88
1 Senhor ma Xeruete xereraa jepea.
Ára pukukue re, pyávy voi ajapukai ndevy.
2 Anhembo'ea tonhendu nerenonde.
Ejapyxaka ke ajapukaia re.
3 Mba'eta xenhe'ẽ py aendu opa marãgua nda'eveia,
xerekove ma manoa katy'i ma ovaẽ.
4 Yvykua katy oguejy ma ovy va'e rami xekuaa,
ava imbaraete va'e ve'ỹ ma aiko ramo.
5 Omanogue mbyte omombo pyre rami aiko,
yvykua py ojuka pyre itui va'e rami.
Ha'e kuery re ma nanema'endu'avei ma 'rã,
ha'e ndepo py nereipytyvõvei 'rã.
6 Ndee ae xemombo yvykua pukuvea py,
ijavaetevea ha'e yvykua vaikue py.
7 Mba'eta xe'áry ndepoxya ipoyi oiny,
yai py rami ndeguigua xemokangy.
8 Rejapo xerexa va'ety kuery xerejapa aguã rami,
ha'e kuery ojeguaru rei ma okuapy xegui.
Nhuã py xembo'aa rire aa jepe aguã ndaikuaavei.
9 Ajexavai ete vy ndaxerexa pyxovei ma.
Senhor, ndevy pe anho ajapukai ko'ẽ nhavõ,
ndevy ae xepo aupi.
10 Omanogue pe nda'u rejapo 'rã ri hexa pyrã?
Ha'e kuery nda'u ovypa 'rã ri ndevy oporaei aguã?
11 Ha'e kuery nda'u ituia py ijayvu 'rã ri ndeporayvua re?
Yvykua vaikue py nda'u ijayvu 'rã ri ojeroviapy reikoa re?
12 Pytũ reia py nda'u ojekuaa 'rã ri hexa pyrã rejapo va'e?
Yvy hexarai pyre ikuaia re teĩ nda'u ojekuaa 'rã ri ndereko porãa?
13 Ha'e gui Senhor, xee ma ndevy ae ajapukai xepytyvõ aguã.
Ko'ẽ te'ỹ'i re xee anhembo'e ndevy.
14 Senhor, mba'e re tu xereja ri?
Mba'e re tu xevy pe nderejexa ukavei ri?
15 Xekunumi guive ajexavaia re aiko, amano rai'i ma aikovy.
Ndee xemongyje ramo xee ndaikuaai rei aikovy.
16 Ndepoxya xere ou,
ndeguigua ngyje xemomba ta ma.
17 Ha'e nunga ha'e javi xembojere riae yy ou va'e rami,
jova-jovai gui xejoko.
18 Xerayvu va'e ha'e xeirũ kuery ma xea gui mombyry reipe'apa.
Ha'e ramo pytũa rive opyta aexa va'ety rami.
Messias ipo'aka aguã re ijayvua
Mboraeirã Ezra ramymino Etã nhombo'e aguã ombopara va'ekue.