Ⅹ
Ogosasiima emegwekano na ogosasiima gw’ekeene
Ⅰ Inwe Abaisraeli, igwa amang’an’Omonene agoteeba.
Ⅱ Aya nar’Omonene agoteeba:
“Timobaisa kweorokereria chingencho chi’abaanto b’ebisaku,
gose ebimanyererio bikorwa igoro tibibaisa kobaondokia,
ebio nigo bikoondokia abanto b’ebisaku.
Ⅲ Chinyasae abanto b’ebisaku bagosasiima nigo chire echi’oborimo.
Omote ore rinani ime nigo okogechwa,
na omooroisia omong’aini oyobaacha negesire na oroisia emegwekano.
Ⅳ Abanto nigo bakoyeooma ne chifeta ne chitaabu,
bayeakerania bokong’u nenyundo na emesumari,
erinde tenyegerigwa.
Ⅴ Emegwekano eyio yabo nigo enga buna ebinto bikogosa chinyoni
chire ase emegondo y’amasosa.
Emegwekano eyio tekonyara gokwana;
nigo ekobogorigwa, ekiagera teri gotaara.
Timobaisa koyeiroka,
ekiagera tegokora bobe bonde bwensi,
gose tekonyara gokora gento kende ekiya.”
Ⅵ Aye Omonene, onde tari okogwekaine;
aye naye Omonene,
na erieta riao nigo rire nokobua okonene.
Ⅶ 10:7: Okom 15:4Aye Omorwoti bw’ebisaku, ning’o otagwenereti gokoiroka.
Aye nogwenerete oirokwe.
Onde tari okogwekaine
ase abang’aini bonsi b’ebisaku,
gose ase amarwoti abo onsi.
Ⅷ Barabwo bonsi tibamanyeti gento, nabariri bare.
Naki ogosemigwa korwa ase emegwekano eyio nemete bosa*10:8 Emete bosa: Ase ekeiberania negento getabwati nguru chinde.
Ⅸ Eyio nefeta eturire ekorwa Tarisisi,
na etaabu ekorwa Ufasi.
Nigo ere emeremo y’omooroisia omong’aini na omoturi bw’etaabu.
Chianga emegwekano eyio ekobekerwa
nigo chire chimbariri ne chimonyinga,
chiroisirie nabaanto abang’aini.
Ⅹ Korende Omonene nere Nyasae bw’ekeene,
Nyasae ore moyo,
Omorwoti o kare na kare.
Ense nigo egotengechigwa ase endamwamu yaye,
ebisaku tibikonyara koremereria ekeririanda kiaye.
Ⅺ Mobateebie ng’a chinyasae chiria chitatongete igoro na ense nachisire, tichiba inse y’erioba.
Ogoteera gw’okomotogia Nyasae
Ⅻ Omonene nere otongete ense ase okobua kwaye;
agatonga ebinto bionsi bi’ense ase obong’aini bwaye,
na akarambora igoro ase okomanya kwaye.
ⅩⅢ Ase eriogi riaye amaache are igoro chionsi akoeera neriogi,
nigo akorenta ritaturi korwa ase chinsinyo chi’ense.
Nere okorenta chinkoba chire nembura,
na omwaga ogusa korwa ase ebigancha biaye.
ⅩⅣ Kera omonto nigo are omoriri ase obong’aini bwaye, na kera omoturi nigo agosookigwa nemegwekano
y’ogosasimwa aroisirie, ekiagera emegwekano yaye ney’obong’ainereria, tebwati omoika ime yabo.
ⅩⅤ Eyio mbosa kegima, emeremo eyio nesekererwe.
Ekero eraegwe egesusuro, nesirigwe kegima.
ⅩⅥ Omonene oria ore egetari kia Yakobo tagwekaini emegwekano eyio.
Ere nere otongete ebinto bionsi.
Abaisraeli nigo bare egesaku kere omwando oye;
Omonene bw’Emeganda nario erieta riaye.
Okong’anyigwa kogocha
ⅩⅦ Inwe abwo mwaetananirwe nababisa, sangereria ebinto biaino morue aase agwo. ⅩⅧ Aya nar’Omonene agoteeba: “Ase engaki eye ninserie ne chinguru abwo bonsi bamenyete ase ense eye, nimbarentere ogoichana goika baigwe obororo.
ⅩⅨ “Obobe nobwaito, ekiagera twasunyuntirwe.
Amaote aito tari kogwenigwa.
Intwe nigo twarengereretie: Ekeene, eye nemechando,
korende goika toremererie.
ⅩⅩ Chiema chiaito chiasarekire;
Chingori chi’ogochisibera chiabutoirwe.
Abana baito basirire, tibari aande.
Omonto tari ogotenenia chiema naende.
Onde tari oratosungere ebitambaa bie chiema chiaito.
ⅩⅪ “Abarisia babeire abariri,
tibari korigia oboraai korwa ase Omonene.
Ase ayio, tibari kogenderera konyora amaya,
riicho riabo rionsi riasiareirwe.
ⅩⅫ Tegerera moigwe! Ebirage bigocha.
Rirorooche ri’omoganda omonene riaigurwe rigocha korwa sugusu,
gocha gosaria emechie y’Abayuda ebe amaturi,
ase chisese chi’orosana chiramenye.”
ⅩⅩⅢ Aye Omonene, nimanyete ng’a enchera y’omonto tekoraagwa nere omonyene,
gose omogendi takonyara koraa orogendo rwaye ere omonyene.
ⅩⅩⅣ Aye Omonene, ondongeyie ase okong’a egesusuro,
korende ase ekerengo kegwenerete gioka,
gose tonkora bo ekero ore nendamwamu,
ekiagera nigo orabaise gonsiria.
ⅩⅩⅤ Itera endamwamu yao ase ebisaku bitakomanyeti
na ase abanto batari korangeria erieta riao bakonywe.
Barabwo basiririe abanto ba Yakobo,
ee, baabamerire kegima na kobasiria,
basaririe obomenyo bwabo bwabeire bosa.