1 Azamutar katu Tupàn Tuweharupi Wiko Ma'e ihe,

Ta'e herenu a'e xe.

Wenu uzeupe heze'eg mehe a'e.

2 Herenu a'e.

Hepytywà àwàm henoz taw nànàn herenu a'e.

3 Màno haw nuzawy kwaw heàmàtyry'ymar a'e wà. Heàmàtyry'ymar ipuruàpixipixi wer herehe kyhàhàm pupe wà.

Amàno etea'i ihe. Iaiw haw tywypaw pe har hemukyze wera'u kar a'e.

Akyzeahy tuwe ihe. Azemumikahy azeharomoete no.

4 Na'e aze'eg Tupàn Tuweharupi Wiko Ma'e pe ma'e henoz tà.

— Aze ikatu newe nehe, hepyro pe hemàno haw wi nehe,

O Tupàn Tuweharupi Wiko Ma'e, a'e izupe.

5 Tupàn Tuweharupi Wiko Ma'e ikatuahy purupe a'e. Nupuir kwaw wemiaihu wanuwi a'e.

Zanezar zanepuhareko a'e.

6 Aze teko nupuner kwaw wàmàtyry'ymar wanuwi uzepyro haw rehe wà, Tupàn Tuweharupi Wiko Ma'e uzekaiw katu a'e teko wanehe a'e.

Ikatu 'ym ma'e ihewe izeapo tària'i mehe hepyro a'e.

7 Ezeruzar wiwi Tupàn Tuweharupi Wiko Ma'e rehe nehe, a'e hezeupe,

Ta'e ikatuahy ihewe tuweharupi a'e xe.

8 Hepyro Tupàn hemàno haw wi.

Hemupytu'u kar hezai'o re.

Hepyro iaiw haw ihewe uzeapo ma'e wi a'e.

9 A'e rupi ata teko ywy wikuwe ma'e hereko har rehe ihe.

Tuweharupi azapo Tupàn Tuweharupi Wiko Ma'e hemimutar aha iteko ihe.

10 — Hezuhazuhaw azeharomoete a'e wà, a'e hezeupe.

Nezewe rehe we napytu'u kwaw hezeruzar ire.

11 Akyze ihe, a'e rupi aze'eg nezewe.

— Teko nupuner kwaw ni amo teko wanehe uzeruzar haw rehe wà, a'e ihe.

Nezewe rehe we napytu'u kwaw Tupàn rehe hezeruzar ire.

12 Ma'e apuner Tupàn Tuweharupi Wiko Ma'e pe imono haw rehe

Ihewe hemimur kwer paw hekuzaromo ihe.

13 Araha putar win Tupàn Tuweharupi Wiko Ma'e pe imono pyràm romo nehe,

Ta'e herurywete hepyro awer rehe ihe xe.

14 — Hemiaihu paw wazemono'og mehe

Amono putar heremimume'u kwer izupe ihe nehe.

15 Tupàn Tuweharupi Wiko Ma'e uzemumikahy a'e,

Aze amo hemiaihu umàno a'e.

16 O Tupàn Tuweharupi Wiko Ma'e, aiko neremiruze'eg romo ihe.

Hehy weruzar neze'eg wikuwe mehe a'e. Aruzar neze'eg izàwegatete ihe no.

Hepyro pe hemàno haw wi ne.

17 Amono putar ma'e newe nehe, ta'e herurywete neremiapo kwer rehe ihe xe.

Aze'eg putar newe nehe.

18-19 Neremiaihu paw wazemono'og mehe,

Neràpuzuhu izywyr katu haw pe Zeruzarez pe wazemono'og mehe nehe,

Amono putar heremimume'u kwer newe nehe.

Pemume'u Tupàn Tuweharupi Wiko Ma'e ikatu haw nehe.