RIRUUBE RI’ERITANG’ANI RIA PAULO OMOTOMWA ASE
ABATESALONIKI
Ogochaakera
Tesolonika nigo orenge omochie omonene bw’ense ya’barumi ase orogongo rwa Makedonia. Paulo agachaaka ekanisa aa ase omochie o Tesolonika ekero aruete Filipi. Ekero Abayahudi baroche emeremo emiya eyio paulo arenge gokora yokorandia barabwo tibagokigwa nere erio bakamochaaka ebitina neyio ekabetereria kong’anya korwa Tesolonika gochia ense ya Berea. Ekere Paulo aigete Korinto, Timoteo oyio orenge omokoreri amo nere ase emeremo yenchiri akamotomera amang’ana igoro yemeremo emiya eyio yagendererete agwo Tesolonika na buna ekanisa ya Tesolonika yagendererete gokina.
Paulo akagokigwa nemeremo eyio emiya erio akabetererigwa koriika riruube rieritang’ani gochia ase Abakristo ba Tesolonika erio kobabeeka chinguru na kobaenekeria igoro yogotoreka kwabo. Paulo akabaakera mbuya mono ase engencho yokwegena kwabo boigo nobwanchani babwate. Boigo nigo akobainyoria igoro yobogima obwo amenyerete ekero arenge nabarabwo. Ase riruube eri, Paulo nigo akoiraneria amaborwo ayio arenge koborigwa ase ekanisa igoro yogocha kwa Yeso boigo nensemo yabaria bakuure magega Yeso atarairana eriakabere. Paulo nigo akoenekeria Abatesolonika ng’a Yeso nkoirana are ekeene ase igo bagenderere gokora emeremo bare nogosemeria ase okoirana eriakabere kwa Yeso.
Okobagwa kw’egetabu eke
Ogochaakera 1:1
Okoiraneria ng’a mbuya mono na ogotogia 1:2—3:13
Ogokuurerwa gw’okoba norogendo rogwenerete Abakristo 4:1-12
Ogotebereria igoro y’ogocha gwa Kristo 4:13—5:11
Ogokuurerwa kw’omoerio 5:12-22
Ogokoorera 5:23-28
Ⅰ
Ⅰ 1:1: Ogok 17:1Inche Paulo amo na Silivano na Timotheo nkobariikera tore inwe abekanisa y’Abatesaloniki, abamore ase Nyasae Tata na ase Omonene Yeso Kristo:
Obuya bobe ase more na omorembe.
Okwegena kw’Abatesaloniki na ekiorokererio kiabo ekiya
Ⅱ Botambe nigo togoakera Nyasae ng’a mbuya mono ase engencho yaino mwensi, na kobaatora ase ogosaba gwaito. Ⅲ Na intwe ase obosio bwa Nyasae Tata oito titori gotiga koinyora emeremo yaino ase okwegena, na ogwechanda kwaino ase obwanchani, na oboremereria bwaino ase okomosemeri ’Omonene Yeso Kristo. Ⅳ Naki abaminto, abamwanchire na Nyasae, twamanyire ng’a ere obachorire. Ⅴ Naki intwe titwabarenterete enchiri yaito ase amang’ana oka, korende boigo nase chinguru, na ase Omoika Omochenu, na ase okobaraa gochia ase obomaene oboikeranu. Na inwe momanyete chingencho chiaito buna twarenge ase egati yaino ase engencho yaino. Ⅵ 1:6: Ogok 17:5-9Inwe mokaba abegi baito, na ab’Omonene, na nonya mwachandegete mono, mwanyorete ring’ana amo nomogooko okorwa ase Omoika Omochenu, Ⅶ na igo mokaba ekiorokererio ekiya ase abegeni bonsi ba Makedonia na Akaya. Ⅷ Naki korwa ase more ring’ana ri’Omonene riaigurwe, tari ase Makedonia na Akaya oka, korende amang’ana akumire kera aase, ng’a imomwegenete Nyasae. Ase igo titogwenereti gokwana ring’ana rinde rionsi. Ⅸ Naki barabwo abanyene baorokirie amang’ana igoro yaito, buna twasoete ase egati yaino, na buna inwe mwaonchokerete Nyasae korwa ase emegwekano y’ogosasimwa, erinde mokorere Nyasae ore moyo, oyo bw’ekeene, Ⅹ na moganye Omwana oye korwa igoro, oyio ere abogetie korwa ase abakuure, nere Yeso, oyototooretie korwa ase endamwamu egochi‐gocha.