EBIBILIA ENCHENU EZEKIELI Ⅰ

EGETABU KIA

EZEKIELI

Ogochaakera

Omobani Ezekieli nigo akorete emeremo yaye y’obobani gochakera omwaka 593 (1:2) goikera korengana omwaka 563 nyuma Yeso ataraiborwa. Ase omwaka 597 nyuma Yeso ataraiborwa, Ezekieli amo n’Omorwoti Yehoyakini amo n’abanto b’engencho ba Yerusalemu, bakairwa obosomba ase ense ya Babiloni. Ezekieli akarandia amarandio aye ekero are aroro. Amarandio ayio nigo arengete baria bang’anyetigwe boigo na baria batigarete Yerusalemu. Nyuma y’okoboerwa kw’omochie o Yerusalemu ase omwaka 586 nyuma Yeso ataraiborwa, amarandio y’Ezekieli nigo arengete ogokuurera abanto igoro y’ogosarigwa kware gochia gocha ase engencho y’ebibe biabo; korende nyuma y’okoboerwa kw’omochie o Yerusalemu, akabaremia abanto bamwabo, akabaa ogosemeria kw’amaya are gochia gocha.

Ezekieli nigo anyorete amarandio aye amange y’obobani goetera ase amaroro buna tokoorokigwa korwa ase egetabu kiaye. Amang’ana aye ase chingaki chinyinge nigo akoyakwana goetera ase enchera y’amaroro nase enchera y’emegwekano erio koorokia engencho y’amarandio ayio. Amang’ana y’emegwekano eyio nigo akororekana ase tore buna emegano gose amageni. Nonya n’enchera Ezekieli amanyete nigo ere ekiorokererio.

Amang’ana y’Ezekieli

1. Omobani Ezekieli nigo akobeka amang’ana aye chinguru na goteeba buna ere nigo araetwe na Nyasae n’Omoika oye gokora emeremo yaye.

Ase chingaki chinyinge goetania ababani bande bonsi Ezekieli nigo akoirora irora engencho eyio ase amang’ana aya: Ring’ana ri’Omonene nigo riangichera (ara 45 ase amang’ana aria 60 ayio agokwanwa n’Ababani).

Ase enchera yabeene mono ase egetabu eke ntobwate: Nkabwatwa n’echinguru chia Omonene (ring’ana ase ring’ana ’okoboko kwa Nyasae gokaba igoro ase inde) 1:3; 3:14; 3:22; 33:22; 37:1; 40:1. Amang’ana y’engencho mono ayio engencho yaye ere koirwa gose goichorigwa chinguru ch’Ekebonyasae. Ase ande ime ya Bibilia amang’ana ayio nigo akonyorekana Yos 4:24; 1 Abarw 18:46; Ezra 7:6,8; Luka 1:66; Ogokor 11:21.

2. Nyasae nare n’okobua, ere nigo akorora kera egento kere ase ense (Egesieri 1). Ase obweng’e amanag’ana y’amabororo y’Ezekieli ase egesieri eke egekong’u n’okoorokia obonene bwa Nyasae obwo botatangwe n’oboenenu bwa Mwanyabaanto. Nyasae nabwate okobua ase ense yonsi. Mwanyabaanto n’omonto bosa igo, nonya n’Ezekieli Nyasae nigo akomoroka “omonto” (ring’ana ase ring’ana “omwana Omwanyabaanto”).

3. Omobani boigo nigo agotomanyia buna ogokora gwonsi kwa Nyasae nkobwate engencho yaye yabeene: abanto bamanye buna ere nere Omonene. Amang’ana ayio nigo agokwanerwa ase egetabu eke ase obweng’e ara 46 igoro ya 60 ase ebiblia yonsi. Goetania egetabu gia Ezekieli, egetabu gi’Okonganya nakio kebwate amang’ana ayio (ara 7), aa nigo akoigwekana buya mono ase engencho egetabu eke kebwate amang’ana y’engencho mono igoro y’egekorwa kia Nyasae ki’ogotoria abanto baye korwa Misiri. Nyuma yogokwana aya na kogwekania nekeene ng’a aya naro amang’ana amanene y’Ezekieli, ng’a abanto mbamanye nga Nyasae nere Omonene. Okomanya okio tikoganeti osome korende nogoitaba nga ekeene ere Nyasae bw’ogokora: nigo akorwa egesusuro tari rioka ase Abaisraeli korende nonya nase abanto b’ebisaku binde. Goetania igo nere bweka okorongeyia nakobaa obogima (egesieri 37); oy’okorongeyia na kobaa oboamate oboyia (40-48).

4. Kera omonto nigo akonyora egesusuro korengana n’amamocho aye omonyene (egesieri 18). Kera omonto nakwe gose konyora egesusuro korengana n’okomocha kwaye omonyene. Egesaku keria kerabwatie amachiiko Omonene tigekonyora egesusuro ki’ebibe bi’echisokoro chiabo na kegori kende gionsi kerache magega tikegocha koegwa egesusuro buna ase engencho chisokoro chiabo nigo chiarenge chingiya (14:12-23; 18:1-32; 33:1).

Nyasae n’abarai b’Abaisraeli

Ekemo kiabo ase amang’ana y’engencho mono y’omobani Ezekieli naria agokwanera igoro y’oborai bw’abarai b’abaanto ba Nyasae, egesieri 34 nakio kegokwanera mono igoro y’amang’ana ayio. Oyore omorai bw’abaanto ’Nyasae omonyene. Abarai b’abaanto ba Nyasae nigo baganeirie gwechandera obogima bw’abaanto mono kobua gwechandera obogima bwabo barabwo abanyene. Ogotaikerania emeremo yabo nkogere baegwe egesusuro nakourwa oborai obwo. Ring’ana ri’oborai bw’abaanto ba Nyasae ndire boigo ase ababani bande boigo na kobwekania Nyasae buna Omorisia omuya bwe ching’ondi n’ekemo ki’ebiorokererio ebiya ime ya Bibilia.

Egetabu eke nigo kebagire ase chinsemo ibere chinene.

1. Egesieri 1-32 Nigo bigokwanera igoro y’ensemo y’eritangani nyuma y’ogosarigwa gw’Hekalu n’omochie o Yerusalemu. Ase ensemo eye, egesieri 4-24, omobani nigo agokuurera abanto ba Israeli igoro y’obobe bwabo kobua mono gotaba abegenwa ase Nyasae obo (6:13; 16:20; 20:23-28; 23:37-38). Boigo nigo akobakuurera igoro y’okomenya obogima obobe bw’ebibe nobounereria (22:11-12). Ase obonge ebisusuro bikorarigwa ase ebisieri 25-32 ase ebisaku binde, nigo biararetigwe boigo ase ensemo eye y’eritangani na okonde ase ensemo yakabere. Ebisaku ebio binde nigo bikorarerigwa egesusuro ase oborianania bwabo boigo nakounereria Abaisraeli.

2. Egesieri 33-48 ange amang’ana onsi ase ensemo eye nigo agokwanera mono igoro y’ensemo yakabere y’obokoreri bw’omobani. Ase obweng’e ensemo eye nigo egwachandera mono koa Abaisraeli baria bairetwe obosomba ogosemeria (33-39). Boigo ase 40-48 nigo tokorora amaroro ayio omobani aorogetigwe igoro yokobao naende kwa Nyasae ase Hekalu Yerusalemu, gati y’abanto baye abwo naende bakobagerwa ense yabo ase oboyia. Egetabu eke nigo kegokorera ase amang’ana amarito: Erieta ri’omochie nigo rirabe “Omonene noo are aiga.” Ring’ana igoro y’okoirania oboamate obuya gati ya Nyasae n’abanto baye nigo rikoegwa chinguru mono ase ensemo eye nonya rikwaneire ase ensemo y’eritangani.

Okobagwa kw’egetabu eke:

Okorangerigwa gwa Ezekieli 1:1—3:27

Amang’ana ay’okonachera Yerusalemu ekiina 4:1—24:27

Nyasae okonachera abanto b’ebisaku ekiina 25:1—32:32

Eira ya Nyasae ase abanto baye 33:1—37:28

Obobani mamincha ya Gogi 38:1—39:29

Okorora igoro ye Hekalu na ense bigochi‐gocha 40:1—48:35

Okorora Kw’eritang’ani gwa Ezekieli Korwa Ase Nyasae

Ⅰ

(1:1—7:27)

Ekerogo ki’obonene kia Nyasae

Ⅰ Ase rituko ria gatano, omotienyi o kane, omwaka bw’emerongo etato, ekero inche Ezekieli namenyete ang’e norooche rwa Kebari amo nabooswa bande, igoro ekamaanoka, nkarora amaroro akorwa ase Nyasae. Ⅱ Ee, ase rituko ria gatano ase omotienyi oyio, omwaka o gatano bw’ogwoswa kwa Yehoyakimu omorwoti, Ⅲ ring’ana ri’Omonene rigaacha asende inche Ezekieli Omokuani, mosinto o Busi, agwo ang’e norooche rwa Kebari, ase ense y’Abakalidayo, na okoboko kw’Omonene gokang’ikera aroro.

Ⅳ Ekero narigereretie nkarora ekembugu‐mbugu gekorwa sugusu. Riire rinene riaare gwoka omorero rigaacha, na obomeka‐meku bokarietanana ase chinsemo chionsi. Boigo korwa ime ase omorero oyio, obomeka‐meku bonga buna obw’etai bokarorekana. Ⅴ Korwa ase egati y’omorero oria bikarorekanao ebitongwa bine bire moyo. Oko nakwo kwarenge okororekana kwabo: Nigo biagwekaine Mwanyabaanto, Ⅵ korende kera ekemo nigo kiabwate amasio ane, ne chimbaaba inye. Ⅶ Amagoro abo nigo arongeete, na ebisanyi bi’amagoro abo nigo biagwekaine ebi’emori. Ebitongwa ebio nigo biarenge komeka‐meka buna etai ekomeka‐meka. Ⅷ Inse ye chimbaaba chiabo, ase chinsemo chiabo inye, nigo biabwate amaboko buna aya Mwanyabaanto. Amasio abo ne chimbaaba chiabo nigo biarenge iga: Ⅸ Chimbaaba chiabo nigo chiakunaine, na ebitongwa biria tibiarenge koonchoka, korende bikaba bikogenda gochia bosio rioka.

Ⅹ Okororekana kw’amasio a kera ekemo ki’ebitongwa ebio bine nigo kwarenge iga: Amasio abo a bosio nigo arenge buna aya Mwanyabaanto, na aya a borio nigo arenge buna aye chindo, na aya a bomosi nigo arenge buna aye chiombe; boigo kera ekemo nigo kiabwate obosio buna obw’ebiongo. Ⅺ Amasio abo nabo arenge igo. Chimbaaba chiabo nigo chiaramboire gochia igoro; chimbaaba ibere chia kera ekemo chigakunana nechi’ekende, na ibere chinde chia kera ekemo chigatuba emebere yabo. Ⅻ Kera ekemo gekaba gekogenda gochia bosio rioka; aase omoika orenge kogenda gochia, nao biarenge kogenda. Ekero biarenge kogenda tibiarenge koonchoka, korende bikaba bikogenda bosio rioka.

ⅩⅢ Okororekana kw’ebitongwa ebio nigo kwarenge buna omorero bw’amakara ogwoka buna ebimore bigoetanana ase egati yabo. Omorero oria nigo orenge komoreka mono, na korwa ase omorero oyio okomesa gw’enkoba gokaruao. ⅩⅣ Erio ebitongwa biria bire moyo bikaba bikominyoka gochia aaria na aaria, buna okomesa gw’enkoba.

ⅩⅤ Ekero narigereretie ebitongwa biria, nkarora amagoro ’egari ane, kera okomo kore bosio bwa kera egetongwa goteneine inse. ⅩⅥ Amagoro ayio onsi nigo areng’aine. Ebieni biabo nigo biarenge buna berulo, rigena rikomeka‐meka. Kera okogoro nigo kwaroisirie kogasoanigwa nokonde. ⅩⅦ Ekero amagoro ayio arenge kogenda, nigo arenge kogenda ase chinsemo inye chionsi, tarenge koonchoka, akaba akogenda gochia bosio rioka. ⅩⅧ Amagoro ayio ane nigo arenge ne chibonyi chingare chi’okoondokia, chiaichire namaiso ase chinsemo chionsi. ⅩⅨ Ekero ebitongwa biria biarenge gosuka, naboigo na amagoro aria naro arenge gosuka amo nabirobio mbarabare, na ekero ebitongwa biria biarenge koimokerera igoro korwa ase riroba, naboigo na amagoro aria arenge koimokerera igoro. ⅩⅩ Aande onsi ase omoika orenge kogenda, nao na ebitongwa biria biarenge kogenda; naboigo na amagoro aria arenge kogenda amo nabirobio, ekiagera omoika bw’ebitongwa biria nigo orenge ime y’amagoro aria. ⅩⅪ Ekero ebitongwa biria biarenge gosuka, na amagoro aria nabo arenge gosuka; ekero biarenge gotenena, naro nabo arenge gotenena; ekero biarenge koimokerera igoro korwa inse ase riroba, naro nabo arenge koimokerera igoro mbarabare yabo, ekiagera omoika bw’ebitongwa biria bire moyo nigo orenge ime ase amagoro aria.

ⅩⅫ Igoro ase emetwe y’ebitongwa biria, egento nkiarengeo kenga buna eaanga igoro yaroiseirie ebirore bikomekameka na komesa, na kerokio nigo kiaarire igoro ase emetwe yabo. ⅩⅩⅢ Inse y’eaanga eria kera egetongwa nigo kiaramborete chimbaaba chiaye ibere chigakunana nechi’ekende, na kera ekemo kegatuba omobere oye ne chimbaaba chinde ibere. ⅩⅩⅣ Ekero ebitongwa ebio biarenge kogenda, okoeera gwe chimbaaba chiabo nigo kwarenge ase amato ane buna okw’amaache amaange, buna eriogi ri’Omonguru, ee, nigo kwarenge buna okwoga kw’emeganda y’eseegi. Ekero biarenge gotenena, nigo biarenge kwororobia chimbaaba chiabo gochia inse. ⅩⅩⅤ Korwa igoro y’eaanga eria yarenge igoro y’emetwe y’ebitongwa ebio okwoga gokaruao, na birobio bigatenena na kwororobia chimbaaba chiabo gochia inse.

ⅩⅩⅥ Igoro y’eaanga eria yarenge igoro y’emetwe yabo norengeo omogwekano bw’ekerogo ki’obonene keroisirie korwa ase esafiro*. Ase omogwekano oria bw’ekerogo ki’obonene naikaranseteo oyomo ekieni kiaye kiarenge buna eki’omonto. ⅩⅩⅦ Korwa ase ensemo ekororekana buna nekebono ki’omogwekano oyio na gochia igoro nkarora obomeka‐meku buna obw’etai boetananire negento kenga buna omorero, na korwa ase ekebono kiaye gochia inse ’nkarora egento kenga omorero. Omogwekano oria nigo oetananire n’oborabu bware komoreka. ⅩⅩⅧ Oborabu boria bwarenge komoreka chinsemo chiaye chionsi, nigo bwagwekaine nomokubinyongo ase engaki y’embura.

Okororekana okwo nakw’obonene bw’Omonene.

Nyasae okorangeria Ezekieli abe omobani

Ekero narooche ayio ngatung’ama inse maumama; erio nkaigwa eriogi ri’oyomo ogokwana.

Ⅰ:Ⅰ 1:1: Okom 19:11

Ⅰ:Ⅱ 1:2: 2 Abar 24:10-16; 2 Amg 36:9,10

Ⅰ:Ⅴ 1:5: Okom 4:6

Ⅰ:Ⅹ 1:10: Ezek 10:14; Okom 4:7

Ⅰ:ⅩⅢ 1:13: Okom 4:5

Ⅰ:ⅩⅤ 1:15: Ezek 10:9-13

Ⅰ:ⅩⅧ 1:18: Okom 4:8

Ⅰ:ⅩⅫ 1:22: Okom 4:6

Ⅰ:ⅩⅩⅣ 1:24: Okom 1:4-15; 19:6

Ⅰ:ⅩⅩⅥ 1:26: Ezek 10:1; Okom 4:2,3

*Ⅰ:ⅩⅩⅥ 1:26 esafiro: nerigena rikomeka‐meka kegima

Ⅰ:ⅩⅩⅦ 1:27: Ezek 8:2