95
Zegar haw Tupàn ikatu haw imume'u haw
Pezur pe paw rupi ty wà. Ximume'u Tupàn Tuweharupi Wiko Ma'e ikatu haw nehe.
Zazegar zanerurywete haw rupi Tupàn itahu zanemimar zàwenugar pe nehe. Zanepyro a'e.
Zaha henataromo hemimur kwer ikatu haw imume'u pà nehe.
Ximuzàg zegar haw ikatu haw rehe har nehe,
ta'e Tuweharupi Wiko Ma'e wiko Tupàn ikàg ma'e romo a'e xe.
Wiko tuwihawete romo amogwer tupàn wanuwi upuner wera'u ma'e romo a'e.
Wiko ywy rehe har paw wazar romo.
Ywykwar oho etea'u ma'e izar romo hekon, ywytyruhu iaiha wera'u ma'e izar romo hekon no.
Wiko wemiapo kwer yryhu izar romo.
Wemiapo kwer ywy izar romo hekon no.
 
Pezur nehe. Peapyk pepenàràg rehe Tupàn Tuweharupi Wiko Ma'e imuwete katu pà nehe.
Zapyk zanepenàràg rehe zaneapo arer henataromo nehe.
Wiko Tupàn Zanezar romo a'e.
Zaiko hemiaihu hemiruze'eg romo zane.
Zaiko heimaw àràpuhàràn ài izupe. Uzekaiw zanerehe.
 
Peinu katu ize'eg kutàri kury.
— Peiko zo hereruzar katu har 'ym romo nehe.
Kwehe mehe peipy wiko hereruzar katu har 'ym romo Merima pe wà. Peiko zo wazàwe nehe.
Maxa ywy rehe ywyxiguhu rehe waneko mehe nuweruzar kwaw heze'eg wà. — Zeàmàtyry'ymaw, i'i Merima zaneze'eg rupi. — Puragaw paw, i'i Maxa zaneze'eg rupi.
Heragaw a'e pe wà. Nuzapo kwaw heremimutar wà.
Azapo ikatu ma'e tetea'u wanupe ihe. Nezewe rehe we nahereruzar kwaw wà.
10 A'e teko umumaw 40 kwarahy hemuikwahy kar pà wà.
A'e rupi aze'eg nezewe wanupe. — Teko hereruzar 'ymar wà.
Na'ipureruzar wer kwaw heze'eg rehe wà, a'e wanupe.
11 Aikwahy a'e mehe ihe. A'e rupi amume'uahy ko ma'e wanupe.
— Napeixe pixik kwaw ywy heremimume'u kwer rehe nehe.
Napepytu'u pixik kwaw a'e pe hepyr nehe, a'e wanupe.