18
2 Samuel 22.1-51
Jogueroporaei va'e pe Davi Senhor rembiguai ombopara va'ekue. Senhor pe oporaei Saulo ha'e hovaigua kuery ha'e javi po gui oepy ramo. Ha'e vy aipoe'i:
1 Senhor xemombaraetea, xee roayvu.
2 Senhor, ndee ma xe'itaova.
Ndee ma oo ikorapa va'e ha'e xerepya.
Xeruete ma xe'itaova anhemiaty,
mba'emo vai jokoa, xereraa jepea imbaraete va'e ha'e oo imbaraete ete va'e.
3 Senhor ogueroporaeipy va'e pe xee ajapukai vy
aa jepe kuery 'rã xerovaigua kuery po gui.
4 Nhuã manoa regua xejura va'ekue,
yai rami heko vai va'e xere opu'ã vy xemongyje.
5 Manoa pygua xejokua,
nhuã xã xejura xapy'a.
6 Ha'e ramo ajexavaia py ajapukai karamboae Senhor pe.
Xeruete pe ajapukai xereraa jepe aguã.
Ha'e rã oĩaty templo gui oendu xeayvua,
ijapyxa peve ajapukaia ovaẽ ramo.
7 Ha'e ramo yvy omyĩ ha'e oryryi.
Yvyty yta ikuai va'e voi ovavapa, oryryipa,
Senhor ogueropoxy ramo.
8 Inhapyĩgua gui opu'ã hataxĩ,
ijuru gui ma tata nhomombaarã oẽ,
tapyĩ hexakã va'e avi.
9 Yva omo'yvyĩ'i vy oguejy,
ipy guýry pytũ vaikue oĩ reve.
10 Anjo ipepo va'e áry oĩ vy oveve ouvy,
yvytu opepo áry ou pojava.
11 Pytũ gui ojapo onheovã aguã.
Ha'e va'e ojee omoĩ ouvy.
Yy ha'e arai pytũ va'e hoo rami oĩ.
12 Hexakã henonde oo va'e gui ma arai ivaipa,
amandau ha'e tapyĩ hexakã va'e ho'a.
13 Ha'e gui ma Senhor yapu yva re.
Yvate ete va'e ijayvu atã ramo
ho'a amandau ha'e tapyĩ hexakã va'e.
14 Ngu'y omombo vy omoaĩmba xerovaigua kuery.
Overa vy omondyipa.
15 Ha'e ramo ojekuaa yy rupa peve,
yvy yta avi ojekuaapa,
ndeayvu atãa py Senhor,
ndepoxya rupi neapyĩgua gui nepytuẽ ramo.
16 Yvate gui Senhor okuave'ẽ vy xerupity,
xerenoẽ yy tuvixa va'e gui.
17 Xereraa jepe xerovaigua kuery imbaraete va'e gui,
xemomboriau rei va'e kuery gui ae,
xegui ipo'akave ete va'ekue ri.
18 Ha'e kuery ma ajexavai jave opu'ãmba rei va'ekue xere,
teĩ Senhor onhemoĩ xepytyvõarã.
19 Ha'e rami vy xereru peteĩ henda ipa'ũ ja'eavea py.
Xererovy'a vy xereraa jepe.
20 Xereko porãa rekovia Senhor ome'ẽ iporã va'e,
xevy ome'ẽ ndaxepo ky'aia repy.
21 Mba'eta xee ma Senhor guigua tape rupi anho aiko va'e,
Xeruete gui ndajepe'ai guive ha'eve'ỹa rami aiko aguã.
22 Xejee amoĩ ijayvuague ha'e javi,
xejegui ndaipe'ai ayvu omoĩ va'ekue.
23 Henonde aiko anhetẽ rupi,
ajejoko guive teko vai rupi aiko e'ỹ aguã.
24 Ha'e ramo xevy Senhor ome'ẽ xereko porãa repy,
henonde rupi ndaxereko ky'ai rire.
25 Heko porã va'e kuery pe rejekuaa uka 'rã heko porã va'e,
anhetẽ rupi ikuai va'e pe rejekuaa uka anhetẽ rupigua avi,
26 iky'a e'ỹ va'e pe rejekuaa uka iky'a e'ỹ va'e,
ha'e rã heko vai va'e pe ma rejekuaa uka 'rã nhombopaga kuaa va'e.
27 Mba'eta reraa jepe 'rã onhemo'yvyĩ'i va'e,
ha'e rã oma'ẽ vaikue reia rupi onhemboyvate va'e ma remomba 'rã.
28 Ndee rejapo xerata endy hexakãve aguã rami.
Pytũ rupi aikoa rupi ma ndee Senhor Xeruete remoexakãmba.
29 Ndereve vy amomba 'rã xondaro kuery,
Xeruete reve vy apo 'rã tetã kora áry rupi.
30 Nhanderuete guigua tape ma iky'a e'ỹ va'e,
Senhor ayvu ma oa'anga pyre.
Hexe onhemi va'e ha'e javi pe ma mba'emo vai jokoa oĩ.
31 Mava'e tu Nhanderuete oiko Senhor e'ỹ vy?
Mava'e tu nhande'itaova oiko Nhanderuete e'ỹ vy?
32 Xeruete xemombaraetea oiko,
omoatyrõ 'rã aguata aguã rupi.
33 Xepy ojapo 'rã guaxu rami inhakuã aguã.
Yvatea rupi aẽ teĩ xemoĩ atã.
34 Xepo pe voi ome'ẽ joe apu'ã kuaa aguã.
Ha'e ramo guyrapa overa va'e guigua teĩ xee aipira 'rã.
35 Mba'emo vai jokoarã reme'ẽ xereraa jepea,
reiporu kuaa regua xemoĩ atã,
xemboaxya rupi xemboyvate.
36 Apyrõ aguã tape rembopyve ramo
ndaxepyxyryi 'rã.
37 Xerovaigua kuery amonha 'rã aupitypa peve.
Ha'e gui amomba rire ajevy ju 'rã.
38 Amou'ũmba opu'ã aguã nda'evevei peve.
Xepy yvýry ho'apa.
39 Mba'eta ndee xemombaraete ajoguero'a kuaa aguã,
rejapo xere opu'ã va'ekue re xepo'aka aguã rami.
40 Xerovaigua kuery rejapo ojavapa aguã rami.
Xerayvu e'ỹ va'e amomba.
41 Guepyarã pe ha'e kuery ojapukai teĩ ndoepyai.
Senhor pe voi ha'e kuery ojapukai teĩ nombovai.
42 Ha'e ramo amongu'ipa yvy ku'i yvytu rupi ovevepa va'e rami,
yapo tape guiguare nhamomboa rami amokanhymba.
43 Heta va'e kuery xere opu'ã teĩ xereraa jepe,
xemoĩ yvy regua kuery ruvixarã.
Amboae regua kuery ndaexai va'ety voi xevygua ikuai.
44 Xeayvu oendu vyve xenhe'ẽ rendu okuapy.
Yvy mboae regua oexa uka xevy ikuaia,
45 amboae regua kuery okanhymba,
onhemiague gui oẽmba onhemondyipa vy.
46 Senhor ma oikove va'e, togueroayvu porãa xe'itaova!
Tomboetea Nhanderuete xereraa jepea!
47 Nhanderuete xerepy vy jojukapa,
heta va'e kuery re xembopo'aka.
48 Nhanderuete ae xereraa jepe xerovaigua kuery gui.
Ndee ma xemboyvate xerovaigua kuery áryve,
ha'e xerepy avakue jojuka va'ety po gui.
49 Ha'e ramo Senhor, roguerovy'a 'rã yvy regua kuery oendua py,
aporaei 'rã nderery rupi.*Romanos 15.9
50 Ha'e ae ombopo'aka 'rã huvixaverã omoĩ va'ekue,
oexa uka 'rã guembiporavo oayvua,
Davi ha'e hamymino kuery pe, raka'e rã peve.