Ⅰ Omonene, naki gwateneneire aare iga?

Naki okwebisa, otari kororekana chingaki chi’emechando?

Ⅱ Abakori amabe baenenire na gokorera abaremerwa bobe.

Tiga babwatwe barabwo abanyene ase emeroberio yabo y’obobe.

Ⅲ Omonto omokori ebibe nigo agwetogeria okogania okobe gw’enkoro yaye;

na omonto ore ne ribero nigo akoragereri’Omonene ase okomochecheria.

Ⅳ Omokori amabe ase oboenenu bwaye nigo agoteeba ng’a Nyasae takomoa egesusuro.

Ase ebirengerio biaye ime nigo agokaga ng’a Nyasae tari.

Ⅴ Omonto oyio nigo akogenderera gokiina ase chinchera chiaye.

Ebina biao okonacha nigo bire igoro mono, takobimanya;

nigo agochaaya ababisa baye bonsi.

Ⅵ Omonto oyio ase enkoro yaye ime oteeba iga: “Tinkwoboa gento kende,

tinkonyorwa na bobe bonde nonya ng’ake.”

Ⅶ 10:7: Abar 3:14Aya agokwana nigo aichire okoragereria,

na obong’ainereria, na ogokorera abande bobe;

oromeme rwaye nigo robwate amang’ana obobe n’ogosaria.

Ⅷ Nigo akwebisa ase emechie oboera abanto,

oganya agwo ase ogoita abanto batari na komocha.

Nigo agotengera konyora abanto batari na gokonywa konde,

Ⅸ bw’ebisa aase are bobisi, buna endo ere ase egetutu eboerete,

oganya ase okobwata abaremerwa;

obabwata ekero akobakurura ase omoeto oye.

Ⅹ Abaremerwa nigo bagosegenyigwa na koiyerigwa, barutwa endiba ime,

abanto batari na gokonywa konde, obasiria n’echinguru chiaye.

Ⅺ Igo ase enkoro yaye ime orengereria iga: “Nyasae tagwechandera kende,

obisire obosio bwaye tayarora nonya ng’ake.”

Ⅻ Omonene, gaki ’nchuo! Aye Nyasae, rambora okoboko kwao,

gaki tibweba bachandegete!

ⅩⅢ Aye Nyasae, nase ki omonto omokori amabe akogochecheria,

na gokaga ng’a aye tokomoa egesusuro?

ⅩⅣ Aye nigo okorora abachandeku na komanya okwerera kwabo,

amang’ana ayio nigo oyabegete ase amaboko ao.

Omonto otari na gokonywa konde nigo akwerua asore,

ekiagera naye botambe ogokonya chintakana.

ⅩⅤ Saria chinguru chi’abakori amabe na abanyabibe,

obae egesusuro ase amabe onsi bagokora goika toyarora naende.

ⅩⅥ Omonene n’Omorwoti o kare na kare;

abanto b’Ebisaku batamomanyeti basirigwe ase ense yaye.

ⅩⅦ Aye Omonene, nigo ogotegerera abanto abaitongo abakoganetie;

nigo okobaigwa na kobeka chinkoro chiabo chinguru.

ⅩⅧ Igo okoa chintakana na abachandeku oboronge bwabo,

erinde monto onde bw’ense tabachanda naende.