Ⅰ 61:1: Mat 11:5; Luk 7:2261:1: Luk 4:18,19Omoika bw’Omonene nigo ore igoro yane;

ekiagera Omonene ong’akire amaguta, erinde ndanderie abataka amang’ana amaya;

ontomire kogwenia abasionoirwe chinkoro chiabo,

na ndarie obosibore ase abasibwa,

naende inyigorere abanto basibire basoke.

Ⅱ 61:2: Mat 5:4Ontomire ndarie omwaka bw’Omonene bwancheire,

ne rituko ria Nyasae oito ri’okorusia egesiomba,

rituko araaremie bonsi abaichanete.

Ⅲ Ontomire ase abwo baichanete bare Sayoni,

mbabeekere chigutwa chi’ebisicha ase emetwe yabo ribaga rie ribu,

na mbaake amaguta ay’omogooko ribaga ri’omoichano,

naende mbabeekere chingobo chi’amasikani ribaga ri’emeika yairianyekire.

Erio barokwe “Emete y’oboronge”,

mbabe ebimeri bw’Omonene asimegete, erinde atogigwe.

Ⅳ Barabwo mbaagache naende amaturi a kare,

mbatenenie amaagacho a kare asaretigwe;

mbaroisie naende emechie eria yatagoretwe,

aase agwo atigetwe asaregete nebiaare ebinge.

Ⅴ Abamenyi mbabe bakobariseria amaicho aino,

na abanto b’ebisaku ebiaao mbabe bakobaremera emegondo yaino

na kobarendera emesabibu yaino.

Ⅵ Inwe nigo morarokwe abakuani ba Omonene;

abanto mbaabaroke abakoreri ba Nyasae oito,

moegwe morie obotenenku bw’abaanto b’ebisaku,

na gwetogeria obonene obwo bwabo.

Ⅶ Ribaga ri’obosooku bwaino monyore egetari ara kabere,

na abwo bachayetwe mbanyore omogooko ase ebitari biabo;

na igo barabwo mbanyore ebitari ara kabere agwo ase ense yabo,

mbabe nomogooko o kare na kare.

Ⅷ “Inche Omonene nigo nyanchete oboronge,

nigo ngechete obourereria na ogokora okobe.

Nimbe omwegenwa, erinde ng’ee abanto baane eng’eria yabo,

na ninkore nabarabwo okobwatana kw’ogotianania gwa kare na kare.

Ⅸ Abana babo mbamanyekane ase abanto b’ebisaku,

na abanto b’ororeeria rwabo mbamanyekane ase abanto bonsi.

Abanto bonsi barabe bakobarora mbaabamanye

na baorokie ng’a abwo nabaanto Omonene asesenirie.”

Ⅹ 61:10: Okom 21:2Ningoke mono ase Omonene,

omoyo one nochenge ase Nyasae one,

ere omboyirie chianga chi’ogotooreka,

ontubire nomwambaro bw’oboronge,

buna omonywomi akobeeka ekiore ekero ki’enyangi,

na buna omoriakari agwechabera ebinto bi’erigori rinene.

Ⅺ Buna koreng’ana ebimeri bikomera korwa riroba ime,

na buna ebisimekire ase omogondo bigokina,

naboigo Omonene araarente

oboronge na ogotogia,

bibe ase amasio ’abaanto b’ebisaku bionsi.