utyryk Zuze izuapyapyr wanuwi.
Nuexaexak kwaw Eparai izuapyapyr wà.
68 Nan kwaw nezewe. Wexaexak Zuta izuapyapyr wà.
Wexaexak ywytyr Xiàw wemiamutar.
69 Heta heko haw izupe ywate a'e. Uzapo tàpuzuhu ywy rehe har weko haw ywate har ài.
Umuàtà wàpuzuhu ywy ài.
Ni amo nuweityk pixik kwaw wà nehe.
 
70 Na'e Tupàn wexak wemiruze'eg Tawi.
Wenuhem pari àràpuhàràn hawitu ma'e wamono'ogaw wi.
71 Wiko àràpuhàràn rehe uzekaiw ma'e romo a'e 'ar mehe,
Umuigo kar Izaew wanuwihawete romo.
Nuzawy kwaw àràpuhàràn mono'ogar ài Tupàn wemiaihu wanupe.
72 Tawi uzekaiw katu wanehe.
Weruze'egatu uma'ekwaw katu haw rupi wà no.