1 Aze Tupàn Tuweharupi Wiko Ma'e nuzapo kwaw tàpuz,

Iapo har uma'ereko e iapo mehe wà.

Aze Tuweharupi Wiko Ma'e nuzekaiw kwaw tawhu rehe,

Zauxiapekwer ume'e e hehe uzekaiw mehe wà.

2 Aze amo uma'ereko tetea'u wemi'u ràm imono'og pà,

Aze upu'àm izi'itahy, aze u'aw wi oho xo pyaze mehe, uma'ereko e a'e.

Ta'e Tupàn omono temi'u wemiamutar katu wanupe a'e xe.

Te waker mehe Tupàn uzapo ikatu ma'e wemiaihu pe.

3 Zanera'yr a'e wà, wiko Tupàn Tuweharupi Wiko Ma'e hemimur kwer romo a'e wà.

Ze'egatu haw romo wanekon wà.

4 Aze ta'yr uzexak kar awa pe ipyahu mehe we wà,

A'e ta'yr nuzawy kwaw u'yw zauxiapekwer ipo pe har wà.

5 Hurywete awa agwer u'yw tetea'u wanereko har a'e.

Iàmàtyry'ymar nuweityk kwaw wà nehe,

Tuwihaw wanenataromo waneko mehe wà nehe.