EGETABU GIA
YOSHUA
Ogochaakera
Egetabu eke gia Yoshua nigo kegokwanera igoro yomogano buna Abaisraeli basoete ase ense ya Kaanani ase okoyoboera. Barabwo bagatamboka enyancha ya Yorodani bare ebiombe bibere ebio biare nechinguru noboremu ekagera bakabua abakaanani.
Erieta riegetabu eke nigo rikorwa ase omonto oyomo bw’engencho mono okorokwa Yoshua oyio orenge bw’engencho enene ase egati ya ’baisraeli. Yoshua nigo aetwe emeremo emenene yokoraa abana ba Israeli magega yogokwa kwa Musa. Ere akaraa Abaisraeli goika bagasoa ense yomwando eyio omonene abarierete omwando kobaa. Abaisraeli bakaira ense ya Kanaani ekaba eyabo erio bakayebaga buna yaganeirie. Chiira chiri’Omonene arierete Abaisraeli boigo na Musa nigo chiaikeraarete ekero basoete ase ense ya Kanaani (11:23; 21:43-45).
Egetabu eke gia Yoshua nigo kebaganire chinsemo isato.
Ensemo yeritangani 1-12 Ensemo ya bosongo yorooche rwa Yorodani ekoboerwa. Omonene konya obaenekerie buna nkobaa are ense yomwando erio barabwo bakearigania bakabwatesigwa nebisaku bibere ebio konya biachire ensemo eyio bakaboera ensemo ya bosongo na goetera ase chinguru chi’omonene barabwo bakabua Abanto b’ensemo eyio. Abaunenkia bakairwa ase ensemo eyio erio kounenkia igoro yomochie oyeriko erio barabwo bakairana namang’ana amaya yokobeeka Abaisraeli omoyo erio barabwo bagatamboka orooche rwa Yorodani, na nayuma yaye buna baboerete omochie o’Yeriko, na koyobua boigo bakaboera omochie o Ai na boigo buna bakorete okobwatana gati yabo na abanto ba Gibeoni na koboera ensemo ya sugusu.
Ensemo ya kabere Egesieri 13-22 ase ebisieri ebi nigo tokorora chinsemo echio konya chiatigaire chitarairwa n’Abaisraeli boigo buna ense eyio yarenge gocha kobagerwa ebisaku bi’Abaisraeli. Ensemo eye nigo egokoorera gotworokia buna abanto b’ensemo ya moocha bairanete ensemo yabo nakoagacha egesasiimero aria Yorodani.
Ensemo ya gatato Egesieri 23-24 Aiga nigo tokorora emeremo ya Yoshua boigo ne chinkwana chiaye ara kabere chi’obosemia ase okobatiga Abaisraeli. Yoshua nigo akobabeka omoyo babe abegenwa ase Omonene na kobateebia batigane ne chinyasae chi’oborimo na gochora komokorera omonene Nyasae bw’ekeene.
Okobagwa kw’egetabu eke:
Okobugwa gwa Kaanani 1:1—12:24
Ogwateranwa gw’ense eria 13:1—21:45
a. Ense ere moocha ya Yorodani 13:1-33
b. Ense ere bosongo ya Yorodani 14:1—19:51
c. Emechie y’obotamero 20:1-9
d. Emechie y’Abalawi 21:1-45
Ebisaku bia moocha (bia Rubeni, na Gadi, na ekeng’ese kia Manase) bakoirana ase chingongo chiabo 22:1-34
Yoshua ogosemia Abaisraeli ekero atarakwa 23:1-16
Okobwatana kw’Ogotianania gokoiranererwa agwo Sekemu 24:1-33
Ⅰ
Nyasae ogochika Yoshua arwanie ense ya Kaanani ayebue
Ⅰ Ekero Musa, omosomba bw’Omonene, konya akuure, Omonene agakwana na Yoshua, mosinto o Nuni, oyio orenge omokonyi o Musa, Ⅱ akamoteebia, “Musa, omosomba one, okuure. Imoka, bwamboke orooche oro rwa Yorodani, aye na Abaisraeli aba bonsi, mosoe ase ense eria ngochia kobaa. Ⅲ 1:3: Okoir 11:24,25Nabaeire aase onsi morataare namagoro aino, buna narierete Musa eira ng’a nimbayee. Ⅳ Orogongo rwaino nigo rorachaakere erooro ya Irianyi, roikere Lebanoni ensemo ya sugusu, naende rochakeere orooche oronene rw’Eufarati, robwateranie ense yonsi y’Abahiti roikere Enyancha Enene ya bosongo. Ⅴ 1:5: Okoir 31:6,8; Abaibr 13:5Ase obogima bwao bwonsi, omonto tari orakobue. Buna narenge amo na Musa, nimbe amo naye botambe, tinkogotiga nonya ng’ake. Ⅵ 1:6: Okoir 31:6,7,23Obe omokong’u na omoremu, ekiagera naye oraikie abanto aba, baire ense eyio narierete chisokoro chiabo eira na gotiana ng’a nimbayee. Ⅶ Otenene bokong’u rioka, na obe omoremu! Orende na obwate boronge amachiiko onsi aya omosomba one Musa agochigete. Tobaisa koyatiga, na koonchoka gochia aande onsi ensemo y’okorio gose ey’okobee; erio nario orasesenigwe aande onsi ase ogochia. Ⅷ Amang’ana y’egetabu eke ki’amachiiko oyakwane botambe nomonwa oo, oyairanerere omobaso na obotuko, obwate na okore onsi ayarikireo. Erio nario orasesenigwe mono ase chinchera chiao chionsi na kogenderera. Ⅸ Inee! Tari inche nagochikiire ng’a otenene bokung’u, obe omoremu? Ase ayio, toondoka, tobaisa gokwa omoyo, ekiagera inche Omonene, Nyasae oo, nigo inde amo naye aande onsi orabe gokogenda.”
Yoshua ogochika abanto
Ⅹ Erio Yoshua agachiika abatang’ani b’abaanto Ⅺ ng’a baete egati y’ebitwori bachiike abanto ng’a beroiserie endagera, ekiagera ritang’ani amatuko atato ataraera inabamboke orooche oro rwa Yorodani, baire ense eyi’Omonene, Nyasae obo, abaeire ebe eyabo.
Ⅻ 1:12: Omob 32:28-32; Okoir 3:18-20; Yosh 22:1-6Yoshua agateebia abanto b’egesaku kia Rubeni, na ekia Gadi, amo nekeng’ese ki’egesaku kia Manase, ⅩⅢ “Inyora ring’ana riria Musa, omosomba bw’Omonene, abachigete ekero abateebeetie ng’a Omonene, Nyasae oino, nabae obotoereru ase ense eyio arabae momenye. ⅩⅣ Abakungu baino na abana baino nabatigare, amo namaicho aino, ase ense eye Musa abaete ng’umbu ya Yorodani. Inwe abanyene abamore chituoni chi’esegi goika mwamboke mobogoretie ebirwanero biaino, motang’ane abamino. ⅩⅤ Mobakoonye goika Omonene abae barabwo obotoereru, buna abaete inwe, nabarabwo mbaire ense eyi’Omonene, Nyasae oino, arabae. Erio momanye koirana ase ense yaino, eye Musa, omosomba bw’Omonene, abaete ng’umbu ya Yorodani.”
ⅩⅥ Barabwo bakairaneria Yoshua, “Onsi ayagwatochikiire natoyakore, na aase aande onsi oratotome natogende. ⅩⅦ Buna tware koigwera Musa, naye natokoigwere. Omonene, Nyasae oo, abe amo naye buna abeete na Musa. ⅩⅧ Monto onde bwensi oraange koigwera amachiiko ao na taigwa amang’ana ande onsi orachiike, goika aitwe akwe. Aye otenene bokong’u, obe omoremu!”