1 Jesus ben-marneyimeng, “Minj ngurri‑njilng-warremen. Ngurri-woybukwo Kod, kandi‑woybukwo ngayi. 2 Kure ngardduk Ngabbard nuye kunred kubolk-kimuk. Kure woybukki ngayi marneyime ngudberre. Ngayi nga-rrokme nga-bolkmarnbun ngudberre. 3 Ngayi nga-yingkih-bolkmarnbun ngudberre ngayeman ngam-durndeng mang ngudberre, ba karri-djarrk-ni kure ngayi ngah-ni. 4 Ngudda ngurri-bengkan kure manbolh ngayi nga-re.”

5 Tomas bi-marneyimeng, “Yi-worhnan, ngad minj ngarri‑bengkan baleh kunred yi-re, ngad minj ngarri‑bengkan kure manbolh yi-re.”

6 Jesus bi-marneyimeng, “Ngayi nawu manbolh, ngayi nawu woybukki, ngayi nawu kundarrkid. Nangale nawu ka-re kure Ngabbard, nakka wanjh kam‑re kure ngayi werrk, kumekke wanjh ku-djal-kudji manbolh kure Ngabbard. 7 Kunyungki minj kandi-bengkayinj, bolkki wanjh kandi‑bengkan ba kunukka ngurri‑bengkan ngardduk Ngabbard warridj. Bolkkime wanjh ngudda ngurrih‑bengkan, ngurri‑nan nungka.”

8 Filip bi-marneyimeng, “Yi-worhnan, mah! Kan‑bukka ngadberre Kod nawu Ngabbard ba ngarri‑nan bolkki. Kunekke ngad ngarri-djare.”

9 Jesus bi-marneyimeng, “Filip, ngayi bu korroko karri‑djarrk‑wam kunred la kunred. Ngayi minj kan‑kukburrknan ngayi? Nangale ngan-nang ngayi wanjh nakka kabi-nan Kod Ngabbard. Njale-kenh ngudda yi-djawayhme bu yi-yimeng ‘Kan-bukka Kod nawu Ngabbard’? 10 Ngudda minj yi-wernh-bengkan bu ngayi ngah-ni kunkange nuye Kod nawu Ngabbard nungka kah-ni kunkange ngardduk. Mane kunwok kure ngayi marneyime ngudberre minj ngayi ngardduk. Nungka Kod nawu Ngabbard kah-ni kunkange ngardduk wanjh nungan ka-rrurrkmirri kure njale ngayi nga‑kurduyimeng.

11 Kandi-woybukwo kure ngah-yime ngudberre kure ngayi ngah-ni kure kunkange Ngabbard, mak Ngabbard kah-ni kure kunkange ngardduk. Mak kandi-woybukwoyinj kure kandi-ngudj-nang nga‑marnedurrkmirri nuye Ngabbard.

12 Woybukkih, woybukkih marneyime ngudberre, birri‑ngale bininj nawu ngayi ngandi-woybukwon, wanjh bedmanwali kabirri‑durrkmirri bu ka-rohrok yiman ngayi ngah-marnedurrkmirri. Ngayi nga-re kure Kod nawu Ngabbard. Wanjh warridj kabirri-durrkmirri bu kunmakmak ngayi ngah‑marnedurrkmirri!

13 Ngudda ngardduk bininj kandi-ngey-woybukwon wanjh ngudda ngurri-djare kandi-djawan njaleh-njale, wanjh ngayi marnedurrkmirri ngudberre. 14 Yoh. Ngudda ngurri-djare njaleh-njale nawu kandi‑djawan kure kunngey ngardduk, wanjh kunekke ngayi nga‑djal‑durrkmirri kure kandi-djawan.”

15 Jesus ben-marneyimeng bedberre, “Bu ngayi kandi-marnedjare bulkkidj, wanjh kunukka kandi-wokmarrkmang. 16 Kaluk ngayi nga-djawan nawu Ngabbard Kod ba bu ngun-won ngudberre kuk-buyika kungudj nawu ngun-bidyikarrme ngudberre, kure ngurri-djarrkdi munguyh.

17 Namekke wanjh Nawaralmakkaykenh kure kabi-yolyolme Kod bu kunwoybuk dorrengh, kure ngurri-bengkan. Bininj nawu birri-kang kure kukurlk, wanjh bedda minj kabirri-mang Nawaralmakkaykenh. Kure ka-ngimeng bedberre. Ngudda ngurri-kudji ngurri-bengkan bu nungka ngurri-djarrk-re ka-ni kukange ngudberre.

18 Ngayi minj bawon ngudberre bu ngurri-mayahmey yiman ka-yime ngurri-marladj. Ngayi werrk ngam-durndeng ngudberre.

19 Kune bu bolkkime darnkih kabolk-yimerran bu minj ngandi-yawoyh-nan nawu bininj birri-kang kondanj kukurlk. Ngudda ngurri-djal-kudji kure kandi-nan. Ngayi nawu nga-djal-darrkid-di, wanjh kaluk kunekke-kenh ngudmanwali ngurri-djal-darrkid.

20 Ba kumekke ngurri-bengkan bu kune ngayi nga-ni kure Kod nawu Kornkumo kukange nuye, mak ngudda ngurrih-ni kure ngayi kukange ngardduk, mak ngayi ngah-ni kure kukange ngudberre.

21 Nangale nawu bininj ngan-marnedjare, nakka wanjh bengkang mankarre ngardduk. Ngan-wokmarrkmang. Nawu nangale bininj ngan-marnedjare ngayi, wanjh Ngabbard ngardduk nunganwali kabi-marnedjare namekke bininj. Ngayi warridj nga-marnedjare. Wanjh nga-marne-kukbukkarren kure nungka nuye.” Mane wanjh Jesus yimeng.

22 Wanjh Djudas nawu nabuyika yimeng. Minj nawu Djudas Iskariot, bi-djawam Jesus, yimeng, “Yiworhnan, njale-kenh bu ngudda yi-kukbukkarren ngadberre, mak birribuyika bininj kukurlk kabirrih-ni minj yiben-marne-kukbukkarren bedberre?”

23 Jesus yimeng, “Nangale nawu bininj ngan-marnedjare, wanjh nakka ka-kurduyime kure ngayi nga-bukkabukkan. Nawu ngardduk Ngabbard kabi-marnedjare namekke bininj. Wanjh ngayi, ngardduk Ngabbard nganem-yikan bu ngarri-djarrk-di namekke bininj.

24 Nangale nawu minj ngan-marnedjare, nakka minj ngan-wokmarrkmang kure nga-bukkabukkan. Mane wanjh kunwok nga-wokdi, minj ngayi ngardduk. Nuye Kod nawu Kornkumo ngardduk ngan-munkeweng.

25 Ngayi marne-marneyime ngudberre bu bolkkime karrih-djarrkdi.

26 Kaluk rerrih nawu God nawu Kornkumo kabi- munkeweng ngudberre Nawaralmakkaykenh bu ngun-bidyikarrme ngudberre mak ngun-bukkabukkan ngudberre kuwern kure ngayi ngardduk, mak ngun-bengdayhke ngudberre bu kunwok rowk bu ngayi korroko marneyimeng ngudberre.

27 Ngayi yibawon ngudberre kunkange dorrengh. Ngayi won ngudberre kure ngurri-kuk-manonma. Bininj nawu birri-kang kukurlk-beh minj ngundi-won ngudberre kunkange. Minj ngurri-njilng-warremen.

28 Ngayi wanjh korroko marneyimeng ngudberre bu ngayi nga-re bawon ngudberre, kaluk ngam-yawoyh-durndeng ngudberre. Bu ngudda kandi-marnedjare ngayi wanjh ngurri-njilng-makmen munguyh bu ngayi wanjh bawon ngudberre, nga-re kure Kod nawu Kornkumo ngardduk nawu na-ngudjkimuk duninjh kure ngayi.

29 Bolkkime wanjh ngayi bengdayhke ngudberre, bu kaluk ngurri-nan rerre ngan-marne-bolkyimerran, wanjh kumekke kandi-woybukwon.

30 Minj marneyime ngudberre bolkkime. Korroko wayarra kamh-re nawu ngan-mang. Nungka ka-worhnan kondanj kure kukurlk. Nungka minj ngan-marne-worhnan ngayi. Kayakki!

31 Ngayi nga-wokmarrkmey rowk kure nawu ngardduk Ngabbard kure ngan-wokrayekwong. Kunekke-kenh bininj rowk kabirri-bengkan kure ngayi nga-marnedjare Ngabbard.

Mah, karrim-dolkka rowk, karri-bolk-bawo kondanj kure kunred, wanjh karri-re.”