De Letta Ta De Hebrew Dem
1
Now God Taak ta we Shru e Son
1 Way back, plenty time an een plenty diffunt way, God beena taak ta we ole people shru de prophet dem. 2 Bot now wen de end time da come, God taak ta we shru e Son. An shru e Son, God mek de wol, an e pass ebryting ta e Son. 3 God Son, e de light wa da show we de bright glory ob God. Wen oona see de Son, oona da see God, cause de Son jes de same as God. An de Son wod wa got powa fa true, da mek all ting stay jes like dey spose fa stay. An atta de Son done dead fa people sin, fa mek um clean een God eye, e gone ta heaben an seddown ta de right han side ob God, wa got mo powa den all.
God Son Way Mo High Op Den de Angel Dem
4 God mek e Son way mo high op den de angel dem, jes like de name wa God gim, dat way mo betta den dey name. 5 Cause God ain neba tell none ob e angel dem say,
“Ya me Son.
Taday A done come fa be ya Fada.”
An God ain neba taak bout no angel say,
“A gwine be e Fada,
an e gwine be me Son.”
6 An wen God been bout fa sen e fusbon Son eenta de wol, God say too,
“Leh all God angel woshup me Son.”
7 Wen God taak bout de angel dem, e say,
“A mek de angel dem, wa da saab me, like de wind,
an like fire wa da blaze op.”
8 Bot wen God taak bout e Son, e say,
“O God, ya gwine rule faeba an eba!
An ya da rule de right way fa true.
9 Ya lob wa right an ya hate wa ain right.
Dat wa mek God, ya God,
pick ya an naint ya wid de oll ob joy,
da hona ya mo den all dem wa dey wid ya.”
10 God taak gin, say,
“Lawd, een dat time wen nottin ain been dey yet,
ya de one wa mek de wol.
An wid ya own han ya mek de sky
an all wa dey yah.
11 All dem gwine come ta a end,
bot ya gwine keep on dey dey.
All dem da grow ole an gwine weah out
same like we cloes weah out.
12 Ya gwine fole um op jes like we fole op we coat.
Dey gwine git change op like we change we ole cloes fa nyew one.
Bot ya ain neba change eben a leetle bit,
an ya ain neba gwine grow ole an dead.”
13 God ain neba tell none ob e angel dem say,
“Seddown yah ta me right han side,
til A pit ya enemy dem ondaneet ya foot.”
14 So den, all de angel dem, dey good sperit wa da saab God. God da sen um fa hep dem wa God gwine sabe.