Ⅰ Nyasae nigo amanyekanete ase Abayuda,

erieta riaye rire rinene mono ase Abaisraeli.

Ⅱ Obomenyo bwaye Obochenu nigo bore agwo Salemu,

ere nigo amenyete agwo Sayoni.

Ⅲ Aroro agwo nabunete chinsara chi’amata chikomesa,

boigo naende akabutorana chinguba, na emioro na ebirwanero binde bi’esegi.

Ⅳ Aye nigo okomeka‐meka oichire

nobonene kogocha korwa ase ebitunwa biababisa kwabuire.

Ⅴ Abare ne chinkoro chimwenu baurirwe ebinto konya basakoire,

bono bararire chitoro chindito.

Abarwani esegi bonsi basinyirwe korwana namaboko abo.

Ⅵ Aye Nyasae o Yakobo, ekero gwatogonyerete abanto bariinete chibarasi,

barabwo nigo bagwete inse, bakaba buna nigo bakwete, amo ne chibarasi chiabo.

Ⅶ Aye bweka nigo ore oyo bw’okoondokia mono.

Ning’o oranyare gotenena ase obosio bwao,

ekero kwabeire nendamwamu?

Ⅷ Korwa agwo igoro, nigo kwamanyetie ense ebiina biao;

na ense ekoboa egakira‐kiri,

Ⅸ ekero aye Nyasae gwatenenete konacha ekiina

na kobatooria abwo bonsi bagokorerwa bobe.

Ⅹ Ekeene, endamwamu ya Mwanyabaanto nenyare kogera aye otogigwe;

eyeratigare noyieboyie buna orokini.

Ⅺ Inwe karie chiira ase Omonene, Nyasae oino, na mochiikeranie.

Abanto bonsi bamoetanaine, tiga bamorentere ebiegwa,

ere oria ogwenerete koirokwa.

Ⅻ Ere nigo agokeyia abare abaenenu ase ense,

abarwoti bonsi b’ense nigo bamwoboete.