Jeremias nhogueronhemboaxya rupi ijayvuague
Jeremias nhogueronhemboaxya lamentações [esta palavra em português] rupi ijayvuague
Kova'e kuaxia para re ma Jeremias ipy'a vaia rupi ijayvu Babilônia pygua kuery Jerusalem tetã oitypaague re. Ha'e rami teĩ kuaxia mbyte py ma ojerovia etea rupi ijayvuague avi oĩ:
“Mba'eta Senhor nhanemboaxy ramo ma nanhanemombaai,
mba'eta nhanemboaxya ma opa va'erã e'ỹ.
Opa mba'e py ojeroviapy reiko vy
rexa uka pyau 'rã ko'ẽ nhavõ.
Xejeupe ae aipoa'e: ‘Xevy guarã oĩ va'e ma Senhor ae.
Ha'e nunga rupi arõ tema 'rã hexe’, ha'e.
Senhor opena porã 'rã harõa kuery re,
onhe'ẽ py oeka va'e kuery ae.
Ha'eve nharõ Senhor nhandereraa jepe aguã,
nhakyrirĩ reve” (3.22-26).
1
Jerusalém tetã ombovaipa ha'e oejapaa ague re ndovy'aaiague
1 Tetã yma heta riae ikuaiague teĩ aỹ ma oejapaa ma!* “Tetã” he'ia ma Jerusalém re ae ijayvu vy, Babilônia pygua kuery ombovaipa rire (2 Reis 24-25; 2 Crônicas 36; Jeremias 39, 52).
Aỹ ma kunha imeve'ỹ va'e rami opyta,
yvy regua kuery omboeteve va'ekue ri.
Amboae tetã ikuai va'e gui huvixa rajy rami yvateve va'ekue ri
aỹ joupe rive ha'e kuery omomba'eapo nhea'ãa.
2 Ojae'o, ojae'o tema okuapy pyávy,
hexay oxyry tema 'rã hetovape rupi.
Ndoikoi imbopy'a porãarã
hembiayvu heta ikuai va'ekue ri.
Hembiayvu ikuai va'ekue ha'e javi ma anhetẽ rupi e'ỹ oguereko,
ha'e hovai guarã rive ju ikuai.
3 Mba'eta Judá kuery ma escravo-rã ogueraapaa,
oguereko axya ha'e omomba'eapoa poyi anho rei.
Yvy regua kuery mbyte rupi ikuaia py
ndojoui opytu'u aguã voi.
Ikuai axy reia py
hakykue monhaa kuery oupitypa ma.
4 Sião tetã katy tape oo va'e rupi ojae'oa,
mba'eta ndoikovei ma nhemboaty iky'a e'ỹ va'e katy oo va'e.
Tetã kora rokẽ ha'e javi ombovaipaa.
Ha'e pygua sacerdote kuery ipoaẽ rei,
kunhataĩgue voi iporiaupa okuapy.
Tetã py ojexavaia anho oendu.
5 Ha'e rami rã hovaigua kuery ovy'apa rei okuapy,
ija'e'ỹ va'e kuery ikuai porãmba rei,
ha'e pygua kuery anhetẽ rupi e'ỹ riae ikuai ramo
Senhor omoingo axy rã oexa vy.
Ta'y kue'iry voi hovaigua kuery
omondyi heravy escravo-rã.
6 Sião pygua kuery gui oaxapa ma
iporãa oĩ va'ekue ha'e javi.
Ha'e py yvatekueve ikuai va'ekue voi
guaxu ho'u va'erã ndojouvei va'e rami ma ikuai,
ikangypa rei vy ho'apa rive 'rã okuapy
imonhaa kuery renonde py teĩ.
7 Aỹ mombyry ogueraa ague py ombojexavaia rã
Jerusalém guigua kuery ima'endu'a 'rã okuapy
omba'e rei-rei oguerovy'a va'ekue re,
ymave rupi mba'emo oguereko va'ekue re,
heraa jepearã ndoikoi ramo
ngovaigua kuery po py ho'apaague re guive,
ha'e gui ho'a rã hovaigua kuery oexa vy
ojojai rei okuapyague re.
8 Jerusalém pygua kuery ojejavy vaipa ete okuapy.
Ha'e rami vy ae ojeguaru reipy ikuai.
Imboeteare kuery ma nonhemoirũvei okuapy
ipire reia rupi ikuai rã oexa vy.
Ha'e kuery ae voi ipoaẽ reve
ojepe'a 'rã okuapy oxĩmba rei vy.
9 Ijao re ojekuaa ha'eve'ỹa,
noexa'ãi guive va'ekue omombaa aguã re.
Ha'e rami vy oitya rã onhemondyipa rei okuapy,
ha'e avave rei ndoikoi imbopy'a porã jevyarã.
Senhor, exa ke aiko axya,
mba'eta hovaigua kuery ijayvu vaive rive tema okuapy.† Jeremias “Aiko axya” he'i mba'eta ha'e ae voi opyta Judá yvy re Babilônia pygua kuery ndogueraapai va'ekue reve (Jeremias 40.1-6).
10 Ore kuery mba'e rei-rei roguerovy'ave va'ekue ma
orerovaigua kuery ojopy vy omba'erã ae ogueraapa.
Roexa avi yvy regua kuery oike okuapy rã
rombojeroviaaty iky'a e'ỹ va'e py voi,
“Nda'evei xevygua kuery ijatya py ha'e kuery ikuai avi aguã” aipo're va'ekue ri.
11 Tetã pygua kuery ha'e javi ipoaẽ 'rã okuapy
tembi'u'i rekaa rupi ikuai vy.
Omba'e rei-rei ha'e kuery oguerovy'ave va'ekue ome'ẽmba ma
tembi'u ho'u va'erã rekovia, imbaraeteve'i ju aguã.
Senhor, exa ke, eikuaa pota guive,
mba'eta xere nda'ija'eavei ma.
12 Peẽ kuery tape rupi peaxa va'e,
ha'e nunga pexa vy napendui ri ty'y oremboaxya?
Pema'ẽ ha'e peikuaa pota.
Oiko 'rã nda'u haxy va'e xee aendu va'e ramigua,
xe'áry ou va'ekue ramigua ete?
Mba'eta Senhor opoxya oexa ukaa ára xemoingo axy avi.
13 Ha'e rami vy yvate gui tata ombou xekãgue ikuai va'e re
ipo'aka ete vy.
Ha'e gui xepy rupi ju kya omoĩ va'e py
xerakykue katy gui xemoatã vy xereity.
Ha'e rami vy xemomba tema heravy,
xemomba'eaxy ko'ẽ nhavõ.
14 Ajejavyague ma opo py ae ojokua vy
ojapo xe-cangarã rami.
Ha'e vy oipopẽ va'ekue xeaju'y rupi peve ovaẽ.
Ha'e rami py Senhor omomba ma xembaraetea,
xemboaxa guive xegui ipo'akave va'e kuery po py.
15 Senhor omoaĩmba avi ma ipy'a guaxukueve
xereve ikuai va'ekue.
Ombou reta xerovai ono'õ va'erã,
xea pygua kunumigue omou'ũmba avi aguã.‡ Apy “Xee” he'ia ma Jerusalém ae ijayvua rami Jeremias ijayvu vy, ojee e'ỹ.
Kunhataĩ'i rami Judá pygua kuery ndojexavai va'ekue ri
Senhor opyrõ ukapa uva omou'ũaty py rami.
16 Ha'e nunga re ae xee ajae'o,
xerexay gui xerexa ndoexavei.
Xegui ojepe'a ma xembopy'a guaxuarã
xembaraete ombopyau 'rã va'ekue.
Xera'y kuery voi ojexavai reia rupi ikuai,
hovaigua ipo'aka ramo.
17 Sião pygua kuery opo oupi teĩ
avave rei ndoikoi ipytyvõarã.
Mba'eta Jacó regua kuery re Senhor ijayvu rire
ha'e katy'i rupi ikuai va'e hovaigua ju ikuai.
Ha'e ramo Jerusalém tetã pe ha'e kuery
“Ha'eve'ỹ va'e” he'i okuapy.
18 Ha'e rami avi Senhor ma heko porã va'e,
ha'e rã xee ma nanhe'ẽ renduxei va'ekue.
Peẽ yvy regua kuery ha'e javive, pendu ke,
pema'ẽ guive haxy aendu va'e re.
Xea pygua kunhataĩgue ha'e kunumigue
ogueraapaa ma escravo-rã.
19 Xeirũ kuery aenoĩ
teĩ ha'e kuery xembotavy.
Xea pygua sacerdote ha'e nhomongeta va'ety kuery voi
omanomba tetã rupi,
tembi'u rekaa rupi ikuai vy
imbaraetepa'i ju aguã.
20 Ema'ẽ Senhor, mba'eta xee ajexavai.
Xenhe'ẽ py nda'evei ete aikovy,
xekuraxõ py ndaxerekorãvei ma xeryepy rupi,
opa mba'e py noronhe'ẽ rendui rire.
Oka rupi xera'y kuery ojukapaa kyxe py,
ha'e rã opy rupi ma mano anho oiko.
21 Xepoaẽa onhendu
teĩ avave rei ndoikoi xepytyvõarã.
Mba'emo vai aendua xere ija'e'ỹ va'e kuery oikuaa vy
ovy'a reipa okuapy, ndee xemoingo axy ramo.
Ha'e rami avi ára ndeayvuague ovaẽ ramo
xee aiko axya rami avi ha'e kuery voi ikuai axy 'rã.
22 Tove ha'e kuery ojejavyague tojekuaapa nerenonde.
Ereko ha'e kuery voi xere rejapoague rami,
xee anhetẽ rupi e'ỹ aikoa py.
Mba'eta xepoaẽ vaipa ete,
xekuraxõ opa rai'i ma.
*1:1 “Tetã” he'ia ma Jerusalém re ae ijayvu vy, Babilônia pygua kuery ombovaipa rire (2 Reis 24-25; 2 Crônicas 36; Jeremias 39, 52).
†1:9 Jeremias “Aiko axya” he'i mba'eta ha'e ae voi opyta Judá yvy re Babilônia pygua kuery ndogueraapai va'ekue reve (Jeremias 40.1-6).
‡1:15 Apy “Xee” he'ia ma Jerusalém ae ijayvua rami Jeremias ijayvu vy, ojee e'ỹ.