Ⅰ Inwe abanto bonsi, igwa amang’ana aya!

Tegerera moigwe, inwe mwensi momenyete ase ense,

Ⅱ inwe mwensi, abake na abanene,

abanda na abataka mwensi amo tegerera!

Ⅲ Omonwa one nokwane amang’ana ’obong’aini,

na ebirengererio bi’enkoro yane nigo birabe ebi’okomanya.

Ⅳ Nintegerere amang’ana agokwanwa ase omoreng’anio,

ning’orokie engencho yaye ’gokobugia obokano.

Ⅴ Inche tinkoba nobwoba ase chingaki chi’emechando,

ekero amabe ’abachandi baane arabe ang’etananire.

Ⅵ Tinkwoboa abanto abwo basemeretie obotenenku bwabo;

barabwo nigo bare bakoenenera obonda bwabo bore obonge.

Ⅶ Ekeene, omonto tari oranyare kobooria oyomwabo,

gose koa Nyasae embooria y’ogotooria obogima bwaye.

Ⅷ Rigori ri’okobooria omoyo oye nigo rire rinene mono,

na mbooria ende teri eraisanere rigori erio,

Ⅸ eyio eragere omonto agenderere koba moyo botambe,

tabaisa kogenda ase embeera.

Ⅹ Bonsi nigo bamanyete ng’a nonya nabaanto abang’aini ngokwa bare,

naboigo nabare abariri na amachara, erio batiga abanto abaao bakoira chinibo chiabo.

Ⅺ Nigo bakorengereria ng’a nigo chirabeo kare na kare,

na obomenyo bwabo ebiaare ase ebiaare;

nigo bagwatora emegondo yabo ase amarieta abo.

Ⅻ Korende Mwanyabaanto takonyara kogenderera koba nogosikwa,

ere nigo anga buna ching’iti chigokwa chiasira.

ⅩⅢ Obwo nabwo obosiru bw’abaanto abwo besemeretie abanyene,

omoerio obo abwo begenete amang’ana abo.

ⅩⅣ Buna riicho rie ching’ondi nigo bakoirwa gochia aase abakuure

amakweri naro arabe omorisia obo.

Abwo bare abaronge mbaabagambere kobogokiamoka,

na ebieni biabo mbisirere

agwo aase abakuure aase are obomenyo bwabo.

ⅩⅤ Korende Nyasae naboorie omoyo one,

ayorusie korwa ase okobua gw’aase abakuure

erinde ang’ire imenye asare.

ⅩⅥ Tobaisa koiroka ekero omonto abeire omotenenku,

na ebinto bire ase enyomba yaye biamentekanire.

ⅩⅦ Ekero omonto oyio arakwe, takoira gento kende,

obonene bwaye tibokomotunyana bogende inse aaria amo nere.

ⅩⅧ Nonya omonto oyio ekero are moyo, ogweteba ng’a nigo asesenirie,

ee, nonya ogotogigwa ekero ekoreire amaya,

ⅩⅨ ere goika akwe, asangerereke ase chisokoro chiaye chire,

echio chitarore oborabu naende.

ⅩⅩ Mwanyabaanto oyio osikire otabwati obong’aini,

nigo anga buna ching’iti chigokwa chiasira.