ⅩⅩⅪ
Ense y’Abaasuri na ey’Abamisiri chikoreng’anigwa nomocharake o Lebanoni
Ⅰ Ase rituko rie ritang’ani, omotienyi o gatato, omwaka o ikomi nomo, ring’ana ri’Omonene rigaacha asende, riganteebia: Ⅱ “Aye Mwanyabaanto, kwana na Farao, omorwoti o Misiri, amo nomoganda oye, oborie:
“Ning’o oraareng’anigwe naye ase obonene bwao?
Ⅲ Naama! Ense y’Abaasuri nigo yarenge buna omocharake o Lebanoni,
obwate chinsagia chingiya chire nekiriri ekiya.
Nigo okinete gochia igoro, ogaetania chinsagia chi’emete ende.
Ⅳ Omote oyio okaba okonyora amaache na gokiina;
chinsoko chia inse chikayotambeyia.
Chindooche nigo chiaetanaine ase osimekire,
magega yaye chindooche echio chikaba chikonyosia emete yonsi ye rinani amaache.
Ⅴ “Ase ayio omocharake oria ogakiina,
Ogatambea ogaetania emete yonsi ye rinani,
chinsagia chiaye chikamentekana,
na ebisagia biaye bigatambea,
ase engencho y’amaache amaange arengeo akayokinia.
Ⅵ Chinyoni chionsi chikaagacha ebiswa biabo ase chinsagia chiaye,
ne ching’iti chikabiarera inse ye chinsagia chiaye;
inse y’ekiriri kiaye abanto b’ebisaku bionsi ebinene bikamenyao.
Ⅶ Omote oria okaba omuya mono ase obonene bwaye
na ase chinsagia chiaye chintambe,
ekiagera emeri yaye yaigete inse ase amaache amaange arenge.
Ⅷ 31:8: Omoch 2:9Emecharake ende ey’omogondo o Nyasae tiyayoetanetie,
gose emebunduki tiyarenge ne chinsagia buna echiaye;
na emeuru tiyarenge nebisagia buna ebiaye.
Ee, omote onde bw’omogondo o Nyasae
torenge omosiani buna oro.
Ⅸ Nigo nayokorete okaba omosiani
ase engencho y’obonge bwe chinsagia chiaye,
goika emete yonsi ya Edeni, omogondo o Nyasae,
ekayosanera.
Ⅹ “Ase ayio, aya naro Omonene agoteeba: Ekiagera kweimokereretie igoro na ogakiina ogaetania emete ende, na enkoro yao ekaenenera obotambe bwaye, Ⅺ ninkobeke ase amaboko y’oyore nokobua ase egati y’ebisaku. Oyio ekeene nigo arayokorere buna anchete, ekiagera inche nayotugutire ase engencho y’ogokora kwaye okobe. Ⅻ Abanto b’ebisaku ebigeni, abare abatindi mono goetania ab’ebisaku binde, mbayogeche bayotige inse. Chinsagia chiaye nchigwe, chibeere igoro ase ebitunwa na inse ase amagoko onsi. Ebisagia biaye mbibuneke bibeere ase chindooche chionsi chi’ense eria. Abanto bonsi bare ase ense eria mbatame, barue ase ekiriri kiaye bayotige. ⅩⅢ Ase ritina riaye, erio rirabe rigwete inse chinyoni chionsi nchiche chibeereo, na ase chinsagia chiaye ching’iti chionsi chi’orosana nchibeereo. ⅩⅣ Ayio nigo arakoreke, erinde mote onde bwensi ore ase amaache tobaisa kweenenia ase obotambe bwaye, gose gwetambeyia gochia igoro ase amare; gose emete ende yonsi ekonyora amaache tekina gochia igoro yeenenie, ekiagera yonsi yachikeirwe ogokwa esoe inse ye riroba ase Mwanyabaanto bakuure basoete.
ⅩⅤ “Aya naro Omonene agoteeba: Ase rituko erio omote oria ogendete aase abakuure ngachiika ebirero birerwe; nigo natubete chindiba ase engencho yaye, ngatanga chindooche chiaye, nkaochania amaache amanene. Nigo nachiigete egetunwa kia Lebanoni keyobokerie amagombo, na emete yonsi y’orosana egasusana ase engencho yaye. ⅩⅥ Nigo natengechetie ebisaku ase okogwa kwaye, ekero nayogechete nkayotuguta gochia aase abakuure, ase abwo bagendete ase chimbeera. Erio emete yonsi ya Edeni, na eyechorire ere emiya mono ya Lebanoni, yonsi eye ekonywa amaache, ekaba ekweremia emenyene agwo inse ye riroba. ⅩⅦ Emete eyio egasoa amo n’oro gochia aase abakuure ase abwo baitetwe nemioro basoete, ee, emete eyio nigo yaikaransete ase ekiriri kiaye ase egati y’ebisaku ase okoyokonya.
ⅩⅧ “Norori ase emete yonsi ya Edeni oreng’anigwe naye ase ogosikwa na obonene? Aye noirwe amo nemete ende yonsi ya Edeni, otugutwe inse ye riroba amo nero; nobe amo nabwo batarogeti, abaitetwe nemioro.
“Ayio naro arakoreke ase Farao amo nomoganda oye bwonsi. Omonene oteebire ayio.”