1 O Tupàn Tuweharupi Wiko Ma'e, herenu pe heze'eg ihewe iwazar pà nehe,

Ta'e nahekàg kwaw ihe xe, ta'e naheta kwaw ma'e ihewe xe.

2 Hepyro pe hemàno haw wi nehe, ta'e azeruzar nerehe hepytu'u 'ym pà ihe xe.

Azeharomoete, hepyro pe nehe, ta'e aiko neremiruze'eg romo ihe xe,

Ta'e azeruzar nerehe ihe xe.

3 Ereiko hezar romo.

Hepuhareko pe nehe, hezar,

Ta'e amumaw 'ar katu newe heze'eg pà ihe xe.

4 O hezar, emurywete kar hepy'a nehe.

Aiko neremiruze'eg romo ihe, ta'e hema'enukwaw paw uzeupir newe xe.

5 O hezar, nekatuahy ne. Teko wanemiapo kwer ikatu 'ym ma'e imunànar romo ereiko.

Erezamutar katu newe uze'eg ma'e paw ne wà.

6 O Tupàn Tuweharupi Wiko Ma'e, herenu pe newe heze'eg mehe nehe.

Aze ahapukaz hepytywà àwàm henoz pà newe nehe, herenu pe nehe.

7 Ma'erahy ipuraraw mehe uruenoz ihe,

Ta'e erewazar heze'eg ihewe ne xe.

8 Naheta kwaw amo tupàn nezàwenugar wà, hezar.

Ni amo nupuner kwaw ikàg ma'e iapo haw rehe nezàwe wà.

9 Erezapo teko paw rupi ne wà. A'e paw ur putar wà nehe.

Uzeamumew putar nerenataromo wà nehe.

Umume'u putar nehua'u haw wà nehe,

10 Ta'e nehua'u ne xe.

Nekàg no.

Xo ne zo ereiko Tupàn romo.

11 O Tupàn Tuweharupi Wiko Ma'e, hemu'e pe heremiapo ràm rehe nehe.

A'e mehe ureruzar putar azeharomoete ihe nehe.

Hemu'e pe neremiruze'eg ikatu ma'e romo hereko haw rehe nehe.

12 Hezar, Tupàn, amume'u putar nekatu haw wahy haw rupi nehe.

Tuweharupi amume'u putar nehua'u haw nehe no.

13 Heamutar katu pe ne.

Uhua'u heamutar katu haw.

Hepyro pe hemàno haw wi hetym àwàm ohoete ma'e wi ne.

14 O Tupàn, teko amo wanuwi wiko wera'u ma'e heàmàtyry'ym waiko wà.

Teko purupe ma'erahy ipuraraw kar har wà,

Nerehe uzekaiw 'ym ma'e wà, ipuruzuka wer herehe wà.

15 Ne, hezar, ereiko Tupàn purupuhareko ma'e romo puruamutar katu ma'e romo ne.

Iàrew purehe nezepykaw. Nekatuahy. Neretyryk kwaw neremiruze'eg wanuwi.

16 Eme'e wi herehe nehe. Hepuhareko pe nehe.

Emur nekàgaw ihewe hepyro pà nehe, ta'e aiko neremiruze'eg romo ihe xe.

Aiko hehy zàwe.

A'e wiko neremiruze'eg romo a'e no.

17 O Tupàn Tuweharupi Wiko Ma'e, ezapo ma'e ihewe nekatu haw hexak kar pà ihewe nehe.

Nezewe mehe herehe iakatuwawahy 'ym ma'e wexak putar hepytywà arer romo nereko haw wà nehe, wexak putar hemurywete kar arer romo nereko haw wà nehe no.

Hexak mehe imaranugar putar wà nehe.