Ⅰ Ekeene, Nyasae nigo are omuya mono ase Abaisraeli,

ee, ase abwo bare ne chinkoro chichenegete.

Ⅱ Amagoro aane konya abeire ang’e kogochwa,

konya nabeire ang’e gotererigwa,

Ⅲ ekiagera nigo nabeete ne ribero ase abanto abaenenu,

ekero naroche ng’a abwo ababe nigo basesenirie.

Ⅳ Barabwo tibari konyorwa nobokong’u bonde ase obogima bwabo;

emebere yabo nigo ere emiya, naende emenoru.

Ⅴ Tibabwati emechando buna abanto bande babwate;

tibari konyora amaakwa buna abande.

Ⅵ Ase ayio, obwerori nigo boetanaine amagoti abo,

na obotindi nabwo beboyetie buna eanga.

Ⅶ Amaiso abo nigo akogirigenta nobonoru,

obotantanu bw’ebirengererio bie chinkoro chiabo nobonge mono.

Ⅷ Nigo bagochecheria abande na gokwana ase okobakorera bobe.

Nigo bakweimokereria igoro na kobatianera.

Ⅸ Emenwa yabo nigo egokwana amang’ana amabe are mamincha ya igoro;

ne chimeme chiabo chiasokia ayakogenda ase ense engima.

Ⅹ Ase ayio abanto babo nigo bakoonchoka baababwatia,

nigo bakwong’otera amaache abo are amange.

Ⅺ Erio bateeba, “Naki Nyasae arakore amanye?

Inee! Ere Oyore Igoro Mono nabwate obong’aini?”

Ⅻ Naama! Naboigo abakori amabe bare;

botambe nigo bare buya na bagendererete komenta obotenenku bwabo.

ⅩⅢ Ekeene, mbosa nabeire ndendete enkoro yane ebe echenegete,

mbosa nabeire ngoisaba amaboko aane ng’a timba nokomocha.

ⅩⅣ Omobaso boira nabeire nkonyora amaakwa,

na kera emambia nabeire nkonyora egesusuro gi’okondongeyia.

ⅩⅤ Onye nakwanete amang’ana buna ayio,

nigo narenge gocha koba oyotari omwegenwa ase ebiaare bi’abaanto bao.

ⅩⅥ Bono ekero nabeete nkorengereria komanya engencho y’amang’ana ayio,

amang’ana ayio akaba amakong’u ase ’nde,

ⅩⅦ goika ekero nasoete ime ase obomenyo obochenu bwa Nyasae,

erio nario namanyete omoerio bw’abanyabibe buna ore.

ⅩⅧ Ekeene, aye Omonene nigo okobabeeka aase are aaterere,

aye nigo okobaturunkania kwabasiria kegima.

ⅩⅨ Barabwo nigo bagosirigwa rioka,

omoerio obo nomoondoko okobasiria.

ⅩⅩ Nigo banga buna chindoto omonto akweba mambia gakoboka.

Aye Omonene, naboigo bare asore buna omogwekano okororwa ase okorota,

ekero okoimoka nigo okweba ebieni biabo.

ⅩⅪ Ekero narenge nobororo ase omoyo ime,

na enkoro yane ekaba buna eyabetirwe.

ⅩⅫ Nigo nabeete omoriri mono, tinamanya gento;

nkaba buna eng’iti y’orosana ase obosio bwao.

ⅩⅩⅢ Nonya naboigo, inche nigo ngendererete kobeera asore botambe,

aye nigo obwatete okoboko kwane gw’okorio.

ⅩⅩⅣ Aye nigo okondaa na gonsemia,

na magega y’ayio noche kong’ira onsoyie ase obonene.

ⅩⅩⅤ Inee! Ning’o naende imbwate aaria igoro, otatiga aye bweka?

Ekero nkobwate, gento tikeri aiga ase ense nganetie.

ⅩⅩⅥ Omobere one na enkoro yane nabo biranyare koborwa chinguru,

korende aye Nyasae, naye ore egetare gi’enkoro yane,

naende naye egetare kiane goika kare na kare.

ⅩⅩⅦ Rora, abanto abwo bagweatanana korwa asore nabasire;

aye nigo orasirie abwo batari abegenwa asore.

ⅩⅩⅧ Korende ase ’nde inche, nigo ere buya mono kobeera ang’e na Nyasae.

Omonene obeire obotamero bwane,

ninyare koraria emeremo yaye yonsi.