22
Salmo 18.1-50
1 Ha'e gui Senhor pe Davi ijayvu kova'e mboraei rupi, Saul ha'e hovaigua kuery ha'e javi po gui Senhor ogueraa jepe jave.
2 Ha'e vy aipoe'i:
— Senhor, ndee ma xe'itaova.
Ndee ma oo imbaraete va'e ha'e xerepya.
3 Xeruete ma xe'itaova anhemiaty,
mba'emo vai jokoa, xereraa jepea imbaraete va'e,
oo yvate va'e, ha'e anhemiaty.
Ndee Xeruete, xereraa jepe 'rã xejukaxea kuery gui.
4 Ajapukai Senhor ogueroporaeipy va'e pe.
Ha'e rami vy aa jepe 'rã xerovaigua kuery gui.
5 Manoa pygua xejoko va'ekue yai rami,
heko vai va'e yai rami xere opu'ã vy xemongyje.
6 Manoa pygua xejokua va'ekue,
nhu'ã xã xejura xapy'a.
7 Ha'e ramo ajexavaia py ajapukai karamboae Senhor pe.
Xeruete pe ajapukai ainy.
Ha'e rã ojeupegua templo gui oendu xeayvua,
ijapyxa peve ajapukaia ovaẽ ramo.
8 Ha'e ramo yvy omyĩ ha'e oryryi.
Yva yta ikuai va'e voi ovavapa, oryryipa,
ogueropoxy ramo.
9 Inhapyĩgua gui opu'ã hataxĩ,
ijuru gui ma tata nhomombaarã oẽ,
tapyĩ hexakã va'e.
10 Yva omo'yvyĩ vy oguejy,
ipy guýry pytũ vaikue oĩ reve.
11 Peteĩ anjo ipepo va'e áry oĩ vy oveve ouvy,
yvytu opepo áry ogueru pojava ramo.
12 Oyvýry rupi rami omoĩ pytũ reia oo'irã,
pytũ, yy ijatya ha'e yva re arai ikuai va'e voi.
13 Hexakãa henonde oo va'e gui
hendy ovy tapyĩ rexakã ramigua.
14 Ha'e gui Senhor yapu yva re,
Yvate ete va'e ijayvu atã.
15 Ngu'y omombo vy omoaĩmba xerovaigua kuery.
Overa vy omondyipa.
16 Ha'e ramo ojekuaa yy rupa,
ha'e yvy yta avi ojekuaapa,
ndeayvu atãa py Senhor,
ndepoxya rupi neapyĩgua gui nepytuẽ ramo.
17 Yvate gui ha'e okuave'ẽ vy xejopy,
xerenoẽ yy tuvixa va'e gui.
18 Xereraa jepe xerovaigua kuery imbaraete va'e gui,
xemomboriau rei va'e kuery gui ae,
xegui ipo'akave ete va'ekue ri.
19 Xere ha'e kuery opu'ãmba rei ajexavai jave,
teĩ Senhor onhemoĩ xepytyvõarã.
20 Ha'e rami vy xereru peteĩ henda ipa'ũ ja'eavea py.
Xereraa jepe xererovy'a vy.
21 Xereko porãa re Senhor xerereko porã,
xevy pe ome'ẽ ndaxepo ky'aiague repy.
22 Mba'eta xee ma Senhor guigua tape rupi aiko va'e,
ndajepe'ai Xeruete gui ha'eve'ỹa rami aiko aguã.
23 Xejee amoĩ ijayvuague ha'e javi,
xejegui ndaipe'ai ayvu omoĩ va'ekue.
24 Henonde aiko anhetẽa rupi,
ajejoko teko vai rupi aiko e'ỹ aguã.
25 Ha'e ramo Senhor ome'ẽ xereko porãague repy,
henonde rupi ndaxereko ky'ai rire.
26 Heko porã va'e kuery pe rejekuaa uka 'rã heko porã va'e,
anhetẽ rupi ikuai va'e pe rejekuaa uka anhetẽ rupigua avi,
27 iky'a e'ỹ va'e pe rejekuaa uka iky'a e'ỹ va'e,
ha'e rã heko vai va'e pe ma rejekuaa uka 'rã nhombopaga kuaa va'e.
28 Ndee reraa jepe 'rã onhemo'yvyĩ'i va'e,
ha'e rã oma'ẽ vaikue reia rupi onhemboyvate va'e ma remomba 'rã.
29 Ndee Senhor ma xerexapea,
Senhor omoexakã pytũ rupi aiko rã.
30 Ndereve vy amomba 'rã xondaro kuery,
Xeruete reve vy apo 'rã hetã kora áry rupi.
31 Nhanderuete guigua tape ma iky'a e'ỹ va'e,
Senhor ayvu ma oa'anga pyre.
Hexe onhemi va'e ha'e javi pe ma mba'emo vai jokoa oiko.
32 Mava'e tu Nhanderuete oiko Senhor e'ỹ vy?
Mava'e tu nhande'itaova oiko Nhanderuete e'ỹ vy?
33 Nhanderuete ma xemombaraetea xekangy e'ỹ aguã,
omoatyrõ 'rã aguata aguã rupi.
34 Ha'e ojapo xepy guaxu rami inhakuã aguã.
Ha'e vy yvatea rupi xemoingo.
35 Xepo pe voi ome'ẽ joe apu'ã kuaa aguã.
Ha'e ramo guyrapa overa va'e guigua voi aipira 'rã.
36 Mba'emo vai jokoarã reme'ẽ xereraa jepea,
xemboaxya rupi xemboyvate.
37 Apyrõ aguã tape rembopyve ramo
ndaxepyxyryi 'rã.
38 Xerovaigua kuery amonha 'rã aupity peve.
Amomba rire ma ajevy ju.
39 Amomba ae, amou'ũmba opu'ã aguã nda'evevei peve.
Xepy yvýry ho'apa.
40 Mba'eta ndee xemombaraete ajoguero'a kuaa aguã,
rejapo xere opu'ã va'ekue re xepo'aka aguã rami.
41 Xerovaigua kuery rejapo ojavapa aguã rami.
Xerayvu e'ỹ va'e amomba.
42 Ha'e kuery oma'ẽ rã avave rei ndoepyai.
Tá, Senhor pe ha'e kuery ojapukai teĩ nombovai.
43 Ha'e ramo amongu'ipa yvy ku'i rami.
Amou'ũmba, yapo tape guiguare rami amomba.
44 Xeretã pygua kuery xere opu'ãa gui xereraa jepe,
xemoĩ yvy regua kuery ruvixarã.
Amboae regua kuery ndaexai va'ety voi xevygua ikuai.
45 Amboae regua kuery xenhe'ẽ rendu.
Xeayvu oendu vy ojapopa okuapy.
46 Ha'e gui amboae regua kuery okanhymba,
onhemiague gui oẽmba onhemondyipa vy.
47 Senhor ma oikove va'e, togueroayvu porãa xe'itaova!
Tomboetea Xeruete, ita xereraa jepea.
48 Nhanderuete xerepy vy jojukapa,
heta va'e kuery re xembopo'aka.
49 Nhanderuete ae xereraa jepe xerovaigua kuery gui.
Ndee ma xemboyvate xerovaigua kuery áry,
ha'e xerepy avakue jojuka va'ety po gui.
50 Ha'e ramo Senhor, roguerovy'a 'rã yvy regua kuery oendua py,
aporaei 'rã nderery rupi.*Romanos 15.9
51 Ha'e ae ombopo'aka 'rã huvixave omoĩ va'ekue,
oexa uka 'rã guembiporavo oayvua,
Davi ha'e hamymino kuery pe, raka'e rã peve.