62
1 Nhanderuete anho arõ aikovy xenhe'ẽ py, xeayvu e'ỹ re.
Mba'eta ixugui ae ou xereraa jepearã.
2 Ha'e anho oiko itaova,
xereraa jepea ha'e anhemiaty yvate va'e.
Ha'e nunga rupi ndaxereityai 'rã.
3 Peẽ kuery ha'e javive, raka'e peve tu xee peteĩ ava re pepu'ã rei 'rã xereity aguã
oo mbotya ojero'a va'e, e'ỹ vy kora ho'a rai'i va'e rami.
4 Ha'e va'e kuery xereityxe okuapy naxemboeteavei aguã.
Apu rive ha'e kuery ojou porãve.
Ojuru py ijayvu porã teĩ
opy'a py ma ijayvu vaikue-ikue 'rã.
5 Nhanderuete anho xenhe'ẽ py arõ aikovy xeayvu e'ỹ re,
mba'eta ixugui ou 'rã arõ aikovy va'e.
6 Ha'e anho oiko itaova aĩ aguã,
xereraa jepea, anhemiaty yvate va'e.
Ha'e ramo ndaxereityavei 'rã.
7 Nhanderuete gui ae ou aa jepe aguã ha'e xemboetea aguã.
Nhanderuete re oĩ xembaraete aguã ha'e itaova anhemiaty.
8 Xerevegua kuery, pejerovia hexe ára nhavõ.
Ixupe pemombe'u guive pendepy'a re oĩ va'e ha'e javi.
Nhanderuete ma nhanhemiaty oiko.
9 Avakue yvyĩgue'i ma mba'e'ỹ ikuai,
ijyvatekueve voi anhetẽ rupigua e'ỹ meme ikuai.
Mba'emo opejaa py ipoyia oexaa rã
ha'e kuery ha'e javi teĩ mba'e'ỹ va'e gui nda'ipoyive 'rã.
10 Pejerovia eme pejokorea re,
neĩ penemondaa re pevy'a eme guive.
Penemba'e rei-rei hetave ovy teĩ
ha'e nunga re rive pejerovia eme pendepy'a py.*Mateus 19.21-22; 1 Timóteo 6.17-19
11 Peteĩgue Nhanderuete ijayvu, mokoĩguea ma aendu pova'e:
Po'akaa ma Nhanderuete guigua meme.
12 Senhor, ndere anho oĩ oremboaxy aguã.
Peteĩ-teĩ pe reme'ẽ 'rã ojapoague repy.*Mateus 16.27; Romanos 2.6-16; Apocalipse 2.23
Nhanderuete jaeka aguã regua
Mboraeirã Judá regua teko e'ỹa rupi Davi oiko vy ombopara va'ekue (2 Samuel 15.1-30, 16.5-14).