EBIBILIA ENCHENU ZABURI ⅬⅩⅩⅧ

ⅬⅩⅩⅧ

Nyasae na abanto baye

(Ogoteera gw’Asafu)

Ⅰ Inwe abanto baane, igwa amang’ana nkoborokereria,

tegerera moigwe amang’ana ’omonwa one.

Ⅱ Inche ninkwane ase omoreng’anio,

nigo ndakwane ase emebayeno ya kare.

Ⅲ Amang’ana ayio twaigwete na koyamanya,

ayio chisokoro chiaito chiatotebetie.

Ⅳ Amang’ana ayio titokoyabisa ase abana babo;

goika toteebie ebiaare bigochi‐gocha ogokora kw’obonene bw’Omonene,

na amakumia aye ay’okobua akorire.

Ⅴ Ere nigo abegete oborori bwaye ase abanto b’ororeria rwa Yakobo,

na akaa Abaisraeli amachiiko,

ayio achigete chisokoro chiaito chiorokererie abana babo.

Ⅵ Nigo aganetie ng’a abanto b’ebiaare bigochi‐gocha bayamanye,

ee, nonya nabana b’ebiaare konya bataraiborwa,

naende abwo bayateebie abana babo.

Ⅶ Erio nario barabe bagosemeria Nyasae,

na tibaabaisa kweba emeremo yaye,

korende babe bakobwata amachiiko aye.

Ⅷ Barabwo tibaabaisa koba buna chisokoro chiabo,

chiria chitaigwerete, naende chiasaretie;

tichiarenge ne chinkoro chindonge,

gose tichiarenge chinyegenwa ase Nyasae ase emioyo yabo.

Ⅸ Abanto b’Efraimu, abwo babogoretie amata,

bakaonchoka bagatama ase rituko ri’esegi.

Ⅹ Barabwo tibarendete okobwatana kw’ogotianania kwa Nyasae,

naende nigo bangete kobwatia amachiiko aye.

Ⅺ Bakeba amang’an’Omonene konya akorire,

na ebikone biria konya aorokirie ase bare.

Ⅻ Ase amasio e chisokoro chiabo Nyasae nigo akorete amakumia

agwo ase ense ya Misiri, ase orogongo rwa Soani.

ⅩⅢ Omonene nigo aatananete amaache ’enyancha,

akaambokeria chisokoro chiabo aroro,

agakora amaache ayio agatenena buna orwaki.

ⅩⅣ Ase chingaki chia mobaso nigo arenge kobaraa ne riire,

na ase chingaki chia botuko abaraa ne riire ri’omorero.

ⅩⅤ Ere agatandora ebitare agwo ase erooro,

agasokeria abanto amaache amange mono buna aye chindooche chinene.

ⅩⅥ Agatubokia chindooche korwa ase ebitare ime,

na amaache agatirimboka buna aye chindooche chinene.

ⅩⅦ Nonya naboigo abanto abwo nigo bamentete gokora ebibe ase Omonene,

agwo ase erooro nigo basaretie ase Omonene Ore Igoro Mono.

ⅩⅧ Barabwo nigo bateemete Nyasae ase chinkoro chiabo ime,

bakagania baegwe endagera basanerete.

ⅩⅨ Bagakwana amang’ana arenge mamincha ya Nyasae, bagateeba,

“Inee! Nyasae nanyare gototerekera endagera eisaine aa ase erooro?

ⅩⅩ Ee, amaene ere naagete egetare na amaache agacharara korwao,

ne chindooche chi’amaache amange chikarwao,

korende, Inee, nanyare boigo koa intwe abanto baye endagera?

Nanyare gotoa na enyama torie?”

ⅩⅪ Ase ayio, ekero Omonene aigwete ayio, agaichorwa nekeririanda,

akarwania abanto b’ororeria rwa Yakobo nomorero,

ekiagera nigo abeete nendamwamu enene mono ase Abaisraeli.

ⅩⅫ Ayio nigo akoregete, ekiagera tibamwegenete Nyasae,

naende tibegenete ng’a ere nanyare kobatooria.

ⅩⅩⅢ Korende nonya nabo, ere nigo achigete igoro,

akaigora ebisieri bi’aroro;

ⅩⅩⅣ akabatweria endagera ekorokwa mana, bakaba bakoyeria;

ee, akabaa endagera korwa igoro.

ⅩⅩⅤ Ase ayio, Mwanyabaanto bakaria endagera y’abamalaika;

Omonene akabatomera endagera enyinge mono.

ⅩⅩⅥ Akarenta omwaga o moocha okagusa igoro,

na ase okobua kwaye akagusia omwaga korwa Irianyi.

ⅩⅩⅦ Erio akabarentera chinyama chinyinge buna orotu,

ne chinyoni chikoiruruka chinyinge buna omokenye ore ase enyancha;

ⅩⅩⅧ agatiga chinyoni echio chikagwa gati‐gati y’egetwori kiabo,

chigaetanana chiema chiabo.

ⅩⅩⅨ Erio abanto abwo bakaria chinyama bakaigota,

ekiagera Nyasae nigo abaete eke basanerete.

ⅩⅩⅩ Korende ekero chinyama chiarenge ase emenwa yabo

bagendererete gochitakuna,

naende konya bataraisanekia obogworu bwabo.

ⅩⅩⅪ Nyasae akaba nendamwamu enene ase bare,

agaita abanto abwo barenge ne chinguru goetania abande,

agakoora kegima abamura b’Abaisraeli.

ⅩⅩⅫ Nonya naboigo, abanto abwo nigo bagendererete gokora ebibe,

nonya ere okorete amakumia, tibamwegenete.

ⅩⅩⅩⅢ Ase ayio agakoora amatuko abo, akayasiria,

na emiaka yabo ekaera ase okoondokia.

ⅩⅩⅩⅣ Ekero aitete abanto abatigari nigo bamorigetie;

nigo baonchogete, bakamorigia ase ekeene.

ⅩⅩⅩⅤ Nigo bainyorete ng’a Nyasae nere egetare kiabo;

naende ng’a Nyasae Oyore Igoro Mono, nere Omobooria obo.

ⅩⅩⅩⅥ Korende nigo bakwanete amang’ana amansu ase okomong’aina,

bagakwana oborimo nemenwa yabo.

ⅩⅩⅩⅦ Tibamobwatetie bokong’u ne chinkoro chiabo,

gose tibarenge abegenwa ase okobwatana kwaye kw’ogotianania.

ⅩⅩⅩⅧ Korende Omonene nigo arenge namaabera,

akaba okwabera ebibe biabo tabasiria;

ase chingaki chinyinge nigo arenge gotanga endamwamu yaye,

gose tarenge gotiga ekeririanda kiaye gioke mono.

ⅩⅩⅩⅨ Nigo ainyorete ng’a barabwo Mwanyabaanto bagosira,

nigo banga buna embeo egoeta na tekoirana.

ⅩⅬ Ase chingaki chinyinge nigo babete bagosaria ase Omonene agwo ase erooro;

bakaba bakomoichania aroro agwo.

ⅩⅬⅠ Nigo babete bakomoteema naende,

bakaba bakomogechia ere oyore Omochenu bw’Abaisraeli.

ⅩⅬⅡ Ti babete bakoinyora chinguru chi’okoboko kwaye,

gose tibabete bakoinyora rituko riria ababooretie korwa ase ababisa babo,

ⅩⅬⅢ na buna akorete ebikone ebinge ase ense ya Misiri,

na amakumia agwo ase orogongo rwa Soani.

ⅩⅬⅣ Aroro aari’Omonene nigo aonchorete amaache e chindooche akaba amanyinga,

abanto tibanyara koyanywa.

ⅩⅬⅤ Nigo arentete chingi chinyinge chikabachanda,

na akabarentera ebioto bigasaria ense yabo.

ⅩⅬⅥ Akarenta chingeeti chigasaria ebimeri biabo,

naende akarenta chingige chikaria endagera y’emegondo yabo bechanderete.

ⅩⅬⅦ Omonene nigo arentete amagena ’embura agasaria emesabibu yabo,

agasaria nemeko yabo.

ⅩⅬⅧ Akarenta amagena ’embura agaita chiombe chiabo,

ne chinkoba chigaita ching’ondi ne chimbori chiabo.

ⅩⅬⅨ Omonene akabatomera endamwamu yaye enene, na ekeririanda kiaye,

na okogechigwa kwaye na emechando yonsi,

ekeombe ekio ki’abamalaika b’ogosiria.

Ⅼ Ere akaroiseria endamwamu yaye enchera;

akabeeka emioyo yabo ase amakweri,

akabarentera oborwaire bokabaita.

ⅬⅠ Agaita abana abatangi bonsi aaria Misiri,

abwo barenge abatangi b’echinguru chiabo ase chiema chia Hamu.

ⅬⅡ Erio akang’anyia abanto baye buna ching’ondi chikong’anyigwa,

akabaraa ase erooro buna riicho rikoraagwa.

ⅬⅢ Akabaraa na kobarenda buya, na tibabete nobwoba,

korende enyancha ekamera ababisa babo.

ⅬⅣ Omonene akabarenta ase ense yaye enchenu,

ase egetunwa keria enyorerete nokoboko kwaye gw’okorio.

ⅬⅤ Agaseria abanto b’ebisaku korwa bosio bwabo.

Nigo abaatananerete ense eyio ekaba emiando yabo,

akabeeka Abaisraeli bakamenya ase chiema chiabo.

ⅬⅥ Erio bagateema Nyasae Ore Igoro Mono, bakamogechia,

tibabwatete amachiiko aye.

ⅬⅦ Nigo baonchogete tibaaba abegenwa, buna chisokoro chiabo chitabeete abegenwa,

bakaba abasaria buna obota bosaregete.

ⅬⅧ Bakagechia Omonene ase engencho

y’aase abo aimokererete igoro bagosasimera,

na ekiagera basasimete emegwekano, Omonene akaba ne risemi.

ⅬⅨ Ekero Nyasae aroche ayio, akaba nekeririanda,

agatiga Abaisraeli kegima.

ⅬⅩ Omonene akaanga eema yaye yarenge Silo,

eema eria akorete obomenyo bwaye ase egati y’abanto.

ⅬⅪ Nigo atigete eke kiarenge chinguru chiaye kegasakorwa,

ekio kiarenge obonene bwaye agakerua ase amaboko ababisa.

ⅬⅫ Ere nigo abeete nendamwamu ase abanto abwo barenge omwando oye,

akabarua bagaitwa nemioro.

ⅬⅩⅢ Omorero ogaita abamura babo,

na abaiseke babo bakaborwa abakobanyuoma.

ⅬⅩⅣ Abakuani babo nigo baitetwe nemioro,

na ababoraka babo tibanyarete kobareera.

ⅬⅩⅤ Eri’Omonene akaboka buna nigo araire chitoro,

na akaba buna omonto etuoni onyure edivai ogoaka eriogi;

ⅬⅩⅥ agaaka abachandi baye bagatama gochia ase barwete,

akababeeka ase obosooku goika kare na kare.

ⅬⅩⅦ Omonene akaanga abanto b’ororeria rwa Yusufu,

gose tachorete abanto b’egesaku gi’Efraimu,

ⅬⅩⅧ korende agachora abanto b’egesaku kia Yuda,

na egetunwa gia Sayoni ekio anchete.

ⅬⅩⅨ Aroro akaagacha obomenyo bwaye obochenu bobere igoro mono,

nabobe obokong’u buna ense ekong’irie kogenderera botambe.

ⅬⅩⅩ Agachora Daudi omosomba oye,

akamorusia korwa ase arenge korisia ching’ondi.

ⅬⅩⅪ Ee, akamorusia korwa ase arenge gotunyana ching’ondi chiare ne chimanwa chikogonka,

akamokora akaba omorisia bw’ororeria rwa Yakobo, abanto baye,

nabwo Abaisraeli omwando oye.

ⅬⅩⅫ Daudi akaba omorisia bw’abaanto abwo ore nenkoro endonge,

akaba okobaraa nokoboko kw’obong’aini.

ⅬⅩⅩⅧ:Ⅱ 78:2: Mat 13:35

ⅬⅩⅩⅧ:Ⅻ 78:12: Okong’ 7:8—12:32

ⅬⅩⅩⅧ:ⅩⅢ 78:13: Okong’ 14:21,22

ⅬⅩⅩⅧ:ⅩⅣ 78:14: Okong’ 13:21,22

ⅬⅩⅩⅧ:ⅩⅥ 78:16: Okong’ 17:1-7; Omob 20:2-13

ⅬⅩⅩⅧ:ⅩⅧ 78:18: Okong’ 16:2-15; Omob 11:4-23,31-35

ⅬⅩⅩⅧ:ⅩⅩⅣ 78:24: Yoh 6:31

ⅬⅩⅩⅧ:ⅩⅩⅩⅦ 78:37: Ogok 8:21

ⅬⅩⅩⅧ:ⅩⅬⅣ 78:44: Okong’ 7:17-21

ⅬⅩⅩⅧ:ⅩⅬⅤ 78:45: a Okong’ 8:20-24; b Okong’ 8:1-6

ⅬⅩⅩⅧ:ⅩⅬⅥ 78:46: Okong’ 10:12-15

ⅬⅩⅩⅧ:ⅩⅬⅦ 78:47: Okong’ 9:22-25

ⅬⅩⅩⅧ:ⅬⅠ 78:51: Okong’ 12:29

ⅬⅩⅩⅧ:ⅬⅡ 78:52: Okong’ 13:17-22

ⅬⅩⅩⅧ:ⅬⅢ 78:53: Okong’ 14:26-28

ⅬⅩⅩⅧ:ⅬⅣ 78:54: Okong’ 15:17; Yosh 3:14-17

ⅬⅩⅩⅧ:ⅬⅤ 78:55: Yosh 11:16-23

ⅬⅩⅩⅧ:ⅬⅥ 78:56: Abag 2:11-15

ⅬⅩⅩⅧ:ⅬⅩ 78:60: Yosh 18:1; Yer 7:12-14; 26:6

ⅬⅩⅩⅧ:ⅬⅪ 78:61: 1 Sam 4:4-22

ⅬⅩⅩⅧ:ⅬⅩⅩ 78:70: 1 Sam 16:11,12; 2 Sam 7:8; 1 Amg 17:7