148
Teko ywy nànànar wà, ma'e upaw rupi no, umume'u Tupàn ikatu haw izupe wà
Pemume'u Tupàn Tuweharupi Wiko Ma'e ikatu haw nehe.
 
Ywak rehe har paw wà,
Pemume'u Tuweharupi Wiko Ma'e ikatu haw ywate nehe.
Pe Tupàn Tuweharupi Wiko Ma'e heko haw pe har paw pe wà, pemume'u ikatu haw nehe.
Pe zauxiapekwer zàwenugar ywate har paw pe wà, pemume'u ikatu haw nehe.
Kwarahy, zahy. Pemume'u Tuweharupi Wiko Ma'e ikatu haw nehe.
Zahytata heny katu ma'e paw, pemume'u Tupàn ikatu haw nehe.
Tuwe ywak ywate har umume'u ikatu haw nehe.
Tuwe 'y ywak i'aromo har umume'u ikatu haw nehe.
 
Tuwe a'e paw umume'u Tupàn Tuweharupi Wiko Ma'e ikatu haw wà nehe,
Ta'e uze'eg waapo pà a'e xe.
Umume'u wanen àwàm. Upyta tuweharupi wenaw rehe wà.
Nupuner kwaw heruzar 'ymaw rehe wà.
Pemume'u Tupàn Tuweharupi Wiko Ma'e ikatu haw nehe, ywy rehe har paw wà.
Pemume'u Tupàn Tuweharupi Wiko Ma'e ikatu haw nehe, miar yryhu pe har uhua'u ma'e wà, yryhu ohoete haw no.
Àmàn iweraw paw, àmànita, àmànxig huwixàg ma'e, ywàkun, ywytuaiw.
Peiko Tupàn ze'eg heruzar har romo. Pemume'u Tupàn Tuweharupi Wiko Ma'e ikatu haw nehe.
Ywytyr wà, ywytyruhu wà,
Ka'ahu wà, ma'ywa'yw wà no, pemume'u Tupàn Tuweharupi Wiko Ma'e ikatu haw nehe.
10 Ma'ea'yr teko waneimaw wà, miar hehaite ma'e wà no, pemume'u Tupàn Tuweharupi Wiko Ma'e ikatu haw nehe.
Wiràmiri wà, ma'e wie rehe ywy rehe wata ma'e wà, pemume'u Tupàn Tuweharupi Wiko Ma'e ikatu haw nehe.
 
11 Tuwihawete wà, teko ywy nànànar wà no,
Tuwihaw paw wà,
Tàmuzgwer paw wà no, pemume'u Tupàn Tuweharupi Wiko Ma'e ikatu haw nehe.
12 Kwàkwàmo wà, kuzàwaza wà, awa tua'uhez ma'e wà, kuzà ihya'uhez ma'e wà,
Kwarearer wà, kuzàtàigwer wà, pemume'u Tupàn Tuweharupi Wiko Ma'e ikatu haw nehe.
13 Tuwe umume'u Tupàn Tuweharupi Wiko Ma'e ikatu haw upaw rupi wà nehe,
Ta'e ikàg wera'u amo wanuwi a'e xe.
Ikàgaw a'e, ipuràg eteahy haw a'e no, ywy 'ar amo ywak 'aromo hin a'e wà.
14 Umukàg kar teko wemiaihu wà.
A'e rupi hemiruze'eg izuwi upuir 'y ma'e paw umume'u ikatu haw wà.
Teko Izaew izuapyapyr Tupàn hemiamutar katu wà, umume'u putar ikatu haw wà nehe.
 
Pemume'u Tupàn Tuweharupi Wiko Ma'e ikatu haw nehe.