15
Nhanderuete Abrão ta'y aguã re ijayvuague
1 Ha'e va'e rire Senhor Abrão pe ojexa uka vy aipoe'i ixupe:
— Abrão, ekyje eme. Xee ma mba'emo vai jokoa aiko ndevy, ha'e ndevy guarã va'ekue heta 'rã ame'ẽ.
2 Abrão ombovai:
— Senhor Xeruete, mba'e tu ha'vy reme'ẽ 'rã, xera'y e'ỹ re ae aiko rã? Ha'e xero py mba'emo areko va'e aeja rã ojopy va'erã ma Damasco guigua Eliézer anho.
3 Aipoe'ive ju: — Xera'yrã nereme'ẽi rire mba'emo areko va'e xero py tembiguai itui'i va'ekue pe guarã rive opytapa.
4 Ha'e ramo Senhor ombovai vy aipoe'i:
— Ha'e va'e ma nemba'e jopyarã e'ỹ oiko. Ha'e rã ndegui oiko va'erã va'e ae ma 'rã ojopy — he'i.
5 Ha'e vy ogueraa oka py. Ha'e vy aipoe'i:
— Ema'ẽ yva re, ha'e eipapa jaxy-tata ikuai va'e, reipapa aguã ha'eve ramo.*Romanos 4.18
Aipoe'i avi: — Guĩ rami 'rã heta neramymino kuery — he'i.
6 Ha'e ramo Abrão Senhor re ojerovia ramo ixupe “Heko porã va'e” he'i.*Romanos 4.3,9,22, Gálatas 3.6, Tiago 2.23
7 Ha'e gui Senhor aipoe'ive ju:
— Xee ma Senhor Ur caldeu kuery retã gui roipe'a va'ekue, kova'e yvy nderekoarã ame'ẽ aguã — he'i.
8 Abrão oporandu ixupe:
— Senhor Xeruete, mba'exa tu aikuaa 'rã anhetẽ kova'e yvy ajopy 'rãa?
9 Ombovai:
— Eru xevy ha'vy peteĩ vaka kunha'i, peteĩ kavara ha'e peteĩ vexa'i ra'y, mboapy ma'etỹ oguereko va'e meme. Eru avi peteĩ pyku'i'i ha'e peteĩ apykaxu'i — he'i.
10 Ha'e ramo Abrão mymba ha'e javi ogueru vy oipe'ãmba mbyte rupi. Onhono porã'i ipẽgue, peteĩ-teĩ joexe-exei'i. Ha'e rã guyra'i ma noipe'ãi.
11 Xapirẽ kuery mba'emo re'õgue áry oguejy ramo Abrão omondyi.
Abrão reve Nhanderuete ngupive guarã ojapoague
12 Ka'aru rai'i ma jave Abrão hopeyi vaipa, ha'e oendu avi okyje vaipaa, pytũ vai ete ramo.
13 Ha'e ramo Senhor aipoe'i ixupe:
— Reikuaa pota pova'e re, mba'eta neramymino kuery joyvy rupi oguata rei 'rã. Escravo ikuai aguã rami ojopya 'rã. Ha'e gui ombojexavaia 'rã quatrocentos ma'etỹ re.
14 Ha'e rami teĩ herekoa kuery ma xee ju amoingo axy 'rã. Ha'e va'e rire ojepe'apa 'rã ha'e gui, imba'e rei-reipa reve.*Atos 7.6-7
15 Ha'e rã ndee ma reo porã 'rã neramoĩ kuerya py. Ha'e ramo nenhono porãa 'rã ndetuja'i ete jave.
16 Ha'e gui neramymino kuery irundykuea mae ma ikuai va'e ojevy 'rã apy, mba'eta ndopai teri apygua amorreu kuery heko vai aguã — he'i.
17 Kuaray oike ma ramo pytũ vaipa ete. Ha'e gui ojekuaa peteĩ tapyĩ ryru hataxĩ opu'ã oinya va'e, ha'e peteĩ takua ryxa rendy mymba pẽgue ikuai va'e mbyte rupi oaxa oiny va'e.
18 Ha'e va'e árave Abrão reve Senhor ojapo ngupive guarã. Ha'e vy aipoe'i:
— Ha'e gui neramymino kuery pe ae 'rã ame'ẽ kova'e yvy, Egito yakã guive Eufrates yakã guaxu peve,
19 queneu kuery ikuaia, quenezeu, cadmoneu,
20 heteu, ferezeu, refaim,
21 amorreu, cananeu, girgaseu ha'e jebuseu kuery ikuaia guive.