Ⅱ
Ana okomotogia Omonene
Ⅰ 2:1: Luk 1:46-55Ana agasaba, agakwana,
“Enkoro yane yachengeire Nyasae;
ase Omonene egetuureri kiane kiaimokereire igoro.
Omonwa one nigo ogosekereria ababisa baane;
nagokire ase ogotooreka kw’Omonene.
Ⅱ “Onde tari ore omochenu buna Omonene,
onde tari buna ere,
egetare kende tikeri buna Nyasae oito.
Ⅲ Timogenderera gokwana amang’ana yobwerori,
oboenenu tiborua ase emenwa yaino.
Omonene nigo are Nyasae oyomanyete onsi,
ere nigo akorenga onsi ay’abaanto bagokora.
Ⅳ Amata yabaanto chituoni abunekire,
korende abakogochwa babeekirwe chinguru.
Ⅴ Abanto ababwate endagera eisaine kare
bono beruure gokora emeremo, erinde banyore endagera,
nabwo baareenge n’enchara, baigotire bono.
Omokungu orenge omogomba oiboire abana batano na babere,
korende oria konya obwate abange otigaire ore bosa.
Ⅵ Omonene nigo agoita, naende oirania obogima;
ere nigo agotoma abanto gochia aase abakuure,
naende obabokia.
Ⅶ Omonene nigo agokora omonto oba omotaka, gose omonda,
ere nigo agokeyia omonto, gose omoimokereria igoro.
Ⅷ Nigo akoimokia omotaka korwa ase obotaka bw’ebuse,
na omoremerwa korwa ase ribu,
obabeeka baikaransa amo nabwo bare n’okobua,
na kobaa omwando bw’ebirogo bi’obonene.
Oboroso bw’ense nobwa Omonene,
na igoro y’oboroso obwo oterekereire enseo.
Ⅸ “Narende amagoro yabegenwa baye,
korende abakori amabe nigo barasirigwe ase omosunte,
onde tari orabue ase chinguru chiaye ere omonyene.
Ⅹ Abare mamincha y’Omonene ’nabasenyentwe,
Omonene nabaake n’enkoba korwa igoro.
Ere nanachere ense yonsi ekiina.
Omonene nae omorwoti oye okobua
na aimokererie igoro orogunchara rw’omoakwa amaguta oye.”
Ⅺ Erio Elikana akairana gochia Rama nka bwoye, korende omwana oria Samweli agatigara ogokorera Omonene inse y’oboteneneri bwa Eli Omokuani.
Abamura ba Eli
Ⅻ Abamura ba Eli nigo baareenge Abanto ababe bataroochi inchera. Tibaasigete Omonene, ⅩⅢ na tibare gokora buna abakuani bagwenerete gokora ase Abanto. Ribaga ri’ayio, ekero omonto aruure ekeng’wanso kiaye, omosomba bw’Omokuani nigo areenge gocha abwate euma ere namaino atato, na ekero enyama egendererete koiyekwa, ⅩⅣ omosomba oria aba ogosoyia euma eria ime ase esuguria, gose enyongo, gose ase gento kende enyama ekoiyekerwa ime yaye, ne chinyama chionsi areenge korusia neuma eria nigo chiareenge koirerwa Omokuani. Naboigo abakuani abwo baarenge gokorera Abaisraeli bonsi baarenge gocha agwo Silo. ⅩⅤ Amo nayio, ekero enyama enoru etarayia, omosomba bw’Omokuani nigo areenge gocha oteebia omonto oria orenge korua ekeng’wanso, “Kae Omokuani enyama achie gosaamba, ekiagera tagwancha enyama enyiyeke; igo anchete enyama embese.”
ⅩⅥ Onye omonto oria oreenge goteebia omosomba oria, “Tiga tosaambe enyama enoru ritang’ani, erio magega omanye koira enyama ende yonsi oganetie,” nere igo areenge goteeba, “Yaya, taibo, goika oyeeng’e bono iga. Onye tokong’a enyama eyio, rirorio nigo nkoyerusia ne chinguru, ’nyeire.”
ⅩⅦ Ebibe ebi bi’abamura ba Eli nigo biareenge ebinene mono ase obosio bw’Omonene, ekiagera ase enchera eyio Abanto nigo beorokereretie gochaaya ebing’wanso bia Omonene.
Samweli agwo Silo
ⅩⅧ Samweli akagenderera gokora emeremo ase obosio bw’Omonene. Ere nigo areenge omosae ore kobeeka egesibao ki’egatani. ⅩⅨ Kera omwaka ng’ina nigo areenge komooroiseria eanga, omoirera ekero areenge kogenda amo nomosaacha oye gochia korua ekeng’wanso gia kera omwaka. ⅩⅩ Erio Eli nigo areenge koba ogosesenia Elikana na mokaye, ateebia Elikana, “Omonene asesenie omokungu oyo akoiborere abana bande babe ribaga ri’omwana oyo gwatananete ase Omonene.”
Erio baba bakoirana gochia nka.
ⅩⅪ Omonene agasesenia Ana, ere akaibora abana bande abamura batato na abaiseke babere. Omwana oria Samweli akaba ogokiina ore ase enyomba y’Omonene.
Eli na abamura baye
ⅩⅫ Bono Eli konya ogotire mono. Ere nigo abeete okona‐koigwa amang’ana onsi abamura baye baare gokora ase Abaisraeli bonsi, na buna baare gotomana nabakungu abaareenge gokora emeremo ase egesoero ki’Eema y’Omosangererekano. ⅩⅩⅢ Erio akabateebia: “Nase ki mogokora amang’ana buna ayio? Abanto bonsi banteebirie amabe aino mogokora. ⅩⅩⅣ Abana baane, tiga timokora bo. Chinkuma echio naigure ase egati y’Abanto ba Omonene tichiri chingiya. ⅩⅩⅤ Omonto karakore ebibe ase omonto onde, Nyasae nabe omobwatania, korende omonto karakore ebibe ase Omonene, ning’o oranyare koba omobwatania?”
Korende barabwo tibaigwerete ise, ekiagera Omonene konya oganirie kobaita.
ⅩⅩⅥ 2:26: Luk 2:52Bono omwana oria Samweli akagenderera gokiina ase omobere, akamogwenera Omonene na mwanyabaanto.
Obobani igoro ya Eli na Abanto b’eamate yaye
ⅩⅩⅦ Omonto oyomo o Nyasae agacha ase Eli, akamoteebia: “Amang’ana aya nar’Omonene akwanire: Inee! Inche tineorogetie ase sokororia yao na ase ororeeria rwaye, ekero baareenge abasomba ba Farao agwo ase ense ya Misiri? ⅩⅩⅧ 2:28: a Okong’ 28:1-4; b Abal 7:35,36Tinabachorete inwe korwa ase ebisaku bi’Abaisraeli mobe abakuani baane, na morue ebing’wanso ase egesasiimero kiane, naende mosambe ubani na mobe mokobeeka egesibao ki’obokuani komogocha ase obosio bwane? Tinaete Abanto b’ororeeria rwa sokororia yao baire ebing’wanso bionsi Abaisraeli baare gosaamba n’omorero? ⅩⅩⅨ Nase ki rende mwabeire mogochaaya na koba ne ribero ase ebing’wanso biane, na okoruegwa kwane, nachiigete birentwe ase Obomenyo bwane? Aye Eli kwaeire abamura bao ogosika kong’etania ase okobaa ribaga kwenoria ase eyere enoru mono kobua, ase kera ekeng’wanso abanto baane Abaisraeli bakonduera. ⅩⅩⅩ Ase engencho eyio, inche Omonene, Nyasae bw’Abaisraeli, nateebire iga: Nigo nariete eira ng’a abanto b’eamate yao, na ab’ororeeria rwa sokororia yao mbabe bagokora emeremo y’obokuani ase obosio bwane kogenderera botaambe. Korende bono nigo ngoteeba ng’a tinyancheti bo, ekiagera abanto bansigete, nainche nimbasike, na baria banchaayete, nabarabwo mbachaywe goetania. ⅩⅩⅪ Naama! Amatuko ngocha are, ekero ndasirie chinguru chiao ne chinguru chi’abaanto b’ororeeria rwa sokororia yao, erio tanyorekana omonto omogotu ase eamate yao. ⅩⅩⅫ Aye ekero ore nemechando norore obotenenku boraruegwe ase Abaisraeli, na igo aye nobe ne ribero, korende ase eamate yao omonto omogotu tagotokao. ⅩⅩⅩⅢ Tinkorusia kera oyomo oino korwa ase egesasiimero. Oyo ntarusie korwao nigo arabe okogoukoria amaiso, na goichania enkoro yao, na abanto bonsi b’enyomba yao nigo barakwe bataragota. ⅩⅩⅩⅣ 2:34: 1 Sam 4:11Abamura bao babere, Hofini na Finehasi, nigo barakwe ase rituko erimo, na ayio nabe ekemanyererio asore ase aya nakwanire. ⅩⅩⅩⅤ Ninyechorere Omokuani omwegenwa, oyorabe ogokora ogwancha kwane na onsi aya nganetie. Oyio nere ndae ororeeria rwaye roraabe rogotenena bokong’u, na abanto b’ororeeria rwaye mbagenderere gokora emeremo y’obokuani ase obosio bw’omoakwa amaguta one. ⅩⅩⅩⅥ Nebe ng’a omonto onde bwensi ase eamate yao oratigare ore moyo nagende gotugama ase obosio bw’Omokuani oyio, amosabe amoe ebesa gose omogati, ogoteeba: Nagosabire ombeeke nainche nkonye ase emeremo gete y’obokuani, erinde inyore omogati nkoria.”