Ⅲ
Yeso nomonene kobua Musa
Ⅰ Ase ayio, abaminto abachenu, ababwatani b’okorangerigwa gokorwa igoro, morengererie mono Yeso omotomwa na Omokuani Omonene bw’okoorokia gwaito. Ⅱ 3:2: Omob 12:7Ere nigo arenge omwegenwa asare ere oyomochorete, buna Musa boigo arenge omwegenwa ase enyomba yonsi ya Nyasae. Ⅲ Naki Yeso nigo abarirwe ng’a nemogwenerete abe nobonene mono kobua Musa, buna omoagachi enyomba are nogosikwa kobua enyomba enyene. Ⅳ (Kera enyomba nigo ekoagachwa nomonto, korende Nyasae nere omoagachi bw’ebinto bionsi.) Ⅴ Na Musa nigo arenge omwegenwa ase enyomba yonsi ya Nyasae buna omokoreri, erinde abe kirori ase amang’ana arache gokwanwa, Ⅵ korende Kristo nigo are omwegenwa buna Omwana igoro ase enyomba ya Nyasae. Intwe nenyomba yaye gatorabwate bokong’u oboremu na ogwetogia kw’ogosemeria goika omoerio.
Ogotimoka kore ase Abanto ba Nyasae
Ⅶ 3:7: Zab 95:7-11Ase ayio, buna Omoika Omochenu ogokwana,
“Reero, komoraigwe eriogi riaye,
Ⅷ timokong’ia chinkoro chiaino, buna ekero keria gi’okogechia,
ase rituko riria ri’ogoteemwa agwo ase erooro.
Ⅸ Agwo chisokoro chiaino nchianteemete ase okondenga,
naende nchiaroche ogokora kwane ase engaki y’emiaka emerongo ene.
Ⅹ Ase ayio, nkagechigwa nekegori keria,
ngateba: Botambe abanto aba nigo basirete ase chinkoro chiabo,
ne chinchera chiane tibachimanyeti,
Ⅺ buna natianire ase endamwamu yane:
Tibagosoa ense eria ase nare gocha kobaa ogotimoka.”
Ⅻ Rigereria baminto, taba onde omo oino oyore nenkoro embe y’ogotegena, abaise kweatanana korwa ase Nyasae ore moyo. ⅩⅢ Korende moremanie inwe ase inwe kera rituko, ekero gekorokwa ekia Reero, erinde ase, more onde takorwa koba omokong’u ase obong’ainereria bw’ebibe. ⅩⅣ Naki twabeire ababwatani na Kristo, gatorabwate bokong’u ogosemeria gwaito kw’eritang’ani goika omoerio. ⅩⅤ 3:15: Zab 95:7,8Agwo igo egokwanwa,
“Reero, komoraigwe eriogi ria Nyasae,
timokong’ia chinkoro chiaino’
buna ekero keria gi’okogechia.”
ⅩⅥ 3:16: Omob 14:1-35Naki mbarabi baria bamogechetie ekero baigwete? Tari baria bonsi barwete Misiri, baare koraagwa na Musa? ⅩⅦ Naende mbarabi abwo ere agechetigwe nabarabwo ase engaki y’emiaka emerongo ene? Tari baria bakorete ebibe, abwo emebere yabo yagwete ase erooro? ⅩⅧ Naende nase barabi atianete ng’a tibagosoa ase ogotimoka kwaye? Tari ase baria bangete koigwera? ⅩⅨ Na igo twarorire ng’a tibanyarete gosoa ase ense eria ase engencho y’ogotegena kwabo.