Mboraei iporãve va'e Cântico Salomão ojapo va'ekue
Mboraei iporãve va'e cantares Salomão ojapo va'ekue
Kova'e kuaxia para py ma ijayvu peteĩ ava ha'e peteĩ kunha reve joayvua re. “Xee ma xerembiayvu mba'e, ha'e xerembiayvu ma xemba'e”, he'i (6.3). Ha'e ramigua ayvu oĩ va'e ma iporã va'e meme.
Jypy'i Nhanderuete omenda va'e kuery oguerovy'aa rupi ijayvu vy aipoe'i va'ekue: “Avakue oeja 'rã nguu ha'e oxy, gua'yxy reve joguereko aguã, mokoĩ gui peteĩ'i to'o oiko aguã”, he'i va'ekue (Gênesis 2.24). Ha'e va'e ayvu Jesus omombe'u porãve vy aipoe'i: “Yvy itui ypy'i guive ma Nhanderuete omoingo ava ha'e kunha. Ha'e nunga rupi ava oeja 'rã nguu ha'e oxy, gua'yxy reve onhemoirũ aguã. Ha'e gua'yxy reve mokoĩ 'rãgue py peteĩ to'o ma ikuai. Ha'e rami vy mokoĩ ve'ỹ ikuai, peteĩ'i to'o ma. Ha'e nunga rupi Nhanderuete omoirũ rire avave rei tomboja'o eme”, he'i (Marcos 10.6-9).
1
1 Kova'e mboraei iporãve va'e Salomão ojapo va'ekue.
Ta'yxy ijayvuague
2 Xerayvu ndejuru py,
mba'eta vinho gui ha'eveve ndee xerayvua.
3 Nereakuã porãa aetũ rã iporã,
nderery voi heakuã va'e onhoẽ mbyre rami ha'eve va'e.
Ha'e ramo kunhataĩgue ha'e javi 'rã nderayvu.
4 Xereraa ndereve! Jaa pojava!
Xeruvixave xereraa ndero py.
Irũ kuery ijayvuague
Ndee ae roguerovy'a rovy'a etea rupi.
Rejoayvua re orema'endu'a porã 'rã, vinho gui ha'eveve ramo.
Ha'evea rami ha'e kuery nderayvu.
Ta'yxy ijayvuague
5 Kunhague Jerusalém pygua, xeũ va'eri xeporã.
Xepire ma Quedar rupi oo pirekue guigua rami huũ va'e,
ha'e ajukue Salomão ro py oĩ va'e rami.
6 Pema'ẽ ngatu eme xepire huũa re,
mba'eta kuaray ae ma xemoũmba.
Xekyvy kuery xemotare'ỹ rei vy
xemondouka karamboae uvaty re apena aguã.
Ha'e rami rã xemba'e uvaty re ma xee napenai.*“Xemba'e uvaty re napenai” he'ia ma ojee ae ijayvu vy, ipire kuaray omoũmba ramo.
7 Ha'e gui ndee xerekovea rembiayvu, emombe'u xevy:
Mamo tu remongaru 'rã herekovy nerymba kuery?
Mamo tu remombytu'u 'rã kuaray mbyte jave?
Emombe'u ke, xee roekaa rupi avaẽ e'ỹ aguã
neirũ kuery guymba re openaa py.
Ime ijayvuague
8 Kunhague pavẽ gui neporãve va'e, ha'e nunga ndereikuaai ri vy
tereo ha'vy mymba kuery pypo rupi,
ha'e emongaru nerymba kavara kuery vexa'i re opena va'e kuery ikuaia rupi.
9 Xerembiayvu, neporã vaipa
kavaju kunha Faraó mba'e karóxa regua rami.
10 Nderova ma iporã nenamixã mbyte,
ndeaju'y voi mbo'y oĩ reve.
11 Ndejeguarã rojapo 'rã ouro gui,
prata py ijeguapa va'e gui voi.
Ta'yxy ijayvuague
12 Xeruvixave okaruaty py oĩa py
oetũ 'rã oiny xereakuã porãa.
13 Xevy pe ma xerembiayvu iporã
heakuã porã va'e ryru xekã mbyte oĩ va'e rami.
14 Yvoty En-Gedi katy uvaty ikuai va'e rupi henhoĩ va'e rami,
xevy pe xerembiayvu ha'e rami ae ha'eve.
Ime ijayvuague
15 Ma'ẽ xerembiayvu, ndee ma neporã.
Nderexa voi apykaxu rexa rami iporã.
Ta'yxy ijayvuague
16 Xerembiayvu, ndee voi neporã, roayvu.
Nhanderupa ma jai rogue pyau guigua.
17 Nhandero yta rami guarã yary ikuai,
ha'e rã yvyra ijao'ia ma cipreste guigua.