Ⅰ Aye Omonene, egetare kiane, naye nkorangeria,

tibwanga konyigwa.

Oise gokira, inche nigo ndabe oyomo bw’abakogenda ase chimbeera.

Ⅱ Igwa eriogi ri’ogosaba kwane, ekero nkorera asore onkonye,

ekero ndamborete amaboko aane igoro gocha ase obomenyo bwao obochenu.

Ⅲ Tobaisa gonsiria amo nabakori amabe na abasaria,

abanto abagokwana amang’ana yo omorembe nabaanto bande,

korende ime ase chinkoro chiabo nigo baabagechete.

Ⅳ 28:4: Okom 22:12Bae egesusuro koreng’ana nogokora kwabo na ebibe biabo,

obaakane koreng’ana nemeremo y’amaboko abo,

obae eki bagwenerete konyora.

Ⅴ Abanto abwo tibari kobara ng’a ogokora kw’Omonene,

gose emeremo y’amaboko aye, negento;

ase ayio nabaiyerie inse, takobaimokia naende.

Ⅵ Omonene atogigwe!

Ere oigure okoboria kwane kw’oboitongo.

Ⅶ Omonene nere chinguru chiane na enguba yane;

nere nsemeretie ase enkoro yane, ere nankonyete.

Ase ayio ninde nomosasoko ase enkoro yane;

nimbe nkomoterera na komoiraneria ng’a mbuya mono.

Ⅷ Omonene nigo are chinguru ase abanto baye,

na obotamero bw’ogotooreka ase omoakwa amaguta oye.

Ⅸ Aye Omonene, tooria abanto bao abare omwando oo,

obe omorisia obo,

obabogorie goika kare na kare.