71
Tuja'i ojerureague
1 Senhor, ndere ae xee anhemi va'e.
Taiko eme oxĩmba rei va'e.
2 Xereraa jepe rejoguereko porãa rupi vy, xejogua ju.
Endu ke ndeapyxa py, ha'e xerepy.
3 Ndee ma xe'itaova anhemiaty.
Ndeayvu aa jepe aguã re,
mba'eta ndee ma xe'itaova ha'e oo imbaraete va'e.*Salmo 31.1-3
4 Xeruete, xereraa jepe ke heko vai va'e po gui,
avakue heko vai va'e, porayvu e'ỹ va'e xejopy va'e gui.
5 Mba'eta Senhor Xeruete, ndee ma roarõ aikovy va'e,
xekunumi guive ndere ajerovia va'e.
6 Ndere ae ajeko va'e xetui'i guive.
Xeryru'i gui xepe'a va'ekue.
Ha'e gui ndere vy 'rãe aporaei ára nhavõ.
7 Heta pe nhomondyipaa aiko,
teĩ ndee ma anhemiaty imbaraete va'e reiko.
8 Ndevy anho 'rã aporaei,
roguerovy'a 'rã ára nhavõ.
9 Xetuja'i ma teĩ xereja eme xee ae'i.
Xembaraetea opa ramo xerepy e'ỹ eme.
10 Mba'eta xerovaigua kuery ma ijayvu okuapy xere.
Xerekovea oipe'axe va'e nhomboaty tema okuapy.
11 Ha'e vy aipoe'i: “Nhanderuete ndoepyvei ma 'rã.
Nhamonha ke, jajopy,
heraa jepearã ndoikoi ramo”, he'i okuapy.
12 Xeruete, ejepe'a eme xea gui.
Xeruete, ejapura ke xerepy aguã.
13 Ha'e rã xerekovea rovaigua kuery ma toxĩmba ha'e tokanhymba.
Ejapo ke xemoĩ vaixe va'e kuery ae oxĩmba aguã rami,
omboeteve e'ỹpy ta'ikuai.
14 Ha'e rã xee ma ndee ae roarõ ára nhavõ,
rogueroporaei riae guive.
15 Xejuru py amombe'u 'rã rejoguereko porãa,
ára nhavõ amombe'u 'rã rejogueraa jepea,
ndaikuaapai teĩ.
16 Anhenhandu Senhor Xeruete mbaraetea rupi.
Ha'e rami vy xema'endu'a jepi 'rã rejoguereko porãa re,
ndeguigua re anho.
17 Xeruete, ndee ma xekunumi guive xerekombo'e reikovy.
Ha'e gui aỹ peve amombe'u aikovy iporã ete va'e rejapo va'ekue.
18 Ha'e nunga rupi Xeruete, xereja eme,
xetuja'i ete ma, xe'a xiĩmba ma teĩ,
aỹgua kuery pe nembaraetea aikuaa ukapa peve,
ndepo'akaa guive raka'e rã ikuai va'erã pe.
19 Xeruete, ndereko porãa ma yva peve 'rã oo.
Mba'emo vaipa ete rejapo va'e, Xeruete.
Mava'e nda'u ndee ramigua ete 'rã oiko?
20 Opa marãgua teko vai ha'e jexavaia rupi xemboaxa rire teĩ
xerekovea remoĩ porã jevy 'rã,
yvykua vaikue gui xerenoẽ kuerei.
21 Xemoingo porã jevy ke,
xemombaraete ju.
22 Xee voi mbaraka py rogueroporaei 'rã.
Xeruete, xema'endu'a 'rã ndeguigua anhetẽ va'e re.
Ndevy aporaei 'rã mboraei ixã reta va'e pu rupi,
Israel kuery ruete Iky'a e'ỹ va'e pe ae.
23 Roguerovy'aa rupi xejuru py aroporaei 'rã,
xerekovea rupi voi roguerovy'a 'rã, xereraa jepe rire.
24 Xeapekũ py ára nhavõ aroma'endu'a 'rã rejoguereko porãa,
mba'eta xemoĩ vaixe va'e oxĩmba ha'e nda'evei nho okuapy.
Huvixave raka'e rã peve ipo'aka aguã re ojerurea ague
Salomão ombopara va'ekue.