Ⅰ Ring’ana ri’Omonene rigaacha asende, riganteebia: Ⅱ 12:2: Isaya 6:9,10; Yer 5:21; Mar 8:18“Aye Mwanyabaanto omenyete ase egati y’ abanto batari koigwera; abwo babwate amaiso akorigereria, korende tibari korora, na amato agotegerera, korende tibari koigwa, ekiagera barabwo tibari koigwera.

Ⅲ “Ase ayio, aye Mwanyabaanto, ebeke ang’e amo n’ebinto biao, obe buna omonto okong’anya korwa ase ense yaye, ong’anye mobaso ekero abanto barooche. Ong’anye korwa aase ao otaare goika aase aande kobarooche. Ande nabo barabaise komanya nonya bare abanto batari koigwera. Ⅳ Osokie ebinto biao isiko mobaso kobarooche, ebinto buna ebi’oyo okong’anya korwa ase ense yaye, na rigoika mogoroba, ogende aye bweka kobarooche, buna oyo okong’anya korwa ase ense yaye. Ⅴ Obochore ekebao ase enyasi ekero abanto abwo bakorooche, erio obogorie ebinto biao oetereo. Ⅵ Ekero omosunte ochire, obeke ebinto biao ireko, ekero abanto bakorigereretie. Otube obosio bwao torora ense, ekiagera nagokorire aye obe ekemanyererio ase egesaku ki’Abaisraeli.”

Ⅶ Inche ngakora buna nachigetwe; mobaso gati ngasokia ebinto biane isiko, nkaba buna nkong’anya inde, na riachia koba mogoroba, nkabochora enyasi namaboko ane. Ekero omosunte ochire, nkabeka ebinto biane ireko, nkagenda ekero abanto barigereretie.

Ⅷ Rituko ria kabere mambia, ring’ana ri’Omonene rigaacha asende, riganteebia: Ⅸ “Aye Mwanyabaanto, ekeene, Abaisraeli abwo batari koigwera mbakoborie ng’a ninki ekio ogokora. Ⅹ Bono obairanerie, obateebie: Aya naro Omonene agoteeba: Okoorokerigwa oko nigo kore igoro y’omogaambi o Yerusalemu, amo n’Abaisraeli bonsi bare imeo. Ⅺ Obateebie ng’a aye nigo ore ekemanyererio ase bare, na buna aye gwakorire nabarabwo nabo barakore, mbang’anyigwe bairwe ase obosomba. Ⅻ Omogambi ore ase egati yabo naimokie ebinto biaye abibeke ireko agende; ekero omosunte ochire abochore ekebao ase enyasi aetereo; nigo aratube obosio bwaye tabaisa korora ense namaiso aye. ⅩⅢ 12:13: 2 Abar 25:7; Yer 52:11Nimobekere ekeonga kiane abwatwe ase oboreba bwane; erio imoire Babiloni, ase ense y’Abakalidayo; nonya naboigo takoyerora namaiso aye, korende nao arakwere. ⅩⅣ Ninsiarere gochia ase chinsemo chionsi abanto bonsi abamoetanaine ase okomokonya, na abarwani baye bonsi b’esegi boigo, naende nimbabwatie n’omoro one.

ⅩⅤ “Ekero ndabaserie gochia ase abanto b’ebisaku na mbasiarere gochia ase chinse ching’ao, barabwo ’mbamanye ng’a ninche Omonene. ⅩⅥ Korende nintigarie abanto bake korwa ase egati yabo bataitwe nemioro, gose nenchara, gose noborwaire bogoita, erinde kobare agwo ase egati y’ abanto b’ebisaku ase barairwe, banyare koorokia ebibe biabo bi’okogechia bakorire. Erio ’mbamanye ng’a inche ninche Omonene.”

ⅩⅦ Ring’ana ri’Omonene rigaacha asende, riganteebia: ⅩⅧ “Aye Mwanyabaanto, karie endagera yao kore nomoondoko, na onywe amaache ao gokoiguswa na gochandeka. ⅩⅨ Oteebie abanto bamenyete ase ense eye ng’a aya naro Omonene agoteeba igoro y’ abanto bamenyete Yerusalemu ase ense y’Abaisraeli: Barabwo mbarie endagera yabo bare nomoichano na mbanywe amaache abo bare nobwoba, ekiagera ense yabo nesakorwe na ebinto bionsi bireo, etigwe ere bosa ase engencho y’obobe obwo abanto bareo bakorire. ⅩⅩ Emechie eyio emenyire nesarigwe kegima, na ense etigwe ere bosa. Erio nario moramanye ng’a inche ninche Omonene.”

ⅩⅪ Naende ring’ana ri’Omonene rigaacha asende, riganteebia: ⅩⅫ “Aye Mwanyabaanto, mebayeno ki eye mogokwana ase ense y’Abaisraeli, mogoteeba: Amatuko abaanetwe abeire amaange mono, na amaroro y’obobani abeire bosa? ⅩⅩⅢ Ase ayio bateebie ng’a aya naro Omonene agoteeba: Ninsirie emebayeno eyio, tibayekwana naende ase ense y’Abaisraeli. Korende bateebie: Amatuko ayio abeire ang’e, na amaroro onsi y’obobani goika aikeranigwe.

ⅩⅩⅣ “Amaroro y’obobani y’okong’ainereria, gose oboringoria bw’okweansia, tibikoba ase egati y’Abaisraeli nonya ng’ake. ⅩⅩⅤ Inche Omonene ninkwane ring’ana nganetie gokwana, na rirorio goika riikerane, tirigoteebana nonya ng’ake. Inwe egesaku getari koigwera, ase amatuko aino ninkwane ring’ana ndiikeranie. Nabo inche Omonene nateebire.”

ⅩⅩⅥ Naende ring’ana ri’Omonene rigaacha asende, riganteebia: ⅩⅩⅦ “Aye Mwanyabaanto, Abaisraeli nigo bagoteeba iga: Okorora koria ere arorire nokw’amatuko atabe bwango; nigo akobana igoro ye chingaki chikare aare chitaracha. ⅩⅩⅧ Ase ayio obateebie ng’a aya naro Omonene agoteeba: Amang’ana ane tagoteebana nonya ng’ake taikeranigwa, onsi aya nakwanire goika aikeranigwe. Ninche Omonene nakwanire.”