5
Àràpuhàràna'yr zàwenugar uwàpytymawok pape a'e kury
Na'e aexak amo pape ihe kury. A'e tuwihaw henaw rehe har upyhyk a'e pape opo awyze har pupe. Heta tetea'u ze'eg ikaikair pyrer a'e pape rehe a'e. Heta 7 hewàpytymaw hehe a'e wà no. (A'e rupi ni amo nupuner kwaw imugeta haw rehe a'e wà.) Na'e aexak amo Tupàn heko haw pe har ikàg ma'e ihe kury. Uze'eg wahy haw rupi a'e. — Mo upuner ko pape hewàpytymawokaw rehe a'e, mo ikatu wera'u amogwer paw wanuwi a'e, i'i.
Wekar pape hewàpytymawok àràm oho. Wekar ywak rehe. Nuexak kwaw amo. Wekar ywy rehe no. Nuexak kwaw. Ni amo nupuner kwaw a'e pape hewàpytymawokaw rehe a'e wà. Na'e azai'o ihe kury, ta'e nuexak kwaw a'e pape hewàpytymawok àràm a'e xe. Ni amo nupuner kwaw a'e pape imugeta haw rehe a'e wà. Na'e amo tuwihaw i'i ihewe a'e kury. — Ezai'o zo ty, i'i ihewe. — Eme'e nehe ty. Zawaruhu zàwenugar a'e, Zuta hemimino a'e, Tuwihaw Tawi hemimino a'e no, ikàg wera'u amogwer wanuwi paw rupi katete a'e. A'e rupi upuner a'e pape hewàpytymawokaw rehe a'e nehe, upuner imugeta haw rehe a'e nehe, i'i a'e tuwihaw ihewe.
Na'e aexak Àràpuhàràna'yr zàwenugar a'e pe i'àz mehe ihe kury. Tuwihaw henaw mytepe i'àz a'e. A'e 4 wikuwe ma'e a'e wà no, a'e pe huwake wanekon a'e wà no. Tuwihaw a'e wà no, huwake wanekon a'e wà no. Tuwihaw henaw rehe har a'e, Àràpuhàràna'yr izuka pyrer ài hekon a'e. 7 i'ak wà. 7 heha wà no. A'e 7 heha a'e wà, Tupàn Hekwe ywy nànàn imono kar pyrer ài wanekon a'e wà. Na'e Àràpuhàràna'yr zàwenugar a'e kury, oho tuwihaw henaw rehe har ipyr a'e kury. Upyhyk a'e pape heruwà izuwi kury, ipo awyze har wi kury. A'e 'ar mehe we a'e 4 wikuwe ma'e a'e wà, a'e 24 tuwihaw a'e wà no, uzeamumew ukwaw pà Àràpuhàràna'yr zàwenugar huwa rupi a'e wà kury. Pitàitàigatu wereko uxi'àm opo pe wà. Pitàitàigatu wereko kawaw hekuzar katu ma'e wà no. Tynehem wakawaw yhyk pupe. Tupàn hemiruze'eg uze'eg izupe a'e wà. Waze'eg nuzawy kwaw a'e yhyk izupe a'e. Na'e umuzàg amo ae zegar haw ipyahu ma'e a'e pe a'e wà kury.
 
Ne zutyka'i ne,
Erepuner a'e pape ipyhykaw rehe ne,
Erepuner hewàpytymawokaw rehe ne.
Ta'e nezuka a'e wà xe.
Nemàno haw rupi eremekuzar teko
Tupàn pe ne wà, wapyro pà ne wà.
Erepyro amo tenetehar ne wà.
Erepyro amo àwà ne wà no,
Erepyro amo karaiw ne wà no.
Nezewegatete erepyro teko tetea'u ne wà no.
Erepyro amo ze'egete rupi uze'eg ma'e ne wà.
Erepyro amo àwà ze'eg rupi uze'eg ma'e ne wà no.
Erepyro amo karaiw ze'eg rupi uze'eg ma'e ne wà no.
Nezewegatete erepyro amo ae ze'eg rupi uze'eg ma'e tetea'u ne wà no.
— Erepyro amo ko ywy rehe har ne wà.
Erepyro amo amo ae ywy rehe har ne wà no.
Nezewegatete erepyro ywy nànàgatu har tetea'u ne wà no.
— Erepyro amo pàrànà ne wà.
Erepyro amo izu ma'e ne wà no,
Erepyro amo ipihun wewer ma'e ne wà no.
Nezewegatete erepyro teko hexakaw uzuawyawy ma'e tetea'u ne wà no.
 
10 A'e teko paw eremuigo kar Tupàn hemiruze'eg romo ne wà,
Xaxeto ài wamuigo kar pà ne wà.
A'e rupi uzapo putar ikatuahy ma'e Tupàn pe a'e wà nehe,
Izupe uma'ereko pà a'e wà nehe no.
Wiko putar ywy rehe har wanuwihaw romo wà nehe no, i'i izupe wà.
 
11 Na'e ame'e wi hehe ihe no. Aenu Tupàn heko haw pe har waze'eg mehe. Heta tetea'u a'e pe wà. Tuwihaw henaw huwake i'àz wà. A'e 4 wikuwe ma'e a'e wà, a'e tuwihaw a'e wà no, upu'àm a'e pe a'e wà. 12 Uzegar wahyhaw rupi wà.
 
Àràpuhàràna'yr izuka pyrer zàwenugar a'e,
Ikatuahy a'e.
A'e rupi Zanezar romo hekon a'e.
Hemetarer katu ma'e romo hekon a'e.
Ukwaw katu ma'e paw rupi katete.
Ikàg wera'u.
Ximume'u ikatu haw izupe nehe.
Ikàg wera'u, ipuràg eteahy wera'u no.
Ximume'u ikàgaw ipuràg eteahy haw izupe nehe, teko nànàn nehe no.
 
13 Na'e ma'e ywak rehe har paw rupi a'e wà, ywy rehe har paw rupi a'e wà no, 'y pe har paw rupi a'e wà no, uzegar waiko a'e wà kury. Aenu wazegar mehe ihe.
Zazegar zaiko kury,
Tuwihaw henaw rehe har pe kury,
Àràpuhàràna'yr zàwenugar pe kury.
Ximume'u ikatu haw izupe nehe
Ximume'u ikàgaw izupe nehe
Ximume'u ipuràgaw izupe nehe
Tuweharupi nehe,
Awyze har rupi nehe, i'i waiko izupe wà, uzegar pà wà.
 
14 Na'e a'e 4 wikuwe ma'e a'e wà no, uze'eg wanupe a'e wà no. — Azeharomoete, i'i wanupe wà. Na'e tuwihaw a'e wà kury, uzeamumew ukwaw pà upenàràg rehe wapyk pà a'e wà kury, Àràpuhàràna'yr zàwenugar imuwete katu pà a'e wà kury, Tupàn imuwete katu pà a'e wà kury.