15
Moisés oporaeiague
1 Ha'e ramo Moisés ha'e Israel kuery omonhendu okuapy pova'e mboraei Senhor pe. Ha'e vy aipoe'i:
— Aporaei 'rã Senhor pe, mba'eta yvate ete vy ipo'aka.
Ye'ẽ mbyte py oitypa kavaju ha'e hi'árygua kuery.
2 Senhor ma xembaraetea ha'e aporaeia.
Ha'e ma xereraa jepea oiko.
Ha'e va'e ma xeruete, ha'e nunga rupi amboete 'rã.
Xeru Ruete voi oiko ramo amboyvate 'rã.
3 Senhor ma joe opu'ã va'e.
Senhor ma hery.
4 Ye'ẽ mbyte py oitypa Faraó mba'e karóxa ha'e xondaro kuery.
Huvixa kuery voi oy'upa Ye'ẽ Pytã va'e py.
5 Yai ou oiny va'e ojao'ipa.
Ha'e ramo ita rami oikepa yy guy ete peve.
6 Senhor, ndepo reiporu kuaa regua ipo'aka vy iporã ete.
Senhor, ndepo reiporu kuaa regua omboa'ypa nderovaigua kuery.
7 Ndeyvate ete va'e vy reitypa nderovai opu'ã va'e kuery.
Ndepoxya rembou rã omokanhymba mba'emo ra'ykue rami.
8 Neapyĩgua gui nepytuẽ va'e py rive remboaty yy.
Oxyrya gui opytapa, ijaty oupy.
Yai ikuai va'e hatãmba ye'ẽ guýry.
9 Orerovaigua aipoe'i: “Aa 'rã ha'e kuery rakykue aupity peve.
Amboja'o 'rã ha'e kuery mba'e rei-rei va'ekue,
xenhe'ẽ py arovy'a 'rã ha'e nunga ajopypa vy.
Aekyi 'rã xekyxe, xepo py amokanhymba 'rã”, he'i va'ekue.
10 Ha'e rã ndeguigua yvytu py reipeju ramo ye'ẽ ojao'ipa.
Ha'e kuery oikepa yy omyĩ atãa py chumbo oikea rami.
11 — Senhor, tuuete ikuai va'e regua mava'e 'rã tu ndee ramigua oiko?
Mava'e tu oiko ndee ramigua? Ndeky'a e'ỹ va'e rã ndererovy'aa.
Nhomondyipaarã iporã va'e rejapo vy okyjepy reiko.
12 Reiporu kuaa regua reupi ramo
yvy omokõmba.
13 Rejoayvua rupi rereko ndevygua kuery reraa jepe va'ekue.
Ndepo'akaa rupi reraa nderekoa iky'a e'ỹ va'e py.
14 Yvy regua kuery oendu vy oryryipa okuapy,
tekoaxy poyi ipo'aka Filístia pygua kuery re.
15 Ma'ẽ, Edom py yvatekueve ikuai va'e ma oxĩmba.
Moabe pygua ipo'aka va'e kuery voi oendu okuapy okyjea.
Canaã pygua kuery ikangypa.
16 Ha'e kuery áry ho'a imondyiarã ha'e imongyjearã.
Ndejyva ipo'aka ete va'e gui vy okyrirĩmba 'rã ita rami,
ndevygua kuery oaxa peve, Senhor,
rejogua va'ekue oaxapa peve.
17 Ha'e va'e kuery ma ndevygua yvyty re reraa vy renhotỹ 'rã ha'e py nemba'etyrã,
Senhor, tekoa reĩ atyrã rereko katu va'ekue py,
henda iky'a e'ỹ va'e py, ndepo py renhono va'ekue py.
18 Senhor ipo'aka 'rã araka'e rã peve — he'i.
19 Mba'eta Faraó rymba kuery kavaju, ikaróxa ha'e kavaju árygua kuery ye'ẽ mbyte py oikepa ramo ha'e kuery áry Senhor ombou ju yy. Ha'e rã Israel kuery ma yvy rupi oaxa oje'oivy ye'ẽ mbyte ipiru reia rupi.
Miriã kunhague mboae reve oporaei okuapyague
20 Arão reindy Miriã ma profeta kunha oiko. Ha'e rami vy pandeiro ojopy rã hakykue kunhague ha'e javive oje'oi pandeiro reve ha'e ojerokya rupi.
21 Ha'e ramo ha'e kuery pe Miriã ombovai:
— Peporaei Senhor pe, mba'eta iporã ete ipo'akaa py.
Mba'eta ye'ẽ py oitypa kavaju ha'e hi'árygua kuery.
Yy iro va'e iro e'ỹ va'e ju opytaague
22 Ye'ẽ Pytã va'e gui ma Moisés ogueraa Israel kuery tekoa e'ỹa Sur katy. Tekoa e'ỹa rupi mboapy ára re oguata oje'oivy yy ojou e'ỹ re.
23 Ha'e gui mae ma Mara py ovaẽ. Ha'e rami teĩ Mara py yy oĩ va'e ma nda'evei oy'u aguã, iro ramo. Ha'e ramo ae omboery Mara.*Tery Mara ma “Iro” 'ea.
24 Ha'e rami rã Moisés re heta va'e kuery ijayvu rei vy aipoe'i:
— Mba'e tu jay'u 'rã? — he'i okuapy.
25 Ha'e ramo Moisés ojapukai Senhor pe. Ha'e rã ixupe Senhor oexa uka peteĩ yvyra. Ha'e va'e ma Moisés yy py omombo ramo yy nda'irovei. Ha'e py Senhor oeja peteĩ ayvu ha'e kuery rekorã. Ha'e rami vy ha'e kuery oeko a'ã ha'e py.
26 Ha'e vy aipoe'i:
— Xapy'a rei Senhor Penderuete ayvu pendu riae, henonde ha'evea ramigua anho pejapo, ojapo uka va'e pendu, ha'e ijayvuague ha'e javi rupi pendekuai ramo ma neĩ peteĩve mba'eaxy ndoui 'rã pendere, Egito pygua kuery re ambou va'ekue regua. Mba'eta xee ma Senhor romonguera va'e — he'i.
27 Ha'e gui ha'e kuery ma Elim py ju ovaẽ, doze yvu ha'e setenta pindo ikuaia py. Ha'e py opyta okuapy yy ikuai va'e yvýry.