2
Tiuswei misaamera
1 Inchawei treeg købene, chigurrimbunø kailan køben, katø chine may wamincha isiilan køben, ka palatø tab indiilan køben, mendaigwan chigurrin køben pusrkwai asiilan køben, chigurrimbunø wam kusrub indiilan køben elatsay. 2 Kan srø kal-laig ureezheelø pitsø muchig kuinchib lataitøwei, tru Tiusweimburabig pitsø chi peeba lindisaimíig lataigwan ñimbe ke chindamdø kui inchib lay, truikkurri nørrørawa, kaigyugurri wesraig kømigwan tøgagønrrab. 3 Kaguende ñimbe yandø Señorwane purø tabig kuin kui tsabø ashibelø køn.
Cristobe tru ya marøbelø pølbasrtrab katsigu wayi srug lataig
4 Ñimbe Señorwan kemalay, tru Øsig Srugwan. Truigwane misaamera kaashippe, kaasig købendø, Tiusweimbe lawa wesruig, purø tab sruuzhig køn. 5 Inchawei ñim øsig sruumera Tiuswei yayu ñimgucha marøb kusrunrrain kuy, sacerdotesmera Tiusweindø tarømariilø kua, Tiusweimburab maramigu keta tranøb pønrramig kønrrai, Jesucristogurri Tiusweyasig chull indamdeelø. 6 Inchawei Tiuswei wamwan pørigube trenchibig køn:
“Sionsrø kan srug trarrar cha.
Truibe katsigu pølbasrtrab wayi srug,
lawa wesruig, purø tabzhig køn cha.
Trunundø isua pasramisrøbiibe
køriimisra kørrømisrtraamøn” cha.
7 Ñim nundø kørebelaimbe tru sruube purø nuig tabig køn. Inchen tru nundø køremeelaimburappe Tiuswei wamwan pøriiløyu øyah taibe nebun:
“Tru ya marøbelø kaasig sruube
niga pasrønrrai katsigu pølbasrtrab
wayig srukken misrig køn” taig.
8 Katø øyeekkucha chibig køn:
“Kan srug srurrengwangarumba,
katø penøsrkamba inchib srug køn” taig.
Pøs nømbe Tiuswei wamwan maig taigwan mørmeeløgurri srurrengwan. Nømune trendø øyeeg nebuig melønrrai marig købig køn.
9 Trune ñimbe Tius lawa wesruig misaamera, reywei sacerdotesmera, newan tab misag purø nørrø, Tius tru nui truba tabig mariilan eshkab misaamera kønrrai mariilø køn, tru ñimun purø løstøyugurri nui purø tørigu pønrramig kønrrai wamabigweiwan. 10 Ñimbe merrappe Tiuswei misaamera kømuig køn. Trune møimbe si, nui misaamera køn. Merrappe ñimbe Tiuswei lastima asigwan utønrrab kaima kuig, møimbe lastima asigwan yandø ñimbe nebua uta pønrran.
Tiuswei karuig melabeløsun amønay
11 Nai undaarailø, yu piraube kan peg pirausrøngurri ka petø amrruatø latailan ñimun waminchar, ñimui møsigwan kwayab pasrabig tru ñimui asru kaig marøg købig arrubigwan tiusmanda marmøtay cha. 12 Judíos kømø misaamera Tiuswan ashmeelai utube nømguen ñimun asha kusrenrrai amønay, ñimune ke larrø kailø kui lataig wamindindøgucha, ñim tabig mariilan ashabe, mayeelan maig mariilan Tius payib kwaløm truiløbe Tiuswan truba tabig waminchai.
Misagwan asha karub purrabelan møramig
13 Ashib karub purrønrrai møguelø purrønniilane nøm maig chiben møray, namui Señorweyasig. Tru maya misagwan ashib karub wabig, reywan lata, 14 katø kubenadurmeran lata, kaguen truiløbe kailane mørøsrkøb, katø sølgandø marøbelane nømdøwei tabig waminchai Tius øriilø kuimba, treetøwei nømune møramig køn. 15 Kaguende Tiusbe ñimune sølgandø martraiwei isun. Trumay marene, tru chugúinguen mørmubendø waminchibelø chinetø wamindiilane ñimbe mu mandamgaig kasra pønsrønrrun.
16 Ñimbe amøñippe, chi iløsrkøbig chigaig ñimuimburab amøñibeløsun amønay. Inchendø ‘chi iløsrkaimíig namuimburab amøñibelø ker’ chiptø, trunune kaig maramigweyasig merrarrawa, marøb kømumig køn. Treeg kømøtø, Tiuswei maramigu marøb melabelø latailø tab isua amønay. 17 Mundøgucha maig købash inchimø, tab indamigwan treeg tab inchib, nunelan undaarab, Tiuswane køriibala amøñib inday. Katø tru reywan chigucha maig købash inchimub tab indamig køn.
Cristo maig købash indinab megaigwan nam asha kusrenrrai kørrømarig
18 Karuindiig melabelø, ñimun karub pera købelane maig købendø inchimø, køriibala møramig køn. Tabelø chinchimeelandø kømøtø, martrain chippe, ke kandø kandø wamabelan chigucha treetøwei møramig køn. 19 Kaguende øyeebe tabig køn, møigwan køben isumdiig arruben treegu ka awentab, chi kaig marmubendø, maig købash puinab megamig kuindøgucha Tiuswan isua pasrabig kuikkurri. 20 Inchen ñimun chigøben kaig marikkurri ichabetøbene, ñim tammay ka melaptø melaindøgucha, ¿ñim treeg melaigwane Tiusbe chincha tabig kui ashchab kø? Inchen ñim sølgandø marikkurri maig købash indinab tammay melaptø melaibe, treebeguendø Tiusweimbe truba tabig køn. 21 Tiusbe ñimun wamappe, øyeeg nebunrraiwei wamig køn. Kaguende Cristogucha ñimuyasig truba kaig indinab megaig købig køn. Nøma maig uñibig køben, ñim treetøwei asha kusrenrrain kuig køn, ñim truwandøwei amøñibelø kønrrai.
22 “Nøma chigucha chi kaig marmøwei,
ni mana kwaløm mungucha may wamincha isømøwei inchibig køn.”
23 Chigøben tsalø wamab trømbøig wamøbene, Cristobe treetøwei løtømuig køn. Nun chigøben truba isumdiig maringucha, nøgucha ‘chigøben maramønrrun’ chimøtø, maig kønrrabigwan Tius sølgandø asha marøbigwan nø asha martraim pasrøbig køn. 24 Namui kaig mariilane Cristo nøtøwei nui asru niga yaig køn, kurusyu mesrøb uras, kaig maramigweimburappe nambe yandø kwailø latailø kørrømisra, sølgandø tabig amønamigu øsiguelø kønrrai. Ñimbe Cristoi kørriindiiløtøga tamariilø kuig køn. 25 Kaguende ñimbe merrabsrømbe kan ubishamera pella, nøørøtø amøñib latailø kuig, møimbe katøle Ubisha Ashibigweimay amrruin køn, tru ñimui møsiimeran chu uragucha chinchimønrrai Ashibigweimay.