Ⅰ Aye Omonene, ing’a oboronge bwane;

ekiagera nabeire ntari na komocha;

naboigo ngosemeretie aye Omonene ntari ne chitang’u‐tang’u.

Ⅱ Omonene, inteeme na ondenge;

orenge enkoro yane na ebirengererio biane.

Ⅲ Nigo ndigereretie obwanchani bwao bogendererete botambe

na gotaara ase obwegenwa bwao.

Ⅳ Tindi gosanga nabanyaborimo,

gose tindi kogosoria nabang’ainereria.

Ⅴ Inche nigo ngechete gosanga nabaanto bagokora amabe,

na tingwancha goikaransa amo nabaanto abakayayu.

Ⅵ Nigo ngoisaba amaboko aane ase okoorokia ng’a tindi na komocha,

erio naetanana egesasiimero kiao, aye Omonene,

Ⅶ imba ngoteera neriogi rinene gokoiraneria ng’a mbuya mono

na koraria ogokora kwao kw’ogokumia.

Ⅷ Aye Omonene, inche nigo nyanchete obomenyo bwao,

aase obonene bwao bore.

Ⅸ Tosiria omoyo one ekero ogosiria abanyabibe;

gose obogima bwane ekero ogosiria abaiti.

Ⅹ Abanto abwo bagokora emeroberio y’obonyaka,

na amaboko abo a borio nigo aichire namaaki.

Ⅺ Inche nigo inde norogendo rotari na komocha;

indorere amaabera na omboorie.

Ⅻ Amagoro aane nigo agotenena aase ateremu;

nintogie Omonene ase egati y’omosangererekano omonene.