55
1 Xeruete, ejapyxaka ke ajerurea re.
Endu e'ỹ eme ajapukaia.
2 Eikuaa pota ke xere, embovai xeayvua.
Ajexavai vy ndaikuaai rei,
nda'evei rei aikovy
3 xerovaigua kuery ijayvu rei ha'e
heko vai va'e xemoingo axy rei ramo.
Mba'eta xere ha'e kuery ombou xembojexavaiarã.
Xevy ipoxy vaipa vy xemomba 'rã.
4 Xekuraxõ otytypaa aendu xepy'a re.
Amano aguã gui akyjea aendu xere ou va'e.
5 Aryryipa reve aendu akyjea,
akyje vaipaa xere oĩ.
6 Ha'e rami vy xee aipoa'e:
“Apykaxu rami xepepo va'e rire
aveve avy vy ajou 'rãgue apytu'u aguã.
7 Ajava 'rãgue mombyry,
tekoa e'ỹa rupi aiko 'rãgue.
8 Ajou voi 'rãgue anhemi aguã,
yvytu vaikue ha'e yai opu'ã va'e gui”, ha'e.
9 Senhor, emomba ke xerovaigua kuery,
ejapo nhomongetaa py ndoikuaavei aguã rami,
mba'eta tetã py xee aexa joguero'a ha'e joe nda'ija'ei va'e anho.
10 Ara py ha'e pyávy ojere okuapy tetã kora yvýry rupi.
Kora mbyte py ikuai opa marã rei ha'e mba'emo vai apoa kuery.
11 Tetã mbyte oĩ 'rã nhomombaa.
Tape rupi ma ikuai nhomoingo axya ha'e nhombotavya.
12 Ha'e rami avi xerovaigua e'ỹ va'ekue ae xembojaru rei oikovy.
Ha'e rami e'ỹ va'e rire aropo'aka kuaa 'rãgue.
Ndaxerexaxei va'ekue e'ỹ xere ovy'a rei,
ha'e rami e'ỹ va'e rire ixugui anhemi 'rãgue.
13 Ha'e rami 'rãgue py ndee ava xee ramigua reiko va'e,
xereve renhemoirũ va'ekue ae,
xeirũ xepy'a py roayvuve va'e.
14 Joupive jaiko va'ekue, joupive javy'a va'ekue,
teta rupi jaa va'ekue Nhanderuete pegua oo katy.
15 Manoa tojopy voi ha'e kuery,
ha'e oikove reve toguejy yvykua py.
Mba'eta ngoo rupi mba'emo vai re anho oikuaa pota opy'a py.
16 Ha'e rã xee ma ajapukai 'rã Nhanderuete pe.
Ha'e ramo Senhor xereraa jepe 'rã.
17 Aje'ive, kuaray mbyte ha'e ka'aru'i ju
amombe'u 'rã aikotevẽ va'e ajapukai reve.
Ha'e ramo Senhor oendu 'rã xeayvua.
18 Eraa jepe ke xerekovea xerakykue monha va'e kuery gui aiko porã ju aguã,
mba'eta heta ete ikuai xerovaigua.
19 Nhanderuete oendu vy ombovai 'rã,
jypy'i guive opena va'e vy.
Mba'eta ha'e kuery re noĩ ojeko rerova aguã,
Nhanderuete renonde teĩ ojererokyjea rupi e'ỹ ikuai.
20 Ha'e va'e ava ma opu'ã hexeve peteĩ rami ikuai va'ekue re,
omboaxa rive peteĩ rami ikuai aguã ijayvuague.
21 Ijuru ma manteiga gui yxyĩve,
ha'e rã ipy'a re ma joe opu'ã aguã anho oĩ.
Ijayvua ma azeite gui iporãve merami
teĩ kyxe oekyi pyre rami nhomomba.
22 Senhor po py pemboaxa pendepy'a eta reia.
Ha'e ramo penemombaraete 'rã.
Peteĩve henda py ndoity ukai 'rã heko porã va'e.*1 Pedro 5.7 py.
23 Xeruete, yvykua vaikue py remombo 'rã
avakue tuguy moẽa ha'e nhombotavypa rei va'e.
Ha'e kuery ndoupityi 'rã oikove aguã va'ekue mbyte peve.
Ha'e rã xee ma ajerovia tema 'rã ndere.
Ojexavaia gui ombopy'a guaxu aguã re ojerurea ague
Jogueroporaei va'e pe “Apykaxu yvyra mombyrygua rupi ikuai” he'ia py oporaeia rami oporaei aguã Davi ombopara va'ekue Gate tetã py filisteu kuery ojopy ramo (1 Samuel 21.10-15).