90
1 Senhor, ndee ma ronhemiaty reiko,
ymave rupi oreramoĩ kuery ikuaia guive.
2 Yvyty oiko e'ỹ mbove,
yvy renhono e'ỹ mbove ma voi,
jypy'i guive opa peve ndee ae Senhor reiko.
3 Ndee ma avakue remombytapa ju 'rã yvy ku'i rive,
“Ha'ekue rami ju pepyta, avakue ra'y kuery”, 're vy.
4 Ndevy pe mil ma'etỹ oaxa va'e ma kuegua ára guare rami,
peteĩ hora'i pyávy oaxa va'e rami guive.*2 Pedro 3.8-9
5 Ndee ma orembotyryry 'rã yy mba'emo ogueroxyry heravy va'e rami.
Ha'e ramo oke va'e rami meme 'rã ropyta,
jai rogue aje'ive'i reve henhoĩ va'e rami.
6 Mba'eta ha'e nunga ma yvate vyve ipotypa 'rã
teĩ ka'aru jave he'õmba ha'e ipirupa 'rã.
7 Ndepoxya ma oremokanhy 'rã,
ndevaia oremondyi 'rã.
8 Mba'eta nerenonde reru orereko vaia,
nhemi rupi rojejavyague voi remoĩ nderova rexakãa py.
9 Roikoa ára ma ndepoxya rupi meme 'rã oaxa ovy,
ma'etỹa roguereko va'e ma xapy'a'i ropẽxaa rami 'rã oaxa.
10 Setenta ma'etỹ ete'i 'rã roiko.
Amongue'i imbaraeteve va'e tema oikove 'rã oitenta ma'etỹ peve'i.
Ha'e rami teĩ roiko porãvea py voi ngane'õ ha'e jexavai tema 'rã roendu.
Mba'eta roikovea oaxapa voi 'rã,
ha'e gui ma roopa 'rã.
11 Mava'eve ndoikuaai ndepo'aka etea rupi ndepoxya.
Mba'eta ndepoxya rupi orererekoa gui ma rokyje ete.
12 Orerekombo'e ke roikoa ára re roikuaa pota aguã re,
orepy'a re 'arandu oĩ aguã.
13 Senhor, eju ju!
Raka'e peve 'rã tu nerepenai?
Emboaxy ju nerembiguai kuery.
14 Aje'ive'i reve exa uka orerayvua, roporaei aguã.
Ha'e ramo rovy'a 'rã roikoa pukukue re.
15 Orembovy'a ju orembojexavaia ára oĩague rami,
mbovy ma'etỹ rei e'ỹ rojexavaia anho roendu rire.
16 Ore nerembiguai kuery pe ju tojekuaa mba'emo rejapo va'e,
ha'e oreramymino kuery pe exa uka ju nerexakãa.
17 Orere toĩ Senhor Oreruete oremboaxya.
Emoingo porã orepo py mba'emo rojapo va'e.
Tá, emoingo porã mba'emo rojapo va'e.