Ⅰ “Inaki oborwoti bwa igoro nigo bogwekaine20:1 13:24,31,44; 18:23; 22:2 n’omonto omonyene enyomba oyosoogete mambia chuni kogenda koriika abaremi ase omogondo oye bw’emesabibu. Ⅱ Agancherana nabaremi kobaakana edinari eyemo ase rituko, erio akabaira ase omogondo oye bw’emesabibu. Ⅲ Agasoka chinsa isato, akarora abande bateneine echiiro, batari nemeremo, Ⅳ akabateebia nabarabwo: Genda nainwe ase omogondo one bw’emesabibu na inche nimbae ekebagwenerete. Bakagenda. Ⅴ Agasoka naende chinsa isano nemo, ne chinsa kianda, agakora boigo. Ⅵ Goika chinsa ikomi nemo agasoka, akarora abande bateneine, akababoria nabarabwo: Ninki mwatenenera aa bwaira, motari nameremo? Ⅶ Bakamoiraneria: Ekiagera monto onde tatoriigeti. Akabateebia: Genda nainwe boigo ase omogondo one bw’emesabibu. Ⅷ 20:8: Abal 19:13; Okoir 24:15Ekero riagorobire, omonyene omogondo agateebia omoteneneri oye: Rangeria abaremi, obae eng’eria yabo, ochaakere korwa abamagega goika ab’eritang’ani. Ⅸ Ekero baria barigetwe chinsa ikomi nemo baachete, bakanyora kera oyomo edinari eyemo. Ⅹ Bono ekero ab’eritang’ani bacha, bagakaga ng’a barabwo nabaegwe kobua abande, bakanyora nabarabwo kera oyomo edinari eyemo. Ⅺ Erio kabaeirwe, bakaba nkwemurungania bare ase omonyene enyomba, Ⅻ bakaboora: Abwo ba magega nigo bakora emeremo y’ensa eyemo yoka, na aye kwabatoreng’aneria naintwe abatwaremereretie emechando ne riberera ri’omobaso bwonsi? ⅩⅢ Ere akairaneria oyomo obo: Omosani, tingokorereti bobe. Titwancheranete naye ase edinari eyemo? ⅩⅣ Bwata ekere ekiao, ogende; nindigetie koa oyo o magega koreng’ana naye. ⅩⅤ Inee! Tindi neribaga gokora buna ndigetie omonyene n’ebinto biane? Gose naki okorigereria neriso riibe, ekiagera inche inde omuya? ⅩⅥ 20:16: Mat 19:30; Mar 10:31; Luk 13:30Naboigo abamagega inababe ab’eritang’ani, na ab’eritang’ani inababe abamagega.”

ⅩⅦ Nabo, ekero Yeso arenge gotiira gochia Yerusalemu, akabaira aborokigwa baye ikomi na babere ensemo. ⅩⅧ Kobare inchera, akabateebia, “Rora, ngotiira tore gochia Yerusalemu, na Omwana-o-Mwanyabaanto naruugwe ase amaboko y’abakuani abanene na aborokia b’amariiko, na barabwo ’nabamonachere ekiina ki’ogokwa, ⅩⅨ naende nabamorue ase amaboko y’ abanto b’Ebisaku; nakorerwe echeche, naende naakwe emecharichi na kobambwa; na ase rituko ria gatato nabokigwe.”

ⅩⅩ Erio ng’ina abana ba Zebedi akamochiera Yeso amo nabana baye, akamotung’amera na komosaba ring’ana. ⅩⅪ Yeso akamobooria, “Inki origetie?” Akamoiraneria, “Chiika ng’a abana bane babere baikaranse, oyomo ensemo y’okoboko kwao gw’okorio, n’oyonde ensemo y’okoboko kwao gw’okobee ase oborwoti bwao.” ⅩⅫ Yeso akairaneria, “Inwe timomanyeti eri mogosaba. Inee! Namonyare konywera egekombe ’ndache konywera inche?” Bakamoteebia, “Natonyare.” ⅩⅩⅢ Akabateebia, “Egekombe ’nkonywera inche, namokenywere, korende ribaga ri’ogoikaransa ensemo y’okoboko kwane gw’okorio ney’okobee, tindi nokobua gw’okobaa, otatiga abwo bagacheire na Tata one nabwo barariegwe.”

ⅩⅩⅣ Ekero baria ikomi bachia koigwa aya, bakababea abamura baria babere. ⅩⅩⅤ 20:25: Luk 22:25,26Korende Yeso akabarangeria bache asare, akabora, “Mwamanyire ng’a abagaambi b’Ebisaku bakogaambera abanto, na abanene babo nigo bare n’okobua igoro ase bare. ⅩⅩⅥ 20:26: Mat 23:11; Mar 9:35; Luk 22:26Korende ase more inwe, ayio takoba bo. Korende, oyorarigie koba omonene ase more, goika abe omokoreri oino; ⅩⅩⅦ na oyorarigie koba omotang’ani ase more, goika abe omosomba oino, ⅩⅩⅧ buna Omwana-o-Mwanyabaanto atachete gokorerwa, korende gokorera, na korua obogima bwaye, erinde bobe embooria y’abange.”

ⅩⅩⅨ Ekero baare korua Yeriko, omoganda omonene okamotunyana. ⅩⅩⅩ Rora, abanto babere emeuko baikaransete ase enchera ensemo, na ekero bachia koigwa Yeso ogoeta, bagaaka eriogi, bakaboora, “Omonene omwana o Daudi! Tororere amaabera.” ⅩⅩⅪ Omoganda oria okabatogonyera ng’a banyare gokira, korende bakamenta kwoga mono, bakaboora, “Omonene, tororere amaabera, aye Omwana o Daudi.” ⅩⅩⅫ Yeso agatenena, akabarangeria, akababoria, “Ninki morigetie mbakorere?” ⅩⅩⅩⅢ Bakamoiraneria, “Omonene, otoramokie amaiso aito.” ⅩⅩⅩⅣ Yeso agasogwa namaabera, agakuna amaiso abo. Erio kegima bakarora, bakamotunyana.