18
Abraão pe Senhor ha'e mokoĩ anjo ojexa ukaague
1 Ha'e gui Manre py Abraão pe Senhor ojexa uka ju yvyra carvalho ty oĩ va'e rexei'i, hakuve ma jave ngoo'i rokẽ py oguapy oiny jave.
2 Abraão oma'ẽ vy oexa mboapy avakue henonde hi'aĩ ra'e ramo. Oexa vy ngoo'i rokẽ gui onha ovy ovaexĩ aguã.*Mboapy avakue ovaẽ va'e regua mokoĩ ma anjo ikuai (19.1), ha'e rã amboae ma Senhor ae, ha'e'ỹ vy anjo ikuaa ukaa (versículos 1, 17, 20, 22). Guenapy'ã re oĩ, ngova yvy re omovaẽ rei reve.
3 Ha'e vy aipoe'i:
— Xe-Senhor, rejou porã ri ramo ajerure reaxa rive e'ỹ aguã xee nerembiguaia gui.
4 Taru ruka yy pendepy pejoi aguã.†Ha'e kuery reko rami vy oo py ipoua kuery ovaẽ ramo hoo va'e omovaẽ vy ogueru ruka 'rã yy opy ojoi aguã, tape rupi yvy ku'i rupi ou rire (19.2, 24.32, 43.24, Juízes 19.21, Lucas 7.44, João 13.1-14). Pepytu'u ranhe kova'e yvyra guy py.
5 Aru ruka 'rã mbojape'i. Pe'u ke, penembaraeteve, ore kuery penembiguaia py pevaẽ ma vy. Ha'e gui mae ma ha'eve peove aguã — he'i.
Ha'e kuery ombovai vy
— Ejapo ha'vy ndeayvuague — he'i okuapy.
6 Ha'e ramo Abraão ojapyra ovy oo'i Sara oĩa py. Ha'e vy aipoe'i:
— Emoakỹ pojava na mboapy ryru trigo iporãve va'e mbojaperã, ha'e exy ju tanhimbu py — he'i.
7 Ha'e gui Abraão ma mymba kora katy ju onha ovy. Peteĩ vaka ra'y ikyra porã va'e ojopy vy ome'ẽ omongakua va'ekue pe oguereko katu pojava aguã.
8 Ogueru avi kamby kekue ha'e oke e'ỹ va'e, ha'e gui vaka ro'o oexy uka va'ekue. Ha'e rami vy ipoua kuery renonde omoĩmba. Oarõ ho'amy ha'e kuerya py yvyra guy py okaru okuapy ramo.
9 Ha'e ramo ha'e kuery oporandu ixupe:
— Ndera'yxy Sara mamo tu oĩ?
Ombovai:
— Opy ri hiny — he'i.
10 Ha'e kuery regua peteĩ va'e aipoe'i:
— Aỹ ma peteĩ ma'etỹa py ma aju ete ju 'rã ndea py. Ha'e ramo ndera'yxy Sara oguereko 'rã ava'i — he'i. Ha'e rami jave Sara oendu oo'i rokẽ py ha'e kuery rakykue katy.
11 Abraão ha'e Sara ma tujakue'i ete ma ikuai. Sara voi ndoikovei ma gueko re.
12 Ha'e gui Sara ha'e nunga oendu vy hory oiny opy'a py. Ha'e vy aipoe'i ojeupe ae:
— Xeguaiguĩ'i ete ma, ha'e xeme voi tuja'i ma va'eri, ha'e rami teĩ nhi'ã avy'a nho 'rã ri? — he'i.
13 Senhor aipoe'i Abraão pe:
— Mba'e re tu Sara hory rei reve ri aipoe'i: “Anhetẽ ete ri nda'u areko'i teri 'rã kyrĩ va'e, xeguaiguĩ'i ma rire?” he'i?
14 Nhanderuete pe nda'u oiko 'rã ri mba'emo haxy ete va'e ojapo aguã? Peteĩ ma'etỹa py kova'e ára ojeupity jevy jave 'rãe aju ndea py, ha'e Sara oguereko 'rã kyrĩ va'e — he'i.*Romanos 9.9
15 Ha'e rami rã Sara okyje vy onhenhomi. Ha'e vy aipoe'i:
— Ndaxeroryi rima ainy.
Ha'e rã ha'e va'e ma ombovai:
— Any, anhetẽ nderory kuri — he'i.
Sodoma ha'e Gomorra omomba aguã re Nhanderuete ijayvuague
16 Ha'e gui avakue opu'ãmba vy oo ha'e gui, Sodoma tetã katy oma'ẽ aguã. Abraão voi oo ranhe ha'e kuery rupive tape oexa uka aguã.
17 Senhor aipoe'i ojeupe ae:
— Ndaikuaa ukai 'rã ri nda'u Abraão pe mba'e pa ajapo taa?
18 Mba'eta Abraão gui ma oiko 'rã peteĩ regua heta ha'e imbaraete va'e. Ha'e hexe vy yvy jave regua ha'e javi 'rã amoingo porã.*Gálatas 3.8
19 Mba'eta xee aiporavo ha'e ombo'e aguã gua'y kuery ha'e guamymino kuery araka'eve rã guarã xee aipotaa rami ikuai aguã re, teko porã ha'e ha'eve ramigua anho ojapo aguã. Ha'e nunga rupi Abraão pe xee Senhor ajapo 'rã hekorã re xeayvuague — he'i.
20 Senhor aipoe'ive ju:
— Sodoma ha'e Gomorra pygua kuery reko re opa marã ayvua rã aendu. Ha'e kuery ojejavypave tema oje'oivy.
21 Ha'e nunga rupi avaẽ 'rã aexa aguã anhetẽ pa aendua rami ha'e kuery ikuaia. Ha'e rami e'ỹ rã aikuaa avi 'rã.
Nhanderuete pe Abraão ojerureague
22 Ha'e gui ha'e va'e avakue oje'oi Sodoma tetã katy. Ha'e rã Abraão ma Senhor renonde teri oĩ.
23 Ha'e rami vy hexe onhemboja vy aipoe'i:
— Heko vai va'e remombaa py remomba avi 'rã teve heko porã va'e?
24 Xapy'a rei tetã py cinqüenta heko porã va'e ikuai teĩ nda'u remomba nho 'rã tetã? Cinqüenta heko porã va'e remboaxya nda'u nerendui 'rã tetã remomba e'ỹ aguã?
25 Ejapo eme ha'e rami, heko vai va'e rejukaa py ejukapa avi eme heko porã va'e, heko vai va'e opaa rami ae avi heko porã va'e opa e'ỹ aguã. Tove ha'e ramigua toiko eme. Ndee yvy jave re ikuai va'e rerekoa reiko va'e ha'eve e'ỹa rami teve 'rã rejoguereko? — he'i.
26 Ha'e ramo Senhor ombovai:
— Ha'e gui Sodoma py cinqüenta heko porã va'e ajou ri vy ha'e kuery re vy amboaxy 'rã tetã ha'e javi — he'i.
27 Ha'e gui Abraão aipoe'ive ju:
— Taxepy'a guaxu xeayvuve aguã Xeruete reve, yvy ku'i, tanhimbu guigua aiko va'eri.
28 Xapy'a rei heko porã va'e cinqüenta aguã peteĩ nhirũi'i ri oata ramo remomba nho 'rã teve tetã?
Ombovai:
— Quarenta e cinco ri ha'e py ajou vy namombai 'rã tetã — he'i.
29 Abraão aipoe'ive ju:
— Ha'e gui xapy'a rei quarenta ri ikuai ramo ha'vy?
Ombovai:
— Quarenta ikuai va'e re vy namombai 'rã — he'i.
30 Oporanduve ju:
— Ejou vai eme ke Senhor, xeayvuve ju taa. Ha'vy trinta ikuai ramo ha'e py?
Senhor ombovai:
— Trinta heko porã va'e ha'e py ajou vy namombai 'rã — he'i.
31 Abraão ijayvuve tema:
— Senhor reve xeayvuve ta. Ha'vy vinte ete'i ri ikuai ramo ha'e py?
Senhor ombovai:
— Namombai 'rã vinte ikuai va'e re vy — he'i.
32 Abraão aipoe'ive ju:
— Ejou vai eme ke Senhor, teĩgue ju xeayvu taa. Ha'vy dez heko porã va'e ikuai ramo?
Senhor ombovai:
— Dez-'i ikuai va'e re vy namombai 'rã — he'i.
33 Abraão ijayvupa ma ramo Senhor ojepe'a ovy. Ha'e rã Abraão ma ngoo katy ju ojevy.
*18:2 Mboapy avakue ovaẽ va'e regua mokoĩ ma anjo ikuai (19.1), ha'e rã amboae ma Senhor ae, ha'e'ỹ vy anjo ikuaa ukaa (versículos 1, 17, 20, 22).
†18:4 Ha'e kuery reko rami vy oo py ipoua kuery ovaẽ ramo hoo va'e omovaẽ vy ogueru ruka 'rã yy opy ojoi aguã, tape rupi yvy ku'i rupi ou rire (19.2, 24.32, 43.24, Juízes 19.21, Lucas 7.44, João 13.1-14).
*18:14 Romanos 9.9
*18:18 Gálatas 3.8