38
1 Senhor, ndepoxya rupi e'ỹ ke xemongeta,
ndevaia rupi e'ỹ ke xembopaga.
2 Mba'eta xere nderu'y onhexyvõ ae,
ha'e ndepo poyi xe'áry oĩ.
3 Ndepoxy ramo xero'o naexaĩvei,
xekãgue voi naexaĩvei ajejavyague re.
4 Mba'eta xeakã áry peve ajejavyague oo,
ndaropo'akavei guive mba'emo ipoyi va'e rami.
5 Xeai ivaipa rei, ipeupa ma ovy,
ajekoreague re.
6 Ojero'a rei va'e rami anhenhandu naxembaraetevei vy.
Xepy'a vai rei aikovy ára pukukue re.
7 Xekupe oiko'õ rei,
noĩvei ma xero'o rexaĩa.
8 Ajexavai aikovy, naxembaraetevei ma.
Xepy'a py nda'evei ete vy xepoaẽ aikovy.
9 Senhor, xee aipota va'e ha'e javi ndevy pe meme amboaxa,
xepoaẽa nerendu e'ỹi 'rã.
10 Xekuraxõ ma otyty atã xembaraetea opa ramo,
ndaxerexa pyxovei guive.
11 Xereve xeirũ kuery ikuai va'ekue ojepe'apa ma xemba'eaxya gui,
xeretarã kuery voi onheguaẽmba.
12 Xerekove oipe'axe va'e onhembopy'a okuapy xejopy aguã,
xevy ojapo vaixe va'e opa marã ijayvu okuapy,
ára pukukue re oikuaa pota xembotavy aguã re.
13 Ha'e rami teĩ xee ma ijapyxa e'ỹ va'e rami aendu rive,
ijayvu e'ỹ va'e rami nambovai.
14 Oendu e'ỹ va'e rami ajeapo,
xejuru ndaipe'ai ambovai aguã.
15 Mba'eta Senhor, ndee ae roarõ.
Senhor Xeruete, ndee ma xere reikuaa pota 'rã.
16 Mba'eta aipoa'e jepi: “Ha'e kuery tovy'a rei eme xere,
xepyxyry rã xerovai opu'ã rei e'ỹ aguã”, ha'e.
17 Mba'eta xee ha'a aguã rami aiko,
xejee nda'eveia aendu riae tema.
18 Ha'e rami vy amombe'u xereko vaia.
Ajejavyague py aendu mboriau.
19 Ha'e rã xerovaigua kuery ma hexaĩ ha'e imbaraete.
Heta ikuai mba'e py e'ỹ xere nda'ija'ei va'e.
20 Ha'e rami ae ikuai ojapo porã va'ekue pe ojapo vai va'e.
Xerovaigua ikuai, teko porã rupi aiko rã.
21 Senhor, xepytyvõ e'ỹ eme.
Xeruete, ejepe'a eme xea gui.
22 Senhor, xereraa jepea,
ejapura ke xerepy aguã.
Imarãa re ijayvua
Jogueroporaei va'e Jedutum pe Davi ombopara va'ekue.