139
1 Senhor, ndee ma xere reikuaa pota vy xekuaa porã va'e.
2 Reikuaa 'rã aguapy ha'e apu'ã ju rã.
Mombyry gui teĩ reikuaa xepy'a re oĩ va'e ha'e javi.
3 Aguata ha'e anheno ramo ndee xerexa 'rã.
Reikuaapa 'rã aikoa ha'e javi.
4 Xeayvu aguã xejuru py oĩ e'ỹ mbove voi
ndee Senhor reikuaapa 'rã.
5 Xejoko 'rã xerakykue ha'e xerenonde katy,
xere ndepo remoĩ vy.
6 Ha'e rami xekuaapaa ma iporã ete xevy.
Yvate ete rã ndaikuaai 'rãe.*Romanos 11.33
7 Marã katy nda'u anhemombyry 'rãgue Nenhe'ẽ gui?
Marã katy nda'u ajava 'rãgue rexaa gui?
8 Yva re aa teĩ ha'e py ndee reĩ 'rãgue.
Yvykua vaikuevea py anhemboupa teĩ ha'e py voi reĩ 'rãgue.
9 Kuaray oẽa katy aveve avy vy
ye'ẽ apy peve aa teĩ
10 ha'e py voi ndepo xerereko 'rãgue,
reiporu kuaa regua xemombaraete 'rãgue.
11 Xee aipoa'e ramo: “Pytũ xeao'i 'rã,
hexakã xeyvýry rupigua pytũmba 'rã” ha'e teĩ
12 ndevy pe pytũvea ete voi napytũi 'rãgue,
mba'eta ndevy pe pytũ ha'e hexakãa ma joo rami meme.
13 Mba'eta ndee ma xepy'a apoare,
xexy rye py xemoingo va'ekue.
14 Xee roguerovy'a, anhemondyi aguã rami xeapo rire.
Nerembiapokue ma iporã ete va'e meme.
Ha'e rami aikuaa porã xepy'a py.
15 Xekãgue nderejao'i teri jave hi'ã py xeapo,
ha'e gui xembotuvixa'i imoiny yvy guy py rami.
16 Naxeratãi teri jave ndee ma xerexa.
Ndekuaxia re ipara ma voi xee aiko aguã ára ha'e javi,
peteĩ-teĩ ipara oiny peteĩve oiko e'ỹ mbove ma voi.
17 Xeruete, renhembopy'aa ma iporã ete xevy.
Mbovy rei e'ỹ oĩ.
18 Xee aipapa va'e rire ita ku'i gui hetave 'rãgue.
Aipapa, aipapa teĩ ndaipapapai 'rãgue.
19 Xeruete, remomba voi 'rãgue heko vai va'e!
Avakue tuguy moẽa, pejepe'apa xea gui!
20 Ha'e kuery ma ndere opu'ã rei okuapy,
nderovaigua kuery ijayvu vaikue-ikue 'rã.
21 Senhor, xee ajou vai ndejou vaia kuery.
Ndere opu'ã rei va'e kuery gui xee ajeguaru.
22 Ha'e kuery re ndaxea'eveia oĩmba,
nderovaigua kuery ete ikuaia aikuaa.
23 Xeruete, xerexa pota,
ha'e eikuaapa xepy'a re oĩ va'e.
Xera'anga, ha'e eikuaa anhembopy'aa ha'e javi.
24 Exa xere pa oĩ ha'eve'ỹa rami aikoa,
ha'e xerereko tape imarã e'ỹ va'e rupi.
Ngovaigua kuery apu gui oo jepe aguã ojerureague
Jogueroporaei va'e pe mboraeirã Davi ombopara va'ekue.