3
Sardis iglesian wam ørøb
’Katø Sardis iglesiai ángelwan iigwan pør:
Tru Tiuswei siete espíritumeranba, siete estrellameranba tøgaibe øyah tan cha: Nabe ñui mariilan ashar cha. Ñibe øsiguig køn chib waminabig købendø, kwaig køn. ¡Kiagasrø! Chiwan køben ke pinamitø palab pønrrabelane tamar. Kaguende nai Tiuswein kabyu ñui mariiløbe newan tabig kømui ashar. Inchawei kusrenaniilan ñi møra utigwane møra marøb, ñui kaig mariilan isua møra, Tiusweimay llirab inchi. Ñi kiagasrømuisruandøbe, kan niliig lataig nabe ñuimay arrumønrrun, ñi chu ura attrab kuinguen mørmøwatø.
Inchen køben misaamera Sardissrø kan mamdø køn nømui kewagúilan chillig incha kømeelø. Truiløbe naba amøñinrrun puløzheelan kewar, kaguende nømbe øyeegwanwei kenrrabelø køn. Maig kuindøgucha truyu pureb ibiibe puløzheelø kenanig kønrrun. Incha nabe managatig øsig purrønrrabelai munchimeran pørig libroyugurri nui munchiwan kerramumønrrun. Incha nabe nai Møskawei merrappa, nui ángelesmerai merrappa, øibe nain køn cha, nui munchiwan eshkamønrrun. Kalubaibe mør Espíritu iglesiameran wamindigwan.
Filadelfia iglesian wam ørøb
’Katø Filadelfia iglesiai ángelwan iigwan pør:
Tru Newan Tabig, Newan Ciertonig, tru rey Davidwei llaviwan sruaig, tru nø kurene, mugucha kasrønrrab kaimab, katø nø kasrøbene, mugucha kurtrab kaimab inchai marøbiibe, øyah tan cha: Ñi chi mariilan kerrigu nabe ashar cha. Au, nabe ñui merrab kan yaskab kura pasrar, truigwane mugucha kasramgaig. Ke trengatig nebua marøppe, marmubendø, nai wamwan møra marøb, ñibe nai munchiwan ‘ashmíig kur’ chib isømøn. Au, nabe Satanáswei tulundzuni yauelø ‘Judíosmera ker’ chibendø, judíos kømeelø, ka isatø inchibelan, ñui merrab tømbønsrønrrai indamønrrun. Incha nabe ñune undaguig kui nebua ashchun. 10 Kaguende na karuilan tammay marøbig marøb megaikkurri nagucha ñun asamønrrun chi kømønrrai pirau muba kuimburab warab misaameran maig inchibelø køtashchab asamig pirau ørøba yandø purø trømbøig puben.
11 Nabe petø arrumønrrun. Ñi tabig tøgagúigwane elachimøta, ñui coronan mu katøgan merrarramønrraimbe. 12 Maig kuindøgucha truyu pureb ibigwane nai Tiuswei yau kan pilar lataig maramønrrun. Inchen managuen nøbe truyugurrimbe webinrraamøn. Inchen nabe nuinuube nai Tiuswei munchiwan pørøb, nai Tiuswei ciuda, tru srø Jerusalén, nai Tiuswei srømbalasrøngurri kørraarrubigwei munchiwan pørøb, nai srø munchin pørøb indamønrrun. 13 Kalubaibe mør Espíritu iglesiameran wamindigwan.
Laodicea iglesian wam ørøb
14 ’Katø Laodicea iglesiai ángelwan iigwan pør:
Tru Amen, tru treeg køppe treeg, tru newan ciertonigwan eshkabig, tru Tius chiwandøgucha pølbasra maren, nømerrig trendø pasrabiibe iilan øyah tan cha: 15 Ñui chi mariilan ashar cha. Ñibe pishin kømøwei, pachibig kømøwein køn. Pishin kui, kabe pachibig kui, treeg kuikken søl købsruinrrun. 16 Inchawei pishin kømøwei, pachibig kømøwei, mørøtø kurag kuikkurri, nabe nai trigugurri wennamønrrun. 17 Ñibe trendan: “Nabe puaig, truba tøga misraig, chigucha yandø palaimíig kur” cha. Inchendø ñibe uñmuinguen uñib waacha, ñiguen øyeezhig misrin kønmab asamdiig, katø waacha chiguchagaig, ashchab kaimabig, køsaatiig, øyeeg købendø, ñibe ashmøn. 18 Inchawei nabe ñun øyeeg mar tamønrrun. Nagu parra purøørig oro chishchigwan naiwan penø cha, trutøgabe puaig kønrrig cha. Katø kemeløgucha naiwan puløzheelø penø cha, ñui asr køsaatiig kørig kømdiigwan kasrønrrappe. Katø ñi ashibig misramig kabyu srølamig møgucha naiwan penø.
19 Mayeelan na undaarailane øyeeg marmøta chib nabe namab, katø ichaguchib inchibig kur, søl martrai. Maig isuppe, treegwan martrab kandø isua, ñui kaig mariilan isua møra, Tiusweimay llirau. 20 Au, nabe yaskabu wamab pasrar. Møikkøben nai wamwan møra, yaskabwan kurene, nuinug kebya, nabe nøba maben, nøbe naba manrrun.
21 Maig kuindøgucha truyu pureb ibigwane na wamisra karub wainug naba wanrrai tranamønrrun, maig kuindøgucha na truyu puraarrub arrua, nai Møskaimba nø wainug wamisrøb lataitøwei wamig kønrrai. 22 Kalubaibe mør Espíritu iglesiameran wamindigwan.—