Ⅰ Yeso akarua agwo, agaika ase ense yaye omonyene; aborokigwa baye bakamotunyana. Ⅱ Na ekero gi’Esabato agachaaka kworokereria ase esinagogi; abange abamoigwete bagakumia, bagateebania, “Oyo ng’ai anyorire aya? Mbong’aini ki obo aeirwe oyo? Ogokora gwe chinguru ki oko okonene kogokoreka ase amaboko aye? Ⅲ Oyo tari oria omobaachi, omwana o Mariamu, momura omwabo Yakobo, na Yose, na Yuda, na Simioni, na basubati bamwabo tibari aiga seito?” Bakagechigwa nere. Ⅳ 6:4: Yoh 4:44Yeso akabateebia, “Omobani takomocha gosikwa, otatiga ase ense yaye, na ase eamate yaye, na ase enka yaye.” Ⅴ Gose tanyara gokora ogokora gwe chinguru aroro, otatiga abegete amaboko aye igoro ase abarwaire bake, akabagwenia. Ⅵ Agakumia ase engencho y’ogotegena kwabo.

Agaetanana ase ebinyoro biaetanaineo okworokereria. Ⅶ Akarangeria baria ikomi na babere, agachaaka kobatoma babere babere, akabaa okobua igoro ase ebirecha bi’eubi; Ⅷ akabakaania tibaira gento ase orogendo rwabo, otatiga enyimbo yoka. Tibaira nonya nomogati, nonya nesaro, nonya nechitaabu ase ebimoya biabo. Ⅸ Korende babeeke ebikoroto, ko tibeboyia chianga ibere. Ⅹ Akabateebia, “Enyomba ende yonsi ase moraroisigwe, mobeere aroro goika ekero moraimoke korwa aase aria. Ⅺ 6:11: Ogok 13:516:11: Luk 10:4-11Na kera aase abanto batabaroiseti inwe, gose kobaigwa, komokorua aroro, mokong’onte orotu rore inse ase amagoro aino, robe kirori ase bare.” Ⅻ Bagasoka, bakarandia ng’a abanto baonchoke. ⅩⅢ 6:13: Yakb 5:14Bagaseria ebirecha ebinge, bagaaka abanto abange amaguta, abwo barenge abarwaire, bakabagwenia.

ⅩⅣ 6:14: Mat 16:14; Mar 8:28; Luk 9:19Omorwoti Herode akaigwa amang’ana, ekiagera erieta ria Yeso konya riakumire kera ase. Abanto bande bakaboora, “Yohana Omobatisi obokire korwa ase abakuure, nakio gekogera chinguru echi chigokora emeremo ime asare.” ⅩⅤ Korende abande bakaboora, “N’Elija.” Na abande bakaboora, “Oyo nomobani, gose nigo anga buna oyomo bw’ababani.”

ⅩⅥ Korende Herode agachia koyaigwa, akabora, “Oyio Yohana oria nanachete omotwe, obokire.” ⅩⅦ 6:17: Luk 3:19,20Inaki Herode omonyene nigo atomete abanto kobwata Yohana, akamosiba echela ase engencho ya Herodia moka Filipo momura omwabo, oria Herode atwarete, ⅩⅧ ekiagera Yohana amokanetie Herode, “Tai boronge ase ore komenyana na moka momura omino.” ⅩⅨ Nabo oria Herodia akaba nokogecha asare, akarigia komoita, korende tanyara, ⅩⅩ ekiagera Herode nairogete Yohana, konya omanyire ng’a nomonto omooronge, omochenu, akamorenda. Nigo anchete komoigwa, nonya orenge goichana mono kamoigure. ⅩⅪ Rituko rigwenerete rigaika Herodia akanyora ribaga ekero Herode ase rituko ri’okoinyora okoiborwa kwaye ekero akora omoyega ase abatang’ani bare inse yaye, na abatang’ani b’esegi, na abanto abanene ba Galili. ⅩⅫ Erio omoiseke bwe Herodia gasoa gotenga, akagokia Herode amo nabwo baikaransete nere ase omoyega. Omorwoti agateebia omoiseke oria, “Nsabe kende gionsi ekio origetie, na inche ninkoe.” ⅩⅩⅢ Akamoriera eira, “Kende gionsi ekio orarigie korwa ase ’nde ninkoe, nonya nekeng’ese ki’oborwoti bwane.” ⅩⅩⅣ Omoiseke oria agasoka, akaboria ng’ina, “Inki ’ndasabe?” Ng’ina akamoiraneria, “Omotwe o Yohana Omobatisi.” ⅩⅩⅤ Erio kegima agasoa nomoayerero ase obosio bw’omorwoti, agasaba, akabora, “Nindigetie ong’e omotwe o Yohana Omobatisi bono iga ase esani.” ⅩⅩⅥ Omorwoti akaba nomoichano mono, korende ase engencho ye chiira chiaye, na ase engencho y’abwo baikaransete ase omoyega, tarigetie kwanga. ⅩⅩⅦ Erio kegima omorwoti agatoma omorwani oyomo, agachiika ng’a omotwe o Yohana orentwe. Omorwani oria akagenda akamonacha omotwe aria echela ime, ⅩⅩⅧ akayorenta ore ase esani, akayoa omoiseke oria, na omoiseke oria akayoa ng’ina. ⅩⅩⅨ Ekero aborokigwa ba Yohana baigwete amang’ana aya, bakagenda bakabogoria egetondo, bakagetindeka.

ⅩⅩⅩ Abatomwa bakairana ase Yeso, bakamoteebia onsi ayabakorete, na amang’ana onsi aya aborokereretie. ⅩⅩⅪ Akabateebia, “Inchuo inwe mweka, togende aase abanto batari, motimoke ake.” Inaki abanto abange mbarengeo, bagocha na bakogenda; goika Yeso n’aborokigwa baye tibanyora ribaga ri’okoria. ⅩⅩⅫ Bakagenda ase obwato, aase abobisi, atari nabaanto. ⅩⅩⅩⅢ Abanto bakabarora bakogenda, abange ase abwo bakabamanya, bakaminyoka bwango korwa ase emechie yonsi, batang’ane goika asare. ⅩⅩⅩⅣ 6:34: Omob 27:17; 1 Abar 22:17; 2 Amg 18:16; Ezek 34:5; Mat 9:36Yeso agachia goika korwa ase obwato, akarora omoganda omonene, akabarorera amaabera, ekiagera barenge buna ching’ondi chitari nomorisia: agachaaka koborokereria amang’ana amange.

ⅩⅩⅩⅤ Goika chinsa chinyinge chi’omobaso chigaeta, aborokigwa baye bakamochiera, bakaboora, “Aase aa negesomo, na bono riagorobire. ⅩⅩⅩⅥ Kae abanto aba ribaga, erinde bagende emechie na ebinyoro, aria na aaria, begorere endagera.” ⅩⅩⅩⅦ Korende Yeso akabairaneria, “Inwe bae endagera.” Bakamobooria “Inee! Togende togore emegati ye chidinari amagana abere, tobae barie?” ⅩⅩⅩⅧ Akababoria, “Emegati nerenga mobwate? Genda morore!” Bagachia komanya bakaboora, “Netano, ne chinswe ibere.” ⅩⅩⅩⅨ Yeso akabachiika aborokigwa baye baabaikaransie bonsi, ebiombe, ebiombe, ase obonyansi obobese. ⅩⅬ Bagaikaransa ase chindwaro, echinde rigana erimo na echinde emerongo etano. ⅩⅬⅠ Erio Yeso akabogoria emegati eria etano ne chinswe chiria ibere, akarigereria igoro, akabisesenia, agasamunyora emegati eria, akaa aborokigwa baye babiterekere abanto, ne chinswe chiria ibere, akabagabera bonsi. ⅩⅬⅡ Bonsi bakaria, bakaigota. ⅩⅬⅢ Bagasangereria ebisamunye biasamunyogete, na ebio bigaichoria ebitonga ikomi na bibere, naboigo nebisamunye bie chinswe. ⅩⅬⅣ Na abasacha abariete emegati eria nigo barenge chilifu isano.

ⅩⅬⅤ Erio Yeso akabetereria aborokigwa baye bariine obwato, bamotang’anere kogenda ng’umbu goika Bethisaida ekero are koa omoganda ribaga ogende. ⅩⅬⅥ Magega gakorire gokwana nabarabwo, akagenda egetunwa gosaba. ⅩⅬⅦ Riachia koba mogoroba, obwato bokaba enyancha gati, na ere bweka ase ense enyomo. ⅩⅬⅧ Akabarora bagwechanda bagwata amaache nemegango, ekiagera omwaga nigo obatangete. Koreng’ana ekero ki’oborendi bwa kane bwa botuko agacha ase bare, ogotaara igoro ase enyancha, akarigia kobaetania. ⅩⅬⅨ Barabwo bagachia komorora ogotaara ase enyancha igoro, bagakaga ng’a nerirengari, bagaaka eriogi, Ⅼ ekiagera bonsi abamorooche mbaondogete. Bwango Yeso agakwana nabarabwo, akabateebia, “Remia chinkoro! Ninche. Timoiroka!” ⅬⅠ Akariina ime ase obwato ase bare; omwaga ogakira. Aborokigwa bagaichana mono, ⅬⅡ ekiagera tibamanyete amang’ana y’emegati eria, korende chinkoro chiabo nigo chiarenge chinkong’u.

ⅬⅢ Ekero bambokire bagaika ense ya Genesareti, bakabeeka ekeroochi. ⅬⅣ Bagachia gosoka korwa ase obwato, abanto bakamanya Yeso bwango, ⅬⅤ bakaminyoka, bagaetanana ense eria yonsi, bagachaaka kobogoria abarwaire bare ase amarere abo, bakagenda kera aase baigwete ng’a nao are. ⅬⅥ Kera aase are kogenda ase ebinyoro, gose emechie, gose emegondo, bakabeeka abarwaire ase chichiiro, bakamosorora ng’a abae ribaga bakune nonya nomokoba bw’eanga yaye; na abwo bonsi abamokunete bakagwena.