10
Tupàn umume'u wemiaihu wapyro àwàm a'e
1 — Emugyr kar àmàn i'ar rehe nehe, haku haw 'ar ihem 'ym mehe we nehe, peze Tupàn Tuweharupi Wiko Ma'e pe nehe. Ta'e a'e ae umur kar ywàkun a'e xe. Ta'e a'e ae umugyr kar àmàn a'e xe. Nezewe umuezuz katu kar ma'e ko pe. A'e rupi heta putar ma'e ipo'o pyràm penemi'u ràm peme nehe. 2 Pepuranu zo tupàn a'ua'u wanehe nehe. Pepuranu zo tekwe ikatu 'ym ma'e wanupe uze'eg ma'e wanehe nehe. Ta'e xo iranaiw ma'e zo umume'u a'e wà xe. Ta'e hemu'em a'e wà xe. Pepuahu awer imume'u har wiko hemu'em ma'e romo wà. Umume'u e wemu'emaw pemurywete kar pà wà. A'e rupi teko wata e oho àwàm ikwaw katu 'ym pà wà. Nuzawy kwaw àràpuhàràn omono'ogar hereko 'ymar wà.
3 Uze'eg Tupàn Tuweharupi Wiko Ma'e kury. — Amo awa amo ae ywy rehe har wiko heremiaihu wanuwihaw romo wà. Aikwahy wanupe ihe. Azepykahy putar wanehe nehe. Ihe Tupàn Ikàg Wera'u Ma'e azekaiw putar heremiaihu Zuta ywy rehe har wanehe hereimaw ài nehe. Amuigo kar putar hereimaw kawaru zeàmàtyry'ymawhu rehe har ikàg ma'e zàwenugar romo ihe wà nehe. 4 Heremiaihu wanuwihaw ràm paw wà nehe, zauxiapekwer heremiruze'eg wanuwihaw ràm paw wà nehe no, heremiaihu waneruze'egar ràm paw wà nehe no, wiko putar a'e parer romo wà nehe. 5 Uzemono'ono'og putar wàmàtyry'ymar wamumaw pà wà nehe. Amo zauxiapekwer upyrog wàmàtyry'ymar wanehe pe rupi to'om inuromo wà. A'e tuwihaw wiko putar agwer zauxiapekwer wazàwe wà nehe. Uzàmàtyry'ym putar wà nehe, ta'e ihe Tupàn Tuweharupi Wiko Ma'e aiko putar wanehe we ihe nehe xe. Te wàmàtyry'ymar kawaru ku'az har weityk putar wà nehe.
6 Uze'eg wi Tupàn Tuweharupi Wiko Ma'e.
— Amono putar hekàgaw teko Zuta ywy rehe har wanupe nehe.
Apyro putar teko Izaew ywy rehe har wà nehe.
Apuhareko katu ihe wà.
Arur wi putar wamunehew pawer wi ihe wà nehe.
Wiko putar heremityk pixik 'ym kwer ài wà nehe.
Ta'e aiko Tupàn Tuweharupi Wiko Ma'e romo wazar romo ihe xe.
Aenu ihewe waze'eg mehe ihe wà.
7 Awakwer Izaew rehe har ikàg putar zauxiapekwer wazàwe wà nehe.
Hurywete putar win i'u har ài wà nehe no.
Wazuapyapyr wenu putar a'e ma'e imume'u haw wà nehe. A'e mehe ikatu putar wanupe nehe.
Hurywete putar wà nehe, heremiapo kwer rehe wà nehe.
Ihe Tupàn Tuweharupi Wiko Ma'e azapo a'e ma'e ihe.
8 Aenoz putar heremiaihu ihe wà nehe. Amono'og putar ihe wà nehe.
Arur wi putar waiwy pe wà nehe.
Waneta àwàm nuzawy kwaw waneta awer nehe.
9 Amuhàmuhàz ywy muite har nànàn kwehe mehe ihe wà.
Nezewe rehe we naheharaz kwaw ihewi wà.
Wikuwe wà. Wana'yr wikuwe wà no.
Uzewyr wi putar uiwy pe wà nehe.
10 Amuzewyr kar putar Ezit ywy wi ihe wà nehe, Axir ywy wi ihe wà nehe no.
Araha putar Zireaz ywy rehe wà nehe, Irimano ywy rehe wà nehe no.
Heta tetea'u putar wà nehe. Nuhyk kwaw ywy a'e teko paw wanupe nehe.
11 Wahaw putar Yryhupiràg oho wà nehe.
Ihe Tupàn Tuweharupi Wiko Ma'e arukwar putar ykotok rehe nehe.
Amuxinig kar putar 'y Niru yrykawhu pe har nehe.
Azuhazuhaw putar Axir wakàgaw nehe.
Amumaw putar Ezit wapuner haw nehe no.
12 Amono putar hekàgaw heremiaihu wanupe nehe.
Wiko putar hepuner haw rehe wà nehe.
Ihe Tupàn Tuweharupi Wiko Ma'e aze'eg kwez kury.